¶ 1 OUA naa mou fakamāu, telia naa fakamāua akimoutolu.

2 He koe aga koia oku mou fakamāu aki, e fakmāua ai akimoutolu: bea koe fuofua koia te mou fua aki, e toe fua aki ia kiate kimoutolu.

3 Bea koeha oku ke tokaga ai ki he malamala‘i akau oku i he mata o ho kaiga, ka oku ikai te ke tokaga ki he fuu akau oku i ho mata oou?

4 Bea e fefe hao faa behe ki ho kaiga, Tuku keu tooa mai ae malamala‘i akau mei ho mata: kae vakai,  oku ai ae fuu akau i ho mata oou?

5 Koe malualoi koe, tomua, li ae fuu akau mei ho mata oou; bea te ke toki mamata totonu ke too ae malamala‘i akau mei he mata o ho kaiga.

¶ 6 Oua naa atu ae mea maonioni ki he faga kuli, be ji hoo mou mataitofe ki he faga buaka, telia naa nau malamalaki ia i ho nau lalo va‘e, bea foki mai o haehae akimoutolu.

¶ 7 Kole, bea e foaki ia kiate kimoutolu; kumi, bea te mou ilo; tukituki, bea e too ia kiate kimoutolu:

8 He ko ia kotoabe oku kole, oku ne ma‘u; bea ko ia oku kumi, oku ne ilo; bea ko ia oku tukituki, e too kiate ia.

9 He koe tagata fe iate kimoutolu, kabau e kole ma e hono foha, te ne age ki ai ha maka?

10 Be kabau te ne kole ha ika, e age ki ai ha gata?

11 Koia kabau oku mou ilo, ka koe agakovi, ke foaki ae gaahi mea lelei ki hoo mou fānau, e fefe hono lahi hake oe  fie foaki ae gaahi lelei e hoo mou Tamai oku i he lagi kiate kinautolu oku kole kiate ia?

12 Koia, koe mea kotoabe oku mou loto ke fai e he kakai kiate kimoutolu, ke mou fai ia kiate kinautolu: he koe fono ia moe kau balofita.

¶ 13 Mou hu i he mataba fajii: he oku falahi ae mataba, mo ataatā ae hala, oku fakatau ki he mate, bea oku hu ai ae toko lahi.

14 Koeuhi oku fajii ae mataba, mo laujii ae hala, oku fakatau ki he moui, bea oku ilo ia e he toko jii be.

¶ 15 Vakai telia ae kau balofita kākā, oku ha‘u kiate kimoutolu oku kofu fakasibi, ka koe faga uolofi fekai i loto akinautolu.

16 Te mou ilo akinautolu i ho nau gaahi fua. He oku toli e he kakai ae fua oe vaine i he akau talatala, be koe fiki i he talatalaamoa?

17 Bea behe, oku tubu i he akau lelei kotoabe ae fua lelei; kae tubu i he akau kovi ae fua kovi.

18 E ikai faa tubu i he akau lelei ae fua kovi, be tubu i he akau kovi ae fua lelei.

19 Koe akau kotoabe oku ikai tubu ai ae fua lelei oku ta hifo, bea laku ki he afi.

20 Koia te mou ilo akinautolu i ho nau gaahi fua.

¶ 21 E ikai hu ki he buleaga oe lagi akinautolu kotoabe oku behe mai kiate au, Eiki, Eiki, ka ko ia oku ne fai ae finagalo o eku Tamai oku i he lagi.

22 E behe kiate au e he toko lahi i he aho koia, Eiki, Eiki, ikai naa mau akonaki i ho huafa? bea i ho huafa naa mau kabuji kitua ae kau tevolo? bea i ho huafa naa mau fai ae gaahi mea mana lahi?

23 Bea teu toki fakaha kiate kinautolu, Nae ikai aubito teu iloa akimoutolu: alu iate au akimoutolu oku fai kovi.

¶ 24 Ko ia oku ne fanogo ki he eku tala ni, bea fai ki ai, teu fakatatau ia ki he tagata boto, nae laga hono fale i he  fuga maka:

25 Bea to ae uha, bea oho mai ae vai, bea hoko moe havili, o to ki he fale koia; ka nae ikai holo ia: he nae laga ia i he  fuga maka.

26 Ka ko ia ia oku fanogo ki he eku gaahi tala ni, bea ikai fai ki ai, e fakatatau ia ki he tagata vale, aia nae laga hono fale i he oneone:

27 Bea to ae uha, bea oho mai ae vai, bea hoko moe havili, o to ki he fale koia; bea holo ia: bea koe mea lahi a hono holoki.

28 Bea kuo fakaoji e Jisu ae gaahi tala ni, bea ofo ae kakai i he ene akonaki:

29 He naa ne akonaki‘i akinautolu o tāu mo ia oku malohi, kae ikai hage koe kau tagata tohi.