ໜັງສືອັບຣາຮາມ
ແປຈາກແຜ່ນໃບລານພະພາຍຣັສ, ໂດຍໂຈເຊັບ ສະມິດ
ການແປບັນທຶກບູຮານບາງສ່ວນທີ່ຕົກຢູ່ໃນມືຂອງພວກເຮົາທີ່ໄດ້ມາຈາກຫ້ອງຝັງສົບໃຕ້ດິນຂອງເອຢິບ. ການຂຽນຂອງອັບຣາຮາມໃນຂະນະທີ່ເພິ່ນຢູ່ໃນເອຢິບ, ຖືກເອີ້ນວ່າໜັງສືອັບຣາຮາມ, ຂຽນໂດຍມືຂອງເພິ່ນເອງ, ຢູ່ໃນແຜ່ນໃບລານພະພາຍຣັສ.
ບົດທີ 1
ອັບຣາຮາມສະແຫວງຫາພອນຂອງລະບຽບແຫ່ງປິຕຸ—ເພິ່ນຖືກປະໂລຫິດປອມແຫ່ງເຄນເດຍຂົ່ມເຫັງ—ພຣະເຢໂຮວາຊ່ວຍເພິ່ນໃຫ້ລອດ—ຕົ້ນກຳເນີດ ແລະ ການປົກຄອງຂອງເອຢິບຖືກອະທິບາຍ.
1 ໃນແຜ່ນດິນຂອງຊາວ ເຄນເດຍ, ໃນຖິ່ນຖານຂອງບັນພະບຸລຸດຂອງຂ້າພະເຈົ້າ, ຂ້າພະເຈົ້າ, ອັບຣາຮາມ, ເຫັນໄດ້ວ່າຈຳເປັນສຳລັບຂ້າພະເຈົ້າທີ່ຈະຫາ ຖິ່ນຖານໃໝ່;
2 ແລະ, ໂດຍທີ່ພົບວ່າມີ ຄວາມສຸກ ແລະ ຄວາມສະຫງົບ ແລະ ການພັກຜ່ອນຫລາຍຂຶ້ນສຳລັບຂ້າພະເຈົ້າ, ຂ້າພະເຈົ້າຈຶ່ງໄດ້ສະແຫວງຫາພອນຂອງບັນພະບຸລຸດ, ແລະ ສິດທິຊຶ່ງຂ້າພະເຈົ້າຄວນຈະໄດ້ຮັບການແຕ່ງຕັ້ງເພື່ອປະຕິບັດພອນດັ່ງກ່າວ; ໂດຍທີ່ຂ້າພະເຈົ້າເປັນຜູ້ຕິດຕາມ ຄວາມຊອບທຳ, ປາດຖະໜາເປັນຜູ້ໜຶ່ງທີ່ມີ ຄວາມຮູ້ຫລາຍນຳອີກ, ແລະ ເປັນຜູ້ຕິດຕາມຄວາມຊອບທຳຫລາຍຂຶ້ນ, ແລະ ໄດ້ຮັບຄວາມຮູ້ຫລາຍຂຶ້ນ, ແລະ ເປັນບິດາຂອງຫລາຍປະຊາຊາດ, ເປັນເຈົ້າສັນຕິລາດ, ແລະ ປາດຖະໜາທີ່ຈະໄດ້ຮັບຄຳແນະນຳ, ແລະ ຮັກສາພຣະບັນຍັດຂອງພຣະເຈົ້າ, ຂ້າພະເຈົ້າໄດ້ກາຍເປັນຜູ້ຮັບມູນມໍລະດົກທີ່ຖືກຕ້ອງ, ມະຫາປະໂລຫິດ, ໂດຍຖື ສິດຊຶ່ງເປັນຂອງບັນພະບຸລຸດ.
3 ມັນໄດ້ຖືກ ມອບໃຫ້ຂ້າພະເຈົ້າຈາກບັນພະບຸລຸດ; ສືບທອດມາຈາກບັນພະບຸລຸດ, ຕັ້ງແຕ່ຕົ້ນຂອງເວລາ, ແທ້ຈິງແລ້ວ, ແມ່ນແຕ່ຕັ້ງແຕ່ຕົ້ນ, ຫລື ກ່ອນການວາງຮາກຖານຂອງແຜ່ນດິນໂລກ, ລົງມາເຖິງເວລາປະຈຸບັນ, ແມ່ນແຕ່ສິດຂອງ ລູກກົກ, ຫລື ມະນຸດຄົນທຳອິດ, ຜູ້ຄື ອາດາມ, ຫລື ບິດາຄົນທຳອິດ, ຜ່ານທາງບັນພະບຸລຸດຈົນເຖິງຂ້າພະເຈົ້າ.
4 ຂ້າພະເຈົ້າໄດ້ສະແຫວງຫາ ການມອບໝາຍສູ່ຖານະປະໂລຫິດຕາມການມອບໝາຍຂອງພຣະເຈົ້າໃຫ້ແກ່ບັນພະບຸລຸດກ່ຽວກັບເຊື້ອສາຍ.
