¶ 1 BEA neu fanogo ki he le‘o lahi mei he fale tabu, nae behe ki he agelo e toko fitu, Mou alu atu, o liligi ae gaahi hina oe houhau oe Otua ki he fonua.

2 Bea nae alu ae uluaki, o ne liligi ene hina ki he fonua; bea to ai ae bala kovi mo fakamamahi ki he kakai naa nau ma‘u ae fakailoga oe manu fekai, mo kinautolu naa nau hu ki hono fakatātā.

3 Bea nae liligi e hono ua oe agelo a ene hina ki he tahi; bea nae liliu ai ia ke hage koe toto o ha taha kuo mate: bea nae mate ai ae mea moui kotoabe nae i he tahi.

4 Bea nae liligi e hono tolu oe agelo a ene hina ki he gaahi vaitafe moe gaahi matavai oe gaahi vai; bea nae liliu ai ia koe toto.

5 Bea neu ogo‘i ae agelo oe gaahi vai, nae behe eia, Oku ke agatonu mo maonioni, e Eiki, oku ke i ai ni, bea naa ke i ai, koeuhi kuo ke fakamāu o behe ni.

6 He kuo nau liligi ae toto oe kakai maonioni moe kau balofita, bea kuo ke atu kiate kinautolu ae toto ke inu; he oku tāu mo kinautolu.

7 Bea neu fanogo ki he toko taha, nae behe mai mei he ejifeilaulau, Koe mooni, e Eiki, koe Otua Mafimafi, oku agatonu mo maonioni a hoo gaahi fakamāu.

8 Bea nae liligi e hono fa oe agelo a ene hina ki he laa; bea nae tuku kiate ia ke ne fakamagia aki ae afi ae kakai.

9 Bea nae magia o vela lahi ae kakai, o nau lauikovi ae huafa oe Otua, aia oku ne bule‘i ae gaahi malaia ni: bea nae ikai te nau fakatomala ke nau fakamalo ai kiate ia.

10 Bea nae liligi e hono nima oe agelo a ene hina ki he nofoaga oe manu fekai; bea nae bito hono buleaga i he fakabouli; bea nau gūgū ho nau elelo i he mamahi,

11 Mo nau lauikovi ae Otua oe lagi, koeuhi koe nau gaahi mamahi mo ho nau gaahi bala, ka nae ikai te nau fakatomala i he e nau gaahi gaue.

12 Bea nae liligi e hono ono oe agelo a ene hina ki he vaitafe lahi ko Iufa-letesi; bea nae fakamamaha hono vai oona, koeuhi ke teuteu ae hala oe gaahi tu‘i mei he botu hahake.

13 Bea neu mamata koe laumalie uli e toko tolu, nae hage koe faga boto, nae ha‘u mei he gutu oe fuu gata, moe gutu oe manu fekai, moe gutu oe balofita loi.

14 He koe gaahi laumalie akinautolu oe kau tevolo, oku fai ae gaahi mana, oku alu atu ki he gaahi tu‘i oe fonua bea mo mamani kotoabe, ke tanaki akinautolu ki he tau oe aho lahi koia oe Otua Mafimafi.

¶ 15 Vakai, oku ou ha‘u o hage ha kaihaa. Oku monuia ia oku leo, bea tauhi hono gaahi kofu, telia naa alu telefua, bea nau mamata ki he ene ma.

16 Bea naa ne tanaki akinautolu ki he botu oku ui i he lea faka‐Hebelu ko Amaketone.

17 Bea nae liligi e hono fitu oe agelo a ene hina ki he atā; bea nae ogo mai ae le‘o lahi mei he fale tabu i he lagi, mei he nofoa fakaeieiki, oku behe mai, Kuo fai ia.

18 Bea nae ai ae gaahi le‘o, moe mana, moe uhila; bea nae ai ae mofuike lahi, nae ikai hano tatau talu ae nofo oe kakai i mamani, ae fuu mofuike, kuo behe hono fakamanavahe mo lahi.

19 Bea nae vahe tolu ae kolo lahi, bea nae higa ae gaahi kolo oe gaahi buleaga: bea nae manatu‘i a Babilone lahi i he ao oe Otua, ke atu ki ai ae ibu oe uaine kakaha o hono houhau.

20 Bea nae buna atu ae motu kotoabe, bea ikai ilo‘i ae gaahi mouga.

21 Bea nae to ae uhamaka lahi mei he lagi ki he kakai, o taki taha mamafa  ae foi maka o tatau moe taleniti: bea nae lauikovi‘i ae Otua e he kakai koeuhi koe malaia oe uhamaka; he koe malaia koia koe mea lahi aubito.