¶ 1 BEA nae ha mai ae mea fakaofo lahi i he lagi; koe fefine kuo kofu aki ae laa, bea i hono lalo va‘e ae mahina, bea nae i hono ulu ae bale oe fetuu e hogofulu ma ua:

2 Bea nae feitama ia bea tagi, o lagā, bea mamahi ke fanau.

3 Bea nae ha mai moe mea fakaofo e taha i he lagi; bea vakai, koe fuu gata lahi nae kulokula, kuo fitu hono ulu, bea nae i ai ae nifo e hogofulu, bea fitu ae bale i hono gaahi ulu.

4 Bea nae toho aki e hono iku hono tolu oe vahe oe gaahi fetuu oe lagi, o ne li hifo akinautolu ki he fonua: bea nae tuu ae fuu gata i he ao oe fefine nae teu ke fanau, koeuhi, ka fanau‘i leva ene tamajii, ke ne kai o oji ia.

5 Bea ne fanau‘i ae tamajii tagata, aia te ne bule‘i ae buleaga kotoabe aki ae vaa ukamea: bea nae too hake ene tamajii ki he Otua, bea ki hono nofoa fakaeieiki.

6 Bea nae hola ae fefine ki he toafa, aia oku ai hono botu kuo teu e he Otua, koeuhi ke nau fafaga ia i ai koe aho e taha afe ma uageau ma onogofulu.

7 Bea nae fai ae tau i he lagi: ko Maikeli mo ene kau agelo naa nau tau‘i ae fuu gata; bea nae tau ae fuu gata mo ene kau agelo.

8 Ka nae ikai te nau ikuna; bea nae ikai kei ilo ha nau botu i he lagi.

9 Bea nae li kitua ae fuu gata lahi, ae gata motua koia, oku ui ko Tevolo, mo Setani, aia oku ne kākā‘i a mamani kotoabe: nae li ia kitua ki he fonua, bea nae li kitua mo ia a ene kau agelo.

10 Bea neu ogo‘i ae le‘o lahi i he lagi, nae behe, Ko eni kuo hoko mai ae fakamoui, moe malohi, moe buleaga o ho tau Otua, moe malohi o hono Kalaisi: he kuo li ki lalo ae fakakovi o ho tau kaiga, aia naa ne fakakovi‘i akinautolu i he ao o ho tau Otua i he aho moe bo.

11 Bea naa nau ikuna ia aki ae taataa oe Lami, moe lea oe nau fakamooni; bea nae ikai te nau mamae ki he e nau moui ka nau mate.

12 Koia ke fiefia, ae gaahi lagi, mo kimoutolu oku nofo ai. E malaia ae kakai oku nofo i he mama na moe tahi! he kuo alu hifo ae tevolo kiate kimoutolu, kuo ita lahi, koeuhi oku ne ilo oku fuoloa jii be hono kuoga.

13 Bea i he mamata e he fuu gata kuo li ia ki he mamani, naa ne fakataga‘i ae fefine ne ne fanau‘i ae tamajii tagata.

14 Bea nae foaki ki he fefine ae kabakau e ua oe ikale lahi, ke ne buna aki ia ki he toafa, ki hono botu, aia oku tauhi ai ia i ha kuoga, moe gaahi kuoga, moe vaeua malieaga oe kuoga, mei he ao oe gata.

15 Bea nae buaki e he gata ki he fefine ae vai mei hono gutu o hage ha vaitafe, koeuhi ke ne fai ke auhia ia i he vai.

16 Bea nae tokoni‘i ae fefine e he fonua, bea matoo e he fonua hono gutu, o ne folo hifo ae vai, aia nae buaki e he fuu gata mei hono gutu.

17 Bea nae ita ae fuu gata ki he fefine, o ne alu ke tau‘i hono toe o hono hako, akinautolu oku fai ae gaahi fekau ae Otua, bea ma‘u moe fakamooni o Jisu Kalaisi.