¶ 1 BEA neu mamata, bea vakai, nae tuu ha Lami i he mouga ko Saione, bea nae iate ia ae toko taha kilu ma toko fa mano ma toko fa afe, kuo tohi i ho nau foi la‘e ae huafa o ene Tamai.

2 Bea neu ogo‘i ae le‘o mei he lagi, o hage koe uulu oe gaahi vai lahi, bea hage koe uulu oe mana lahi: bea neu ogo‘i ae le‘o oe kau haabe oku ta‘i ho nau gaahi haabe:

3 Bea naa nau hiva aki ae hiva foou i he ao oe nofoa fakaeieiki, bea i he ao oe mea moui e fa, bea moe kau mātua: bea nae ikai ke faa ilo e ha taha ae hiva koia ka koe toko taha kilu moe toko fa mano moe toko fa afe, nae huhui mei mamani.

4 Ko kinautolu eni nae ikai ke nau uli‘i aki ae fefine; he koe kau tāuboou akinautolu. Ko kinautolu eni oku nau muimui i he Lami i he botu kotoabe oku alu ia ki ai. Ko kinautolu eni nae huhui mei he kakai, koe uluaki fua ki he Otua moe Lami.

5 Bea nae ikai ilo ha kākā i ho nau gutu, he oku nau tae halaia i he ao oe afioaga oe Otua.

6 Bea neu mamata ki ha agelo kehe e taha oku buna i he loto lagi, kuo iate ia ae ogoogolelei taegata ke malaga aki kiate kinautolu oku nofo i he mamani, bea ki he buleaga kotoabe, moe faahiga, moe lea, moe kakai,

7 O ne behe aki ae le‘o lahi, Manavahe ki he Otua, bea atu ae fakamalo kiate ia; he kuo hokojia ae feituulaa o ene fakamāu: bea hu kiate ia naa ne gaohi ae lagi, moe mamani, bea moe tahi, moe gaahi matavai oe gaahi vai.

8 Bea nae muimui ae agelo e toko taha, o ne behe, Kuo higa a Babilone, kuo higa ia, ae kolo lahi koia, koeuhi kuo ne fakainu‘i ae buleaga kotoabe i he uaine oe houhau o ene feauaki.

9 Bea muimui iate kinaua hono tolu oe agelo, o ne behe, aki ae le‘o lahi, Kabau e hu e ha taha ki he manu fekai mo hono fakatātā, bea ma‘u ae fakailoga i hono foi la‘e, be i hono nima,

10 E inu eia i he uaine oe houhau oe Otua, aia kuo ligi taehui ki he ibu o hono houhau; bea e fakamamahi ia aki ae afi moe sulifa i he ao oe kau agelo maonioni, bea i he ao oe Lami:

11 Bea e alu hake ae kohu oe nau mamahi o taegata bea taegata; bea oku ikai te nau mālōlō i ha aho be ha bo, akinautolu oku hu ki he manu fekai mo hono fakatātā, bea mo ia oku ne ma‘u ae fakailoga o hono higoa.

12 Ko eni ae faa kataki ae kakai maonioni: ko eni akinautolu oku fai ae gaahi fekau ae Otua, moe tui kia Jisu.

13 Bea neu ogo‘i ae le‘o mei he lagi, oku behe mai kiate au, Tohi, Oku monuia talu mei heni ae bekia oku bekia i he Eiki: Io, oku behe e he Laumalie, koeuhi ke nau mālōlō mei he e nau gaahi gaue; bea oku muimui kiate kinautolu e nau gaahi gaue.

14 Bea neu jio, bea vakai, koe ao hinehina, bea nae heka ki he ao ae toko taha o hage koe Foha oe tagata, kuo i hono ulu ae bale koula, bea i hono nima ae hele tuuji oku majila.

15 Bea nae alu atu mei he fale tabu ae agelo e taha, o ne kalaga aki ae le‘o lahi kiate ia nae heka ki he ao, Ai hoo hele tuuji, o tuuji: he kuo hokojia ae kuoga ke ke tuuji ai; he kuo motua ae ta‘u oe mama.

16 Bea ko ia nae heka ki he ao, naa ne ai ene hele tuuji i he fonua; bea nae tuuji ae fonua.

17 Bea alu atu moe agelo e taha mei he fale tabu oku i he lagi, kuo iate ia foki ae hele tuuji oku majila.

18 Bea alu atu moe agelo e taha mei he ejifeilaulau, nae iate ia ae bule ki he afi; o ne kalaga aki ae kalaga lahi kiate ia nae i ai ae hele tuuji oku majila, o ne behe, Ai hoo hele tuuji oku majila, o tutuu ae gaahi fuhi vaine o mamani; he kuo momoho a hono gaahi fua oe vaine.

19 Bea nae ai e he agelo a ene hele tuuji ki he fonua, o tutuu ae vaine oe fonua, bea ne li ia ki he tataoaga uaine lahi oe houhau oe Otua.

20 Bea nae malamalaki ae tataoaga uaine i he tua kolo, bea nae ha‘u ae toto mei he tataoaga uaine o a‘u hake ki he gaahi noo gutu oe faga hose, bea nae malofa atu ia i he maile e uageau.