¶ 1 KOIA ko kitautolu oku malohi oku totonu ke tau kataki ae gaahi vaivai oe vaivai, bea oua naa fakafiemalie kiate kitautolu be.

2 Ke tau taki taha fakafiemalie kotoabe ki hono kaugaabi, ke lelei ai mo laga hake ai ia.

3 He nae ikai fakafiemalie a Kalaisi eia; kae hage koia kuo tohi, Koe gaahi manuki anautolu nae manuki‘i koe, nae to kiate au.

4 He koe gaahi mea kotoabe nae tohi i mu‘a, nae tohi ko ho tau akonaki, koeuhi koe mea i he faa kataki moe fakafiemalie oe gaahi tohi, ke tau ma‘u ai ae amanaki lelei.

5 Bea koeni, ke tuku kiate kimoutolu e he Otua oe faa kataki moe fiemalie, ke mou felototatau aki be kiate kimoutolu o tatau mo Kalaisi Jisu:

6 Koeuhi ke mou loto taha be, mo gutu taha be, i he fakamalo ki he Otua, io, koe Tamai a ho tau Eiki ko Jisu Kalaisi.

7 Koia ke mou fema‘uaki akimoutolu taki taha, o hage koe ma‘u foki e Kalaisi akitautolu ke ogoogo lelei ai ae Otua.

8 Bea koeni, oku ou fakaha koe tamaioeiki a Jisu Kalaisi oe kamu, koeuhi koe mooni oe Otua, ke fokotuu mau ae gaahi talaofa  nae fai ki he gaahi tamai:

9 Bea koeuhi ke fakamalo ki he Otua ae gaahi Jenitaile koeuhi ko ene aloofa; o hage koia kuo tohi, Koe mea koia teu fakaogolelei ai koe i he gaahi Jenitaile, o hiva ki ho huafa.

10 Bea toe behe eia, Ke fiefia akimoutolu ae gaahi Jenitaile, fakatahi mo hono kakai.

11 Bea toe behe, Fakafetai ki he Eiki, akimoutolu ae gaahi Jenitaile kotoabe; fakaogolelei ia, akimoutolu ae kakai kotoabe.

12 Bea toe lea a Isaia, E ai ha aka o Jese, bea e tubu hake ia ke bule ki he kakai Jenitaile; e amanaki lelei ae kakai Jenitaile kiate ia.

13 Bea koeni,  ofa ke fakafonu akimoutolu e he Otua oe amanaki lelei, aki ae fiefia moe melino i he tui, koeuhi ke mou mohu amanaki lelei, i he malohi oe Laumalie Maonioni.

14 Bea ko au foki, oku ou ilo bau kiate kimoutolu, ko hoku kaiga, kuo fonu akimoutolu foki i he agalelei, kuo fakabito akimoutolu i he ilo kotoabe, moe mafai foki ke fetokoniaki akimoutolu.

15 Ka kuou tohi malohi atu nai kiate kimoutolu, e kaiga, koeuhi ke faka-manatu‘i akimoutolu, koe mea i he ofa aia kuo foaki kiate au e he Otua,

16 Koeuhi keu hoko ai koe faifekau a Jisu Kalaisi ki he kakai Jenitaile, o tauhi ae ogoogolelei ae Otua, koeuhi ke aoga hono feilaulau aki oe gaahi Jenitaile, kuo fakamaonioni‘i e he Laumalie Maonioni.

17 Koia oku ou ma‘u aia keu fakamalo ai ia Jisu Kalaisi, i he gaahi mea koia oku kau ki he Otua.

18 He oku ikai teu faa lea ki he gaahi mea koia nae ikai fai e Kalaisi iate au, ke fakatalagofua ae gaahi Jenitaile, i he lea moe gaue,

19 I he gaahi mana lahi mo fakaofo, i he malohi oe Laumalie oe Otua; bea kuo aoga eku malaga aki ae ogoogolelei a Kalaisi, o fai mei Jelusalema, o fakatakamilo o a‘u ki Ililekomi.

20 Io, nae behe eku feiga ke malaga aki ae ogoogolelei, ikai i he botu kuo hua aki ai a Kalaisi, telia naaku fokotuu ki he tuuga o ha tagata kehe.

21 Kae hage koia kuo tohi, Ko kinautolu nae ikai lea aki ia ki ai, te nau mamata: bea ko kinautolu nae ikai fanogo, te nau ilo.

22 Koia koe mea koia foki kuo lahi ene taofi au, bea kuo ikai ai teu alu atu kiate kimoutolu.

23 Ka koeni, oku ikai kei toe haaku botu i he gaahi fonua ni, bea i he eku holi lahi i he gaahi ta‘u lahi keu alu atu kiate kimoutolu;

24 Oka hoko hoku fonoga atu ki Sebeini, teu alu atu kiate kimoutolu: he oku ou amanaki keu mamata kiate kimoutolu i hoku fonoga, bea ke mou moimoi‘i au i hoku fonoga, oka hili eku ma‘u ae fiemalie jii iate kimoutolu.

25 Ka koeni, oku ou alu ki Jelusalema, ke tokoni ki he kaiga maonioni.

26 He nae lelei kiate kinautolu o Masitonia mo Akeia ke fai ae tanaki koloa ma ae kaiga maonioni oku majiva i Jelusalema.

27 Kuo nau fai loto lelei eni; bea ko ho nau kau fai totogi totonu akinautolu. He kabau kuo fakakau ae Jenitaile ke ma‘u e nau gaahi mea fakalaumalie, koe nau gaue totonu ia ke tokoni aki akinautolu ae gaahi mea fakamama.

28 Koia ka hili eku fai eni, beau fakamau kiate kinautolu ae fua ni, teu alu atu iate kimoutolu ki Sebeini.

29 Bea oku ou ilo, o kau ka a‘u atu kiate kimoutolu, teu alu atu i hono fonu oe tabuaki oe ogoogolelei o Kalaisi.

30 Bea koeni, oku ou kole kiate kimoutolu, e kaiga, koeuhi ko ho tau Eiki ko Jisu Kalaisi, bea koeuhi koe ofa oe Laumalie, ke mou fekuki mo au i hoo mou gaahi lotu ki he Otua koeuhi ko au;

31 Koeuhi ke fakahaofi au meiate kinautolu i Jutea oku talagataa; bea koeuhi ko eku gaue ki Jelusalema, ke aoga ia ki he kaiga maonioni;

32 Bea koeuhi keu a‘u atu kiate kimoutolu i he fiefia i he finagalo oe Otua, bea ke fakafiemalie‘i au mo kimoutolu.

33 Bea koeni, ke iate kimoutolu kotoabe ae Otua oe melino. Emeni.