5 ບັນພະບຸລຸດຂອງຂ້າພະເຈົ້າ, ໂດຍທີ່ຫັນໜີໄປຈາກຄວາມຊອບທຳ, ແລະ ຈາກພຣະບັນຍັດທີ່ສັກສິດ ຊຶ່ງພຣະຜູ້ເປັນເຈົ້າອົງເປັນພຣະເຈົ້າຂອງພວກເຂົາໄດ້ມອບໃຫ້ແກ່ພວກເຂົາ, ກັບໄປ ນະມັດສະການພຣະເຈົ້າຂອງຄົນນອກສາດສະໜາ, ໄດ້ປະຕິເສດຢ່າງເດັດຂາດທີ່ຈະເຊື່ອຟັງສຽງຂອງຂ້າພະເຈົ້າ;
6 ເພາະວ່າຫົວໃຈຂອງພວກເຂົາຕັ້ງໃຈທີ່ຈະເຮັດຄວາມຊົ່ວ, ແລະ ຫັນໄປສູ່ ພຣະເຈົ້າຂອງເອເຄນາ, ແລະ ພຣະເຈົ້າຂອງລິບນາ, ແລະ ພຣະເຈົ້າຂອງມາມັກຄຣາ, ແລະ ພຣະເຈົ້າຂອງໂຄແຣສ໌, ແລະ ພຣະເຈົ້າຂອງຟາໂຣ, ກະສັດແຫ່ງເອຢິບຈົນໝົດ;
7 ສະນັ້ນ ພວກເຂົາໄດ້ຫັນໃຈຂອງຕົນໄປສູ່ການຖວາຍເຄື່ອງບູຊາຂອງຄົນນອກສາດສະໜາໃນການຖວາຍລູກຫລານຂອງພວກເຂົາໃຫ້ແກ່ຮູບບູຊາທີ່ເວົ້າບໍ່ໄດ້, ແລະ ບໍ່ເຊື່ອຟັງສຽງຂອງຂ້າພະເຈົ້າ, ແຕ່ພະຍາຍາມເອົາຊີວິດຂອງຂ້າພະເຈົ້າໂດຍມືຂອງປະໂລຫິດຂອງເອເຄນາ. ປະໂລຫິດຂອງເອເຄນາກໍເປັນປະໂລຫິດຂອງຟາໂຣຄືກັນ.
8 ບັດນີ້, ໃນເວລານີ້ ເປັນປະເພນີຂອງປະໂລຫິດຂອງຟາໂຣ, ກະສັດແຫ່ງເອຢິບ, ທີ່ຈະຖວາຍຢູ່ເທິງແທ່ນບູຊາ ຊຶ່ງໄດ້ສ້າງຢູ່ໃນແຜ່ນດິນຂອງເຄນເດຍ, ເພື່ອຖວາຍຜູ້ຊາຍ, ຜູ້ຍິງ, ແລະ ເດັກນ້ອຍໃຫ້ແກ່ພຣະເຈົ້າຈາກຕ່າງແດນເຫລົ່ານີ້.
9 ແລະ ເຫດການໄດ້ບັງເກີດຂຶ້ນຄື ປະໂລຫິດໄດ້ຖວາຍໃຫ້ແກ່ພຣະເຈົ້າຂອງຟາໂຣ, ແລະ ໃຫ້ແກ່ພຣະເຈົ້າຂອງຊາກະຣີນຳອີກ, ແມ່ນແຕ່ຕາມວິທີຂອງຊາວເອຢິບ. ບັດນີ້ ພຣະເຈົ້າຂອງຊາກະຣີຄືດວງຕາເວັນ.
10 ແມ່ນແຕ່ການຖວາຍຂອບພຣະໄທດ້ວຍເດັກ ປະໂລຫິດຂອງຟາໂຣກໍໄດ້ຖວາຍຢູ່ເທິງແທ່ນບູຊາ ຊຶ່ງຕັ້ງຢູ່ໂນນພູທີ່ເອີ້ນວ່າ ໂນນພູໂປຕີຟາ, ຢູ່ຕົ້ນທົ່ງພຽງໂອລິເຊມ.
11 ບັດນີ້, ປະໂລຫິດຄົນນີ້ໄດ້ຖວາຍຜູ້ຍິງບໍລິສຸດສາມຄົນພ້ອມກັນຢູ່ເທິງແທ່ນບູຊາ, ຜູ້ເປັນລູກສາວຂອງໂອນິທາ, ຜູ້ເປັນເຊື້ອສາຍຈາກຜົນແອວຂອງ ຮາມ. ຜູ້ຍິງບໍລິສຸດເຫລົ່ານີ້ໄດ້ຖືກຖວາຍເພາະຄຸນນະທຳຂອງພວກນາງ; ພວກນາງບໍ່ໄດ້ ກົ້ມຂາບລົງນະມັດສະການພຣະເຈົ້າທີ່ເປັນໄມ້ ຫລື ຫີນ, ສະນັ້ນ ພວກນາງຈຶ່ງຖືກຂ້າຢູ່ເທິງແທ່ນບູຊາ, ແລະ ເປັນໄປຕາມວິທີຂອງຊາວເອຢິບ.
