अब्राहामको पुस्तक

१ कल्दीहरूको देशमा, मेरा पिता-पुर्खाहरूको निवासमा, म, अब्राहामले मेरा लागि बसोबास गर्ने अर्को निवासस्थान प्राप्त गर्नु आवश्यक थियो भनेर मैले महसुस गरेँ;

२ अनि त्यहाँ मेरा लागि अझै महान् खुसी र शान्ति र विश्राम भएकाले, मैले पिता-पुर्खाहरूको आशीर्वादका लागि खोजी गरेँ र मलाई त्यसैको प्रबन्ध गर्न नियुक्त गरिनु पर्ने अधिकारको खोजी गरेँ; म आफैँ धार्मिकताको अनुयायी भएकाले, महान् ज्ञान प्राप्त गर्ने र धार्मिकताको महान् अनुयायी बन्ने चाहना राखेकाले पनि र महान् ज्ञान प्राप्त गर्नका लागि र धेरै राष्ट्रहरूका पिता, शान्तिका राजकुमार र निर्देशनहरू प्राप्त गर्ने र परमेश्वरका आज्ञाहरू पालना गर्ने चाहना गरेर, पिता-पुर्खाहरूको अधिकार बहन गरेर, म सही उत्तराधिकारी, उच्च पादरी बनेँ ।

३ यो मलाई पिता-पुर्खाहरूद्वारा प्रदान गरिएको थियो; यो पिता-पुर्खाहरूबाट समयको प्रारम्भदेखि मकहाँ आएको थियो, हो, प्रारम्भदेखि वा संसारको सृष्टि हुनुपूर्वदेखि, वर्तमान समयसम्म, पिता-पुर्खाहरूबाट मकहाँ जेठाको अधिकारमा वा पहिलो मानिस वा प्रथम पिता, जो आदम हुन् ।

४ मैले परमेश्वरद्वारा सन्ततिका सम्बन्धमा पिता-पुर्खाहरूलाई गरिएको नियुक्तिअनुसार पादरित्वमा मेरो नियुक्तिका लागि मैले प्रयत्न गरेँ ।

५ मेरा पिता-पुर्खाहरूले, तिनीहरूको धार्मिकता र परमप्रभु तिनीहरूका परमेश्वरले तिनीहरूलाई दिनुभएका पवित्र आज्ञाहरूबाट फर्केको हुनाले, विधर्मीका देवताहरूको आराधना गर्न, मेरो आवाज सुन्न पूर्ण रूपमा अस्वीकार गरेँ;

६ किनकि तिनीहरूका हृदयहरू दुष्ट कार्य गर्न चाहन्थे र तिनीहरू पूर्णतया एल्केनाहका देवता र लिब्नाका देवता र मह्मक्राहका देवता र कोराशका देवता र मिश्रदेशका राजा फारोका देवतातर्फ फर्किएका थिए;

७ त्यसकारण तिनीहरूले यी मौन मूर्तिहरूसामु विधर्मीहरूले जस्तै आफ्ना छोराछोरीहरूलाई बलिदानमा अर्पण गर्नका लागि आफ्नो हृदय पूर्णरूपमा फर्काए र मेरा आवाज सुनेनन् तर एल्केनाहका पादरीको हातबाट मेरो ज्यान लिने प्रयास गरे । एल्केनाहका पादरी फारोका पादरी पनि थिए ।

८ अब, यस समयमा, कल्दियाको भूमिमा बनाइएका यी अनौठा देवताहरूमा पुरुषहरू, स्त्रीहरू र बालबालिकाहरूलाई वेदीमा अर्पण गर्नु मिश्रदेशका राजा, फारोका पादरीको प्रथा थियो ।

९ अनि यस्तो हुन गयो कि ती पादरीले फारोका देवतालाई र शाग्रीलका देवतालाई पनि मिश्रीहरूको तरिकाअनुसार अर्पण गरे । अब शाग्रीलको परमेश्वर सूर्य थियो ।

१० ओलिशेमको मैदानको सुरूमा रहेको पोतिफरको डाँडा भनिने डाँडामा अवस्थित वेदीमा फारोका पादरीले एक बालकको धन्यवाद बलि पनि अर्पण गरे ।

