Koe Tohi a Baula koe Abosetolo ki he Kakai Filibai

¶ 1 KO BAULA mo Timote, koe ogo tamaioeiki a Jisu Kalaisi, ki he kaiga maonioni kotoabe ia Kalaisi Jisu, oku i Filibai, moe kau tauhi moe kau akonaki:

2 Ke iate kimoutolu ae aloofa, moe monuia, mei he Otua koe tau Tamai, bea moe Eiki ko Jisu Kalaisi.

3 Oku ou fakafetai ki hoku Otua i he eku manatu kotoabe kiate kimoutolu,

4 O hufekina fiefia mau ai be akimoutolu kotoabe i he eku lotu kotoabe,

5 Koeuhi ko hoo mou kau fakataha i he ogoogolelei talu mei he uluaki aho o a‘u ki heni;

6 Oku ou ilo bau ae mea ko eni, koeuhi ko ia kuo ne kamata ae gaue lelei iate kimoutolu, te ne fakahaohaoa ia o a‘u ki he aho o Jisu Kalaisi:

7 O hage oku tāu mo au ke behe eku amanaki kiate kimoutolu kotoabe, koeuhi oku mou i hoku loto; bea i hoku gaahi ha‘i, mo eku lagomaki mo eku fakamooni ki he ogoogolelei, oku mou kau fakataha kotoabe i hoku lelei.

8 He ko hoku fakamooni ae Otua, ki he lahi aubito o eku holi kiate kimoutolu kotoabe i he manāva o Jisu Kalaisi.

9 Bea ko eku lotu eni, ke tubulekina hoo mou ofa o lahi, bea lahi hake i he ilo moe agafakabotoboto kotoabe;

10 Koeuhi ke mou ahiahi‘i ae gaahi mea oku fai kehekehe; ka mou aga-totonu mo taehalaia o a‘u ki he aho o Kalaisi;

11 Ke fakafonu aki akimoutolu ae gaahi fua oe maonioni, aia oku ia Jisu Kalaisi, ke ogoogo lelei ai mo fakafetai ai ki he Otua.

12 Bea ko hoku loto ke mou ilo, e kaiga, koe gaahi mea  nae to kiate au kuo iku ia i he fakatubulekina be oe ogoogolelei;

13 Koia kuo ilo ai i he fale kotoa oe tu‘i, moe gaahi botu kehekehe kotoabe, a hoku gaahi ha‘i koeuhi ko Kalaisi:

14 Bea koe kaiga toko lahi i he Eiki, kuo nau loto malohi koe mea i hoku gaahi ha‘i, bea ajili ai ho nau loto toa ke lea aki ae folofola o taemanavahe.

15 Koe mooni oku malaga aki a Kalaisi e he niihi i he meheka moe fakakikihi; bea fai loto lelei be e he niihi:

16 Koe niihi oku malaga aki a Kalaisi i he kikihi, kae ikai i he loto maa, o  nau amanaki ke fakalahi aki ae mamahi ki hoku gaahi ha‘i.

17 Ka koe niihi i he ofa, o ilo kuo fokotuu au koe lagomekina oe ogoogolelei.

18 Bea fefe ai? ko eni, i he mea kotoabe, i he kākā, be i he mooni, oku malaga aki a Kalaisi; bea koia oku ou fiefia ai, io, bea teu fiefia.

19 He oku ou ilo e kau eni ki hoku fakamoui i hoo mou lotu, moe foaki oe Laumalie o Jisu Kalaisi,

20 O fakatatau ki he eku holi lahi moe amanaki lelei, ke oua naa ai ha mea teu ma ai, ka i he fai malohi lahi, ke hage koia i mu‘a, ke behe eni foki, ae fakaogolelei a Kalaisi i hoku jino, i he moui, be i he mate.

21 He koe moui kiate au ko Kalaisi ia, ka e aoga lahi ae mate.

22 Bea kabau teu moui i he jino, ko hono fua eni o eku gaue: ka oku ikai teu iloa aia teu fili ki ai.

23 He oku efihia au i he mea e ua, oku ou holi ke alu, keu ia Kalaisi; aia oku lelei lahi aubito:

24 Ka koe nofo i he jino oku aoga lahi ia kiate kimoutolu.

25 Bea i he eku ilo eni, oku ou ilo teu moui o nonofo mo kimoutolu kotoabe, ka e tubulekina ai hoo mou tui moe fiefia;

26 Bea ke tubulekina aubito ai hoo mou fiefia ia Jisu Kalaisi koeuhi ko au, i he eku toe alu atu kiate kimoutolu.

27 Kae kehe, ke tāu hoo mou ulugaaga moe ogoogolelei a Kalaisi: koeuhi ka ai haaku alu atu o vakai kiate kimoutolu, be teu mamao, teu fanogo be ki hoo mou gaue, oku mou tuu mau i he loto be taha, o uouaga taha be, o feiga fakataha i he tui ki he ogoogolelei;

28 Bea oua naa ilifia i ha mea mei ho mou gaahi fili: he koe fakailoga ia kiate kinautolu oe malaia, ka oe fakamoui kiate kimoutolu, bea oku mei he Otua ia.

29 He kuo tuku kiate kimoutolu koeuhi ko Kalaisi, ke oua naa gata i he tui be kiate ia, ka ke mou mamahi foki koeuhi ko ia;

30 I he tau‘i akimoutolu, o hage koia naa mou mamata ai iate au, bea fanogo eni oku iate au.