12 ແລະ ເຫດການໄດ້ບັງເກີດຂຶ້ນຄື ປະໂລຫິດໄດ້ເຮັດຄວາມຮຸນແຮງກັບຂ້າພະເຈົ້າ, ເພື່ອວ່າພວກເຂົາຈະໄດ້ຂ້າຂ້າພະເຈົ້າຄືກັນ, ດັ່ງທີ່ພວກເຂົາໄດ້ເຮັດກັບພວກຜູ້ຍິງບໍລິສຸດເຫລົ່ານັ້ນຢູ່ເທິງແທ່ນບູຊາ; ແລະ ເພື່ອວ່າທ່ານຈະມີຄວາມຮູ້ເຖິງແທ່ນບູຊານີ້, ຂ້າພະເຈົ້າຈະອ້າງກັບທ່ານເຖິງພາບໃນຕອນຕົ້ນຂອງບັນທຶກນີ້.
13 ມັນຖືກສ້າງຂຶ້ນຕາມແບບຕຽງນອນ, ດັ່ງທີ່ມີຢູ່ໃນບັນດາຊາວເຄນເດຍ, ແລະ ມັນຕັ້ງຢູ່ຕໍ່ໜ້າພຣະເຈົ້າຂອງເອເຄນາ, ລິບນາ, ມາມັກຄຣາ, ໂຄແຣສ໌, ແລະ ພຣະເຈົ້າທີ່ຄືກັນກັບຂອງຟາໂຣ, ກະສັດແຫ່ງເອຢິບ.
14 ເພື່ອວ່າທ່ານຈະມີຄວາມເຂົ້າໃຈເຖິງພຣະເຈົ້າເຫລົ່ານີ້, ຂ້າພະເຈົ້າຈຶ່ງໄດ້ໃຫ້ຮູບແບບໄວ້ແກ່ທ່ານໃນຕອນຕົ້ນ, ຊຶ່ງລັກສະນະຂອງຮູບເຫລົ່ານັ້ນຖືກຊາວເຄນເດຍເອີ້ນວ່າຣາລີໂນສ໌, ຊຶ່ງໝາຍເຖິງສັນຍາລັກເປັນຮູບພາບ.
15 ແລະ ໃນຂະນະທີ່ພວກເຂົາຍົກມືຂຶ້ນຈະມາຈັບຂ້າພະເຈົ້າ, ເພື່ອວ່າພວກເຂົາຈະໄດ້ຖວາຍຂ້າພະເຈົ້າ ແລະ ເອົາຊີວິດຂອງຂ້າພະເຈົ້າ, ຈົ່ງເບິ່ງ, ຂ້າພະເຈົ້າໄດ້ເປັ່ງສຽງຂອງຂ້າພະເຈົ້າທູນຕໍ່ພຣະຜູ້ເປັນເຈົ້າອົງເປັນພຣະເຈົ້າຂອງຂ້າພະເຈົ້າ, ແລະ ພຣະຜູ້ເປັນເຈົ້າໄດ້ ຮັບຟັງ ແລະ ໄດ້ຍິນ, ແລະ ພຣະອົງໄດ້ເຮັດໃຫ້ຂ້າພະເຈົ້າເຕັມໄປດ້ວຍພາບນິມິດທີ່ມາຈາກຜູ້ຊົງລິດອຳນາດຍິ່ງໃຫຍ່, ແລະ ທູດທີ່ປະທັບຢູ່ຂອງພຣະອົງໄດ້ມາຢືນຢູ່ທາງຂ້າງຂອງຂ້າພະເຈົ້າ, ແລະ ໄດ້ ແກ້ສາຍຮັດຂ້າພະເຈົ້າທັນທີ;
16 ແລະ ສຸລະສຽງຂອງພຣະອົງໄດ້ມາເຖິງຂ້າພະເຈົ້າ: ອັບຣາຮາມ, ອັບຣາຮາມ, ຈົ່ງເບິ່ງ, ນາມຂອງເຮົາຄື ເຢໂຮວາ, ແລະ ເຮົາໄດ້ຍິນເຈົ້າ, ແລະ ໄດ້ລົງມາປົດປ່ອຍເຈົ້າ, ແລະ ພາເຈົ້າໄປຈາກບ້ານຂອງບິດາຂອງເຈົ້າ, ແລະ ຈາກຍາດພີ່ນ້ອງທັງໝົດຂອງເຈົ້າ, ໄປສູ່ຕ່າງ ແດນຊຶ່ງເຈົ້າບໍ່ຮູ້ຈັກ;
17 ແລະ ນີ້ເພາະວ່າພວກເຂົາໄດ້ຫັນຫົວໃຈຂອງພວກເຂົາໄປຈາກເຮົາ, ເພື່ອນະມັດສະການພຣະເຈົ້າຂອງເອເຄນາ, ແລະ ພຣະເຈົ້າຂອງລິບນາ, ແລະ ພຣະເຈົ້າຂອງມາມັກຄຣາ, ