Koe Fakaha kia Jone

¶ 1 KOE Fakaha a Jisu Kalaisi, aia nae foaki e he Otua kiate ia, ke fakailo ki he ene kau tamaioeiki ae gaahi mea oku totonu ke vave a ene hoko; bea ne fekau mo fakailo ia e he ene agelo ki he ene tamaioeiki ko Jone:

2 Aia naa ne fakaha ae folofola ae Otua, bea moe fakamooni a Jisu Kalaisi, bea moe gaahi mea kotoabe naa ne mamata ai.

3 Oku monuia ia oku ne lau, mo kinautolu oku fanogo, ki he gaahi lea oe kikite ni, mo fai ae gaahi mea oku tohi i ai: he oku ofi ae kuoga.

4 KO AU JONE ki he jiaji e fitu oku i Esia: Ke iate kimoutolu ae aloofa, moe monuia, meiate ia oku i ai, bea nae i ai, bea mo ia e i ai; bea mei he Laumalie e Toko Fitu aia oku i hono mu‘a nofoa fakaeieiki;

5 Bea mei a Jisu Kalaisi, koe Fakamooni agatonu, moe uluaki fakatubu mei he mate, moe Eiki oe gaahi tu‘i o mamani;

6 Ke iate ia naa ne ofeina akitautolu, bea ne fufulu akitautolu mei he e tau gaahi agahala aki hono taataa oona, bea ne gaohi akitautolu koe gaahi tu‘i, moe kau taulaeiki ki he Otua mo ene Tamai; ke iate ia ae ogoogo lelei moe bule o taegata bea taegata. Emeni.

7 Vakai, oku haele mai ia moe gaahi ao; bea e mamata kiate ia ae mata kotoabe, io, mo kinautolu naa nau hoka‘i ia: bea e tagi mamahi ae gaahi faahiga kotoabe o mamani koeuhi ko ia. Ke behe be, Emeni.

8 Oku behe e he Eiki, Ko au koe Alifa moe Omeka, koe kamataaga moe gataaga, aia oku i ai, bea nae i ai, bea ko ia ia e i ai, koe Mafimafi.

9 Ko au Jone, ko ho mou tokoua, moe kauga mea i he mamahi, bea moe buleaga moe faa kataki o Jisu Kalaisi, naaku i he motu oku ui ko Batimosi, koeuhi koe folofola ae Otua, bea koeuhi koe fakamooni o Jisu Kalaisi.

10 Bea neu i he Laumalie i he aho oe Eiki, bea neu ogo‘i ae le‘o lahi mei hoku tua, o hage ko ha mea lea,

11 Oku behe mai, Ko au koe Alifa moe Omeka, koe uluaki moe ki mui: bea, Koia oku ke mamata ki ai, tohi i ha tohi, o ave ki he gaahi jiaji e fitu oku i Esia; ki Efeso, mo Simana, mo Beakamosi, mo Taiataila, mo Satisi, mo Filatelifia, mo Leotisia.

12 Bea neu tafoki keu ilo ae le‘o nae lea kiate au. Bea i he eku tafoki, neu mamata ki he tuuga māma koula e fitu;

13 Bea i he lotolotoga oe gaahi tuuga māma e fitu, koe toko taha o hage koe Foha oe tagata, kuo kofu aki ae kofu nae a‘u hifo ki he va‘e, bea nonoo ki hono fatafata aki ae noo koula.

14 Ko hono ulu moe louulu nae hina o hage koe hinehina oe fulufulu‘i sibi, o hage koe uha hinehina; bea nae tatau hono fofoga moe ulo oe afi;

15 Bea tatau hono va‘e moe balasa lelei, o hage ko ene kakaha i he hakaaga ukamea; bea ko hono le‘o, nae tatau moe uulu oe gaahi vai lahi.

16 Bea nae i hono nima toomatau ae fetuu e fitu: bea nae alu atu i hono gutu ae heleta majila o fakatoumata: bea nae tatau hono fofoga moe laa i he ene ulo i hono malohi.

17 Bea i he eku mamata kiate ia, neu to hifo i hono va‘e o hage ha mate. Bea naa ne ai kiate au hono nima toomatau, o ne behe mai kiate au, Oua e manavahe; ko au koe uluaki moe ki mui:

18 Ko au ia oku moui, ka neu mate, bea vakai, oku ou moui o taegata bea taegata, Emeni; bea kuo iate au ae ki o hetesi moe mate.

19 Tohi ae gaahi mea kuo ke mamata ai, moe gaahi mea oku i ai, bea moe gaahi mea e hoko a mui;

20 Koe fakatātā oe fetuu e fitu aia ne ke mamata i hoku nima toomatu, bea moe tuuga māma koula e fitu. Koe fetuu e fitu, koe kau agelo oe gaahi jiaji e fitu: bea koe tuuga māma e fitu aia ne ke mamata ai, koe gaahi jiaji ia e fitu.