¶ 1 BEA i he ene alu mei he fale lotu lahi, nae behe ene akoga e toko taha kiate ia, Eiki, vakai ki hono aga oe gaahi maka moe gaahi fale!

2 Bea lea a Jisu, o behe kiate ia, Oku ke mamata ki he gaahi fale lahi ni? e ikai ha maka kuo fokotuu ki ha maka e tuku, ka e laku kotoabe ki lalo.

3 Bea i he ene nofo i he mouga oe Olive, o hagatonu ki he fale lotu lahi, nae fehui fakafufu kiate ia a Bita mo Jemesi mo Jone mo Anitelu,  o behe!

4 Fakaha kiate kimautolu, e hoko afe ae gaahi mea ni? bea koeha ae fakailoga oka fakamooni ae gaahi mea ni kotoabe?

5 Bea fua lea a Jisu, o beheage kiate kinautolu, Vakai telia naa kākā‘i akimoutolu e ha taha.

6 Koeuhi e ha‘u ae toko lahi i hoku huafa, o behe, Ko au ia; bea te nau kākā‘i ae toko lahi.

7 Bea ka mou ka fanogo ki he gaahi tau moe ogoogo oe tau, oua te mou manavahe: koeuhi kuo bau ke hoko ia; kae teeki  hoko ae ikuaga.

8 Koeuhi e tuu hake ae kakai ki he kakai, moe buleaga ki he buleaga; bea e ai ae mofuike i he gaahi botu kehekehe, bea e ai ae gaahi hoge moe gaahi fakamamahi: koe kāmataga eni oe gaahi mamahi.

9 Ka mou vakai kiate kimoutolu: he te nau tukuage akimoutolu ki he kau fakamāu; bea e haha akimoutolu i he gaahi fale lotu; bea e omi akimoutolu ki he ao oe gaahi bule moe gaahi tu‘i koeuhi ko au, koe fakamooni kiate kinautolu.

10 Ka e tomua malaga aki ae ogoogolelei ki he gaahi buleaga kotoabe.

11 Bea ka nau ka taki mo tukuage akimoutolu, oua naa mou tomua fifili, be fakakaukau ki he mea te mou lea aki: ka koia e foaki kiate kimoutolu i he feituulaa koia, koia be te mou lea aki: he oku ikai ko kimoutolu oku lea, ka koe Laumalie Maonioni.

12 Bea e lavaki‘i e he toko taha a  hono tokoua ke mate, moe tamai ae foha; bea e tuu hake ae fānau ki he mātua, mo bule ke tamate‘i akinautolu.

13 Bea e fehianekina akimoutolu i he kakai fulibe koeuhi ko hoku huafa: ka ko ia e kataki o a‘u ki he ikuaga, ko ia ia e moui.

¶ 14 Ka oka mou ka mamata ki he fakalielia oe fakaauha, nae lea ki ai a Taniela koe balofita, oku tuu i he botu oku ikai lelei  ke tuu ai, (ko ia oku lau ke tokaga,) bea iloga ai akinautolu oku i Jutea, ke nau feholaki ki he gaahi mouga:

15 Bea ko ia oku i he tua fale, ke oua naa alu hifo ki loto fale, be hu  ki ai, ke too ha mea mei hono fale:

16 Bea ko ia oku i he goue, ke oua naa foki ia ki mui ke too mai hono kofu.

17 Ka e malaia akinautolu oku fei-tama, bea mo kinautolu oku toutama, i he gaahi aho koia!

18 Bea mou lotu ke oua naa hoko hoo mou hola i he faahita‘u momoko.

19 He koeuhi e ai ha mamahi i he gaahi aho koia, aia nae ikai hano tatau talu hono kamataaga o mamani, aia nae fakatubu e he Otua, o a‘u ki heni, bea e ikai toe behe.

20 Bea ka ne tae oua ae fakajiijii e he Eiki ae gaahi aho koia, behe, e ikai ha taha e moui: ka koeuhi koe kakai fili, aia kuo fili eia, kuo ne fakajiijii ai ae gaahi aho.

21 Bea ka toki behe ai e ha taha kiate kimoutolu, Vakai, ko eni a Kalaisi; be, Vakai,  oku i hena  ia; oua e tui  ki ia:

22 He koeuhi e tubu ae gaahi Kalaisi loi moe kau balofita loi, o nau fakaha ae gaahi fakailoga moe gaahi mea fakaofo, ke kākā aki ae kakai kuo fili o ka ne faigofua.

23 Kae tokaga akimoutolu: vakai, kuou tomua fakaha ae gaahi mea  ni kotoabe kiate kimoutolu.

¶ 24 Ka i he gaahi aho koia, hili ae mamahi koia, e fakabouli ae laa, bea e ikai tuku mai e he mahina a hono māma,

25 Bea e gagana ae gaahi fetuu oe lagi, bea e lulu ae gaahi malohi oe lagi.

26 Bea te nau toki mamata ki he Foha oe tagata oku ha‘u i he gaahi ao, moe malohi lahi moe nāunāu.

27 Bea e toki fekau eia a ene kau agelo, bea tanaki fakataha a ene kakai fili mei he feituu lagi e fa, mei he gataaga oe fonua o a‘u ki he gataaga ae lagi.

28 Koeni, mou ilo ae fakailoga i he akau koe fiki; Oka kei litolito hono vaa, bea tubu hono lau, oku mou ilo oku ofi ae faahita‘u mafana:

29 Ke behe foki akimoutolu, oka mou ka mamata ki hono hoko oe gaahi mea ni, mou ilo oku ofi ia, io, i he mataba.

30 Koe mooni oku ou tala atu kiate kimoutolu, e ikai mole ae toutagata ni, kae oua ke fai ae gaahi mea ni kotoabe.

31 E mole ae lagi moe fonua: ka ko eku gaahi lea e ikai mole.

¶ 32 Ka koe aho koia mo hono feituulaa, oku ikai ha taha oku ne ilo  ki ia, e ikai, be koe kau agelo oku i he lagi, be koe Foha, ka koe Tamai.

33 Mou vakai, leo bea lotu: he oku ikai te mou ilo be hoko afe ae aho koia.

34 Oka fonoga ha tagata, oku ne tuku hono abi ke tauhi e he ene kau tamaioeiki, bea ne vahe ae gaue kiate kinautolu taki taha, bea fekau ki he tauhi mataba ke leo.

35 Koia mou leo: he oku ikai te mou ilo be ha‘u fakaku ae eiki oe fale, i he efiafi, be i he tuuabo, be i he uua ae moa, be i he bogibogi;

36 Telia naa ha‘u fakafokifa be ia, o ne ilo akimoutolu oku mou mohe.

37 Bea koia oku ou tala kiate kimoutolu, oku ou tala ki he kakai kotoabe, Leo.