¶ 1 IHE gaahi aho koia nae fuu toko lahi aubito ae kakai, bea nae ikai haa nau mea ke kai, bea ui e Jisu a ene kau akoga, o ne behe kiate kinautolu,

2 Oku ou ofa mamahi ki he kakai, koeuhi oku aho tolu e nau iate au, bea oku ikai haa nau mea ke kai:

3 Bea kabau teu fekau ke nau alu fiekaia ki ho nau gaahi fale, te nau bogia i he hala: he ko ho nau niihi kuo ha‘u mei he mamao.

4 Bea beheage ene kau akoga kiate ia, E ma‘u meife e ha taha ae ma ke fakamakona aki akinautolu ni i heni i he toafa?

5 Bea fehui ia kiate kinautolu, Oku fiha hoo mou foi ma? Bea nau behe, Oku fitu.

6 Bea fekau eia ki he kakai ke nau nofo ki lalo ki he kelekele; bea ne too ae foi ma e fitu, o ne fakafetai, mo tofitofi, bea age ki he ene kau akoga ke tufaki; bea naa nau tufaki  ia i he ao oe kakai.

7 Bea naa nau ma‘u moe gaahi ika iki: bea ne ne tabuaki, mo fekau ke tufaki foki ia.

8 Bea naa nau kai, o makona: bea nau tanaki ae toega kai koe kato e fitu.

9 Bea ko kinautolu nae kai, koe toko fa afe nai: bea nae fekau eia ke nau alu.

¶ 10 Bea heka vaka leva ia mo ene kau akoga, o ha‘u ki he botu o Tala-manuta.

11 Bea aluage ae kau Falesi, o kamata fakafehui kiate ia, mo kumi iate ia ha fakailoga mei he lagi, ko hono ahiahi‘i.

12 Bea mafulu lahi ia i hono laumalie, mo behe, Koeha oku kumi ai e he toutagata ni ha fakailoga? koe mooni oku ou tala atu kiate kimoutolu, E ikai tuku ha fakailoga ki he toutagata ni.

13 Bea alu ia iate kinautolu, o toe heka vaka, mo alu ki he kau vai e taha.

¶ 14 Bea kuo galo  i he kau akoga ke ave ha ma, bea koe foi ma be taha nae i he vaka mo kinautolu.

15 Bea naa ne nainai kiate kinautolu, o behe, Tokaga, bea vakai telia ae mea fakatubu ae kau Falesi, bea moe mea fakatubu a Helota.

16 Bea fealeleaaki ai akinautolu, o behe, Koe mea i he e tau tae omi ha ma.

17 Bea kuo ilo  ia e Jisu, bea behe eia kiate kinautolu, Koeha oku mou alea ai, i he ikai haa mou ma? oku heeki ai te mou mamata, be ilo? oku kei fefeka ho mou loto?

18 Oku mou mata, kae ikai te mou mamata? bea teliga, kae ikai ogo‘i? bea oku ikai te mou manatu?

19 I he eku tofitofi ae foi ma e nima ki he toko nima afe, nae fiha ae kato nae bito i he toega ne mou ave? Bea nau behe kiate ia, E hogofulu ma ua.

20 Bea koe fitu ki he toko fa afe, nae fiha ae kato nae bito i he toega ne mou ave? Bea nau behe, E fitu.

21 Bea behe eia kiate kinautolu, Koeha nai oku ikai ai te mou ilo?

¶ 22 Bea ha‘u ia ki Betesaita: bea naa nau omi kiate ia ae tagata kui, o nau kole kiate ia ke ne ala ki ai.

23 Bea buke eia ae nima oe tagata kui, o tataki ia kitua mei he botu kakai; bea kuo ne aanu ki hono mata, mo ai hono nima kiate ia, bea ne fehui kiate ia, be oku ne mamata ki ha mea.

24 Bea haga hake ia, o ne behe, Oku ou mamata ki he kakai oku hage koe gaahi akau, oku eveeva.

25 Bea hili ia, bea ne toe ai hono nima ki hono mata, bea fekau kiate ia ke ne haga hake: bea nae moui ia, o ne mamata totonu ki he kakai kotoabe.

26 Bea ne fekau ia ki hono fale, mo ne behe, Oua naa ke alu ki he botu kakai, be tala  ia ki ha taha i he botu kakai.

¶ 27 Bea alu atu a Jisu, mo ene kau akoga, ki he gaahi botu kakai o Sesalia i Filibai: bea fehui eia ki he ene kau akoga i he hala, o ne behe kiate kinautolu, Oku behe e he kakai be konai au?

28 Bea nau beheage, Ko Jone koe Babitaiso: kae  behe e he niihi, Ko Ilaija; bea  behe e he niihi, Koe taha oe kau balofita.

29 Bea behe eia kiate kinautolu, Ka oku behe ekimoutolu kohai au? Bea lea a Bita, o beheage kiate ia, Ko koe, koe Kalaisi.

30 Bea fekau eia kiate kinautolu ke oua naa nau fakaha ia ki ha taha.

31 Bea kamata fakaha eia kiate kinautolu, ae kataki e he Foha oe tagata ae gaahi mea lahi, bea jiaki ia e he mātua, moe kau taulaeiki lahi, moe kau tagata tohi, bea e tamate‘i ia, bea hili ae aho e tolu e toe tuu.

32 Bea naa ne lea ilogofua aki ae lea koia. Bea ave ia e Bita, o ne kamata valoki‘i ia.

33 Ka kuo tafoki ia ki mui, o vakai ki he ene kau akoga, bea valoki‘i eia a Bita, o behe, Alu ki hoku tua, Setani: he oku ikai te ke leleiia i he gaahi mea ae Otua, ka i he gaahi mea ae tagata.

¶ 34 Bea kuo ui eia ae kakai mo ene kau akoga foki, bea ne behe kiate kinautolu, Ko ia ia oku loto ke muimui iate au, ke ne jiaki eia ia, kae too ene kavega, o muimui iate au.

35 He ko ia ia oku loto ke kalofaki ene moui, e mole ia: ka ko ia ia e mole ene moui koeuhi ko au moe ogoogolelei, e ma‘u eia ia.

36 He koeha hono aoga ki ha tagata, o kabau e ma‘u eia a mamani kotoabe, kae mole hono laumalie oona?

37 Be koeha e foaki e ha tagata ke fetogi aki hono laumalie?

38 Ko ia ia e ma kiate au, mo eku gaahi lea, i he toutagata feauaki mo agahala ni, e ma foki ae Foha oe tagata iate ia, oka ha‘u ia i he nāunāu o ene Tamai, moe kau agelo maonioni.