११ अब, यी पादरीले यस वेदीमा एकै समयमा तीन कन्याहरू अर्पण गरेका थिए, जो ओनीताहका छोरीहरू थिए, जो सिधै हामको शाही वंशजबाट थिए । यी कन्याहरूलाई तिनीहरूका सद्गुणका कारणले अर्पण गरिएको थियो; तिनीहरू काठ वा ढुङ्गाका देवताहरूको आराधना गर्न शिर झुकाउँदैनथे, त्यसकारण तिनीहरूको यस वेदीमा वध गरियो र यो मिश्रीहरूको तरिकाअनुसार गरियो ।

१२ अनि यस्तो हुन गयो कि पादरीहरूले ममाथि हिंसा गरे ताकि उनीहरूले मलाई पनि मार्न सक्छन्, जसरी उनीहरूले ती कन्याहरूलाई यस वेदीमा गरेका थिए; अनि ताकि तपाईंहरूलाई यो वेदीको ज्ञान हुन सक्छ, म तपाईंहरूलाई यो अभिलेखको प्रारम्भमा भएको चित्रणको सन्दर्भ गर्ने छु ।

१३ यो पलङ्गको आकारमा बनाइएको थियो, जस्तो आकार कल्दीहरूमाझ हुन्थ्यो र यो एल्केनाह, लिब्नाह, मह्मक्राह, कोराशका देवदेवताहरू र मिश्रका राजा फारोको जस्तै देवताको अगाडि खडा थियो ।

१४ ताकि तपाईंलाई यी देवताहरूका सम्बन्धमा ज्ञान हुन सक्छ भनेर, मैले तपाईंलाई प्रारम्भमा ती आकृतिहरूमा तिनीहरूको चित्रण दिएको छु, जस प्रकारको चित्रणहरू कल्दी रहलीनोसहरूद्वारा बोलाइन्छ, जसले प्राचीन मिश्री लिपिलाई बुझाउँछ ।

१५ अनि जब तिनीहरूले मलाई अर्पण गर्न र मेरो जीवन लिन सक्छन् भनेर ममाथि आफ्ना हातहरू अघि बढाए, हेर, मैले परमप्रभु मेरा परमेश्वरलाई मेरो आवाज उठाएँ र परमप्रभुले सुन्नुभयो र सूचित बन्नुभयो र उहाँले मलाई सर्वशक्तिमानको दर्शनले भरिदिनुभयो र उहाँको उपस्थितिको स्वर्गदूत मेरो छेउमा उभिए र तत्कालै मेरा डोरीहरू खोलिदिए;

१६ अनि उहाँको वाणी ममा आयो: अब्राहाम, अब्राहाम, हेर, मेरो नाम यहोवा हो र मैले तिमीलाई सुनेको छु र तिमीलाई छुटकारा दिन र तिम्रा पिताको गृहबाट र तिम्रा सबै आफन्तहरूबाट, तिमीलाई जानकारी नभएको एक अज्ञात भूमिमा लैजान तल आएको छु;

१७ अनि यसो हो किनकि तिनीहरूले तिनीहरूका हृदय मबाट टाढा राखेका छन्, एल्केनाहका देवता अनि लिब्नाका देवता अनि मह्मक्राहका देवता अनि कोराशका देवता अनि मिश्रदेशका राजा फारोका देवतालाई आराधना गर्नका लागि; त्यसकारण मेरा पुत्र अब्राहाम तिनीहरूलाई भेट्न र तिम्रो ज्यान लिनका लागि तिम्रा विरुद्धमा हात उठाउनेलाई नष्ट गर्न म तल आएको हुँ ।

१८ हेर, म तिमीलाई मेरो हातले अगुवाइ गर्ने छु र म तिमीलाई मेरो नाम, तिम्रो पिताको पादरित्व तिमीमा राख्न तिमीलाई लिने छु र मेरो शक्ति तिमीमाथि हुने छ ।

१९ जसरी यो नोआसँग भएको थियो त्यसैगरी यो तिमीसँग हुने छ; परन्तु तिम्रो परोपकारद्वारा मेरो नाम पृथ्वीमा सदासर्वदा परिचित हुन्छ, किनकि म तिम्रो परमेश्वर हुँ ।

२० हेर, पोतिफरको डाँडा कल्दियाको ऊरको भूमिमा थियो । अनि परमप्रभुले एल्केनाह र त्यस भूमिका देवताहरूको वेदी भत्काउनुभयो र तिनीहरूलाई पूर्ण रूपमा विनाश गर्नुभयो र पादरीलाई प्रहार गर्नुभयो कि उनी मरे; अनि कल्दिया र फारोको दरबारमा पनि ठूलो शोक मनाइयो; जुन फारोको अर्थ शाही वंशको राजा हो ।

