¶ 1 BEA nae folofola a Jihova hili ae mate ae ogo foha o Elone, i he e na fai ae feilaulau i he ao o Jihova, bea na mate;

2 Bea nae folofola a Jihova kia Mosese, Lea ki ho taokete ko Elone, ke oua naa faa ha‘u ia ki he botu maonioni i he loto buibui i he ao oe nofoaga aloofa, aia oku i he fuga buha; telia naa mate ia: he teu fakahāhā au i he nofoaga aloofa.

3 E behe ni ae ha‘u a Elone ki he botu maonioni: e omi eia ae bulu mui koe feilaulau ma ae agahala, moe sibi tagata ki he feilaulau tutu.

4 Bea e ai eia ae kofu tubenu hinehina maonioni, bea ke ai ki hono jino ae kofu va‘e tubenu hinehina, bea ke nonoo aki ae noo tubenu hinehina, bea tatā aki ae tatā tubenu hinehina: koe gaahi kofu maonioni eni; koia te ne kaukau ai hono jino aki ae vai, bea ai ia  kiate ia.

5 Bea te ne too eia mei he fakataha oe fānau a Isileli, ae uhiki‘i koji e ua koe feilaulau ma ae agahala, moe sibi tagata e taha koe feilaulau tutu.

6 Bea e atu e Elone ae bulu ki he feilaulau ma ae agahala, aia oku maana, o fai aki ae fakalelei maana bea mo hono fale.

7 Bea e too eia ae ogo koji, o atu ia i he ao o Jihova i he mataba oe fale fehikitaki oe kakai.

8 Bea e fai ae talotalo e Elone ki he ogo koji: ke vahe ae taha ma a Jihova, bea koe taha koe koji fetuku.

9 Bea e omi e Elone ae koji nae talotalo ke vahe ma a Jihova, o atu ia koe feilaulau ma ae agahala.

10 Ka koe koji, aia nae talotalo ke vahe ke hoko koe koji fetuku, e atu moui be ia i he ao o Jihova, ke fai aki ia ae fakalelei, bea ke tukuage ia ke alu ki he toafa gaogao koe koji fetuku.

11 Bea e omi e Elone ae bulu ki he feilaulau ma ae agahala, aia oku atu maana, bea ne fai aki ae fakalelei maana, bea mo hono fale, bea e tamate‘i eia ae bulu oe feilaulau ma ae agahala, aia oku atu maana.

12 Bea e too eia ae ibu aigaafi oku fonu i he malala‘i afi vela mei he fuga feilaulauaga i he ao o Jihova, bea moe falukuga lahi oe mea namu kakala kuo tuki ke iki, bea te ne omi ia ki loto i he buibui:

13 Bea e ai eia ae mea namu kakala ki he afi i he ao o Jihova, koeuhi ke ufiufi e he kohu oe mea namu kakala ae nofoaga aloofa, aia oku ne ufiufi ae fuakava, telia naa mate ai ia:

14 Bea e too eia mei he toto oe bulu, o luluku aki hono tuhu ki he nofoaga aloofa ki he botu hoboagalaa; bea te ne luluku ae toto i he ao oe nofoaga aloofa aki a hono tuhu ke liuga fitu.

¶ 15 Bea te ne toki tamate‘i eia ae koji ki he feilaulau ma ae agahala, aia oku ma ae kakai, bea e omi hono toto ki loto i he buibui, bea e fai aki ae toto o hage koia nae fai aki ae toto oe bulu, o luluku ia ki he nofoaga aloofa, bea i he ao oe nofoaga aloofa:

16 Bea te ne fai ha fakalelei koeuhi koe botu maonioni, koe mea i he tae maa ae fānau a Isileli, bea koe mea i he e nau gaahi talagataa moe nau gaahi agahala: bea e fai behe eia ki he fale fehikitaki oe fakataha, aia oku tuu iate kinautolu i he lotolotoga oe nau gaahi mea tae maa.

17 Bea e ikai alu ki he fale fehikitaki oe fakataha ha tagata e toko taha, oka hu ia ki ai ke fai ae fakalelei oe botu maonioni, kae oua ke ha‘u ia kitua, bea oji ene fai eia ae fakalelei maana, bea mo hono fale, bea koeuhi koe kakai kotoabe o Isileli.

18 Bea te ne alu kitua ki he feilaulauaga aia oku i he ao o Jihova, bea fai ae fakalelei koeuhi koia; bea e too ae toto oe bulu, moe toto oe koji, bea e ai ia ki he gaahi nifo oe feilaulauaga o takatakai.

19 Bea te ne luluku ae toto ki ai aki hono tuhu ke liuga fitu, o fakamaa ia, o fakatabu‘i ia mei he gaahi tae maa ae fānau a Isileli.

¶ 20 Bea oka hili ene fakaoji hono fakalelei oe botu maonioni, moe fale fehikitaki oe fakataha, moe feilaulauaga, e toki omi eia ae koji moui:

21 Bea e hilifaki e Elone hono nima fakatouoji ki he ulu oe koji moui, o vete ki ai ae gaahi hia kotoabe ae fānau a Isileli, moe nau gaahi talagataa kotoabe, moe nau gaahi agahala, o ne hilifaki ia ki he ulu oe koji, bea te ne fekau ke tataki atu ia ki he toafa e ha tagata oku galigali moia:

22 Bea e fua e he koji o ave ki he fonua lala, e nau gaahi hia kotoabe: bea te ne tukuage eia ae koji i he toafa.

23 Bea e ha‘u a Elone ki he fale fehikitaki oe fakataha, bea too hono gaahi kofu tubenu hinehina, aia naa ne ai i he ene alu ki he botu maonioni, bea te ne tuku ia i ai:

24 Bea te ne kaukau eia hono jino aki ae vai i he botu maonioni, bea ai hono kofu, bea alu atu, bea te ne atu ae feilaulau tutu aana, moe feilaulau tutu ae kakai, o ne fai ae fakalelei maana, bea moe kakai.

25 Bea koe gako oe feilaulau ma ae agahala e tutu eia ia ki he feilaulauaga.

26 Bea koia naa ne tukuage ae koji koe koji fetuku e fo eia hono kofu, bea kaukau hono jino i he vai, bea hili ia, e ha‘u ia ki he abitaga.

27 Bea koe bulu ki he feilaulau ma ae agahala, moe koji ki he feilaulau ma ae agahala, aia nae omi hono toto ke fai aki ae fakalelei i he botu maonioni, e fetuku ia kituaa i he abitaga: bea e tutu i he afi ho na kili, mo ho na jino, bea mo ho na tae.

28 Bea koia oku fai a hono tutu e fo eia hono kofu, bea kaukau hono jino i he vai, bea toki ha‘u ia ki he abitaga.

¶ 29 Bea koe fekau tuu mau eni kiate kimoutolu o taegata: koeuhi i hono fitu oe mahina, i hono hogofulu  oe aho oe mahina ke mou fakavaivai akimoutolu, bea oua naa fai ha momoi gaue, be ko ha toko taha o ho mou fonua be ko ha toko taha oku aunofo iate kimoutolu.

30 Koeuhi e fai e he taulaeiki ke fakalelei ma amoutolu, ke fakamaa akimoutolu, koeuhi ke mou maa mei hoo mou gaahi agahala i he ao o Jihova.

31 E iate kimoutolu ia koe sabate mālōlō, bea te mou fakavaivai akimoutolu, koe fekau ia fai mau o taegata.

32 Bea koe taulaeiki koia aia kuo ne fakanofo, mo ne fakatabu‘i eia ke gaue i he gaue fakataulaeiki o fetogi ene tamai, e fai eia ae fakalelei, bea e ai eia ae gaahi kofu tubenu hinehina, io, ae gaahi kofu maonioni:

33 Bea e fai eia ae fakalelei koeuhi koe botu tabu lahi, bea fai eia ae fakalelei koeuhi koe fale fehikitaki oe fakataha, bea koeuhi koe feilaulauaga, bea e fai eia ae fakalelei ma ae gaahi taulaeiki, bea koeuhi koe kakai kotoabe oe fakataha.

34 Bea koe fekau fai mau eni o taegata kiate kimoutolu, ke fai ae fakalelei ma ae fānau a Isileli o tuo taha i he ta‘u koeuhi koe nau gaahi agahala. Bea naa ne fai ia o hage koe fekau a Jihova kia Mosese.