¶ 1 BEA ka koia, bea te tau behe nae ma‘u ae ha e he e tau tamai ko Ebalahame, i he aga fakajino?

2 He kabau nae fakatonuhia‘i a Ebalahame e he gaahi gaue, kuo ne ma‘u ae boleaga kae ikai i he ao oe Otua.

3 He oku behe e he tohi koeha? Nae tui a Ebalahame ki he Otua, bea nae lau ia kiate ia koe maonioni.

4 Bea koeni, oku ikai lau ae totogi kiate ia oku gaue koe foaki ofa, ka koe mea totonu.

5 Ka ko ia oku ikai ke gaue, kae tui be kiate ia oku ne fakatonuhia‘i ae taelotu, oku lau ene tui koe maonioni.

6 O hage koe fakamatala foki e Tevita ae monuia ae tagata, aia oku lau ki ai e he Otua ae maonioni tae ha gaue,

7  O behe, Oku monuia akinautolu kuo fakamolemolea e nau gaahi taemaonioni, bea kuo ufiufi e nau gaahi agahala.

8 Oku monuia ae tagata e ikai lau ki ai e he Eiki ha agahala.

9 Koe monuia eni ki he kamu be, be ki he taekamu foki? he oku mau behe, koe tui a Ebalahame nae lau kiate ia koe maonioni.

10 Bea nae lau fakafefe ia? i he ene i he kamu, be i he taekamu? Nae ikai i he kamu, kae i he taekamu.

11 Bea nae ma‘u eia ae fakailoga oe kamu, koe fakamooni oe maonioni i he ene tui, oku heeki ai kamu ia: koeuhi ke hoko ia koe tamai a nautolu kotoabe oku tui, ne ogo be te nau tae kamu; bea koeuhi ke lau ae maonioni kiate kinautolu foki:

12 Bea koe tamai ia oe kamu kiate kinautolu nae ikai oe kamu be, ka oku nau muimui foki i he lakaga tui oe tau tamai ko Ebalahame, i he heeki ai ke kamu ia.

13 He koe talaofa, ke hoko ia koe tagata hoko a mamani, nae ikai kia Ebalahame, be ki hono hako, i he fono, ka i he maonioni oe tui.

14 He kabau koe kakai hoko akinautolu oku i he fono, ta koe vaiga be ae tui, bea oku fakataeaoga moe talaofa foki:

15 Koeuhi oku tubu i he fono ae houhau: he ka ikai ha fono, oku ikai foki ha fai hala.

16 Koia, oku mei he tui ia, koeuhi ke i he aloofa be; koeuhi ke tuu mau ae talaofa ki he hako kotoabe; ikai kiate kinautolu be oku oe fono, ka kiate kinautolu foki oku oe tui a Ebalahame; aia koe tamai a tautolu kotoabe,

17 (O hage koia kuo tohi, Kuou tuutuuni koe koe tamai ae gaahi kakai lahi,) i he ao oe Otua aia naa ne tui ki ai, aia oku ne fakaake ae mate, bea ne lea ki he gaahi mea koia kuo ikai, o hage kuo ai ia.

18 Bea naa ne amanaki, ka kuo ikai hano tuuga o ene amanaki, bea tui, ke ne hoko koe tamai ae gaahi kakai lahi, o fakatatau mo ia nae lea aki, E behe be ho hako.

19 Bea i he ikai vaivai ia i he tui, nae ikai te ne tokaga ki hono jino oona kuo mate, he kuo teau nai ae ta‘u o ene motua, be koe mate ae manāva o Sela:

20 Nae ikai lotolotoua ia i he taetui ki he talaofa ae Otua; ka nae malohi ia i he tui, o ne fakaogoogolelei ae Otua;

21 O ne matuaki ilo loto, koe mea kuo ne talaofa ai, e mafai foki eia ke fakamooni.

22 Koia foki nae lau ai ia kiate ia koe maonioni.

23 Koeni, nae ikai ke tohi kuo lau ia kiate ia, koeuhi ko ia be;

24 Ka koeuhi ko kitautolu foki, aia e lau ia ki ai, o kabau te tau tui kiate ia naa ne fokotuu hake ho tau Eiki ko Jisu mei he mate;

25 Aia nae takuage koeuhi koe tau gaahi agahala, bea nae fokotuu hake ia koeuhi ko ho tau fakatonuhia.