२१ अब मिश्रदेशका यी राजा हामको वंशजबाट आएका थिए र जन्मजात कनानीहरूको वंशका थिए ।

२२ यस वंशबाट सबै मिश्रीहरू अस्तित्वमा आए र यसरी कनानीहरूका वंशको यस भूमिमा संरक्षण गरियो ।

२३ मिश्रदेशको भूमि पहिलो पटक एउटी महिलाद्वारा पत्ता लगाइएको थियो, जो हामकी छोरी थिइन् र मिश्रदेशकी छोरी थिइन्, जसले कल्दियनमा मिश्रदेशलाई जनाउँछ, जसले निषेध गरिएको भन्ने विषयलाई जनाउँछ;

२४ जब यी महिलाले त्यो भूमि पत्ता लगाइन्, त्यो पानीमुनि रहेको थियो, जसले पछि आफ्ना छोराहरूलाई त्यहाँ बसाइदिइन्; र यसरी, हामबाट, त्यो जाति फैलियो जसले त्यस भूमिकोश्रापलाई संरक्षण गर्यो ।

२५ अब मिश्रदेशको पहिलो सरकार हामकी छोरी मिश्रदेशको जेठो छोरा फारोद्वारा स्थापित् भएको थियो र यो हामको सरकारको तरिकाअनुसार थियो, जुन पितृसत्तात्मक थियो ।

२६ धर्मी मानिस भएकाले फारोले आफ्नो राज्य स्थापना गरे र तिनका सबै दिनहरूमा आफ्ना मानिसहरूलाई बुद्धिमानी र न्यायपूर्वक न्याय गरे, पहिलो पुस्ताहरूले स्थापित गरेको रीतको अनुकरण गर्न दृढतापूर्वक खोज्दै, पहिलो पितृसत्तात्मक शासनका दिनहरूमा, यहाँसम्म कि आदमको शासनकालमा, र उनका पिता नोआ पनि जसले उनलाई पृथ्वीका आशीर्वादहरू र बुद्धिका आशीर्वादहरू दिए परन्तु उनलाई पादरीको विषयमा श्राप दिए ।

२७ अब, फारो त्यो वंशका भएकाले त्यसद्वारा उनले पादरीको अधिकार प्राप्त गर्न सकेनन्, यद्यपि फारोहरूले नोआबाट, हाम मार्फत् स्वेच्छाले अधिकार दावी गर्न छनोट गरे, त्यसकारण मेरा पितालाई तिनीहरूको मूर्तिपूजाद्वारा अधीनमा पारियो;

२८ परन्तु म यस पछि, सृष्टिको सुरुवातमा आँफैबाट फिर्ता चलिरहेको कालक्रमलाई चित्रण गर्न प्रयास गर्ने छु, किनकि ती अभिलेखहरू मेरो हातमा आइसकेका छन्, जुन मैले वर्तमान समयसम्म राखेको छु ।

२९ अब, एल्केनाहका पादरीलाई प्रहार गरिएपछि उनको मृत्यु भयो, त्यहाँ जुन मलाई कल्दियाको भूमिका सम्बन्धमा भनिएको थियो ती विषयहरूको सम्बन्धमा परिपूर्ति भयो, कि त्यस भूमिमा अनिकाल आउनु पर्छ ।

३० तदनुसार, कल्दियाको सम्पूर्ण भूमिमा अनिकाल व्याप्त भयो र मेरो पितालाई अनिकालको कारणले गम्भीर रूपमा सताइयो अनि उहाँले मेरो विरुद्धमा योजना गरेर मेरो ज्यान लिने जस्तो दुष्टताबाट पश्चात्ताप गर्नुभयो ।

३१ परन्तु पादरित्वको अधिकारको सम्बन्धमा कूलपिताहरू सहित ती पितापुर्खाहरूका अभिलेखहरू, मेरा परमप्रभु परमेश्वरले मेरो आफ्नै हातमा सुरक्षित राख्नुभएको छ; त्यसकारण सृष्टिको आरम्भको ज्ञान र ग्रहहरू र ताराहरूको पनि ज्ञान, जसरी तिनीहरू पितापुर्खाहरूलाई थाहा दिइएको थियो, मैले आजसम्म पनि राखेको छु र मेरो पछि आउने मेरो वंशको लाभका लागि म यी मध्ये केही विषयहरू यो अभिलेखमा लेख्ने प्रयास गर्ने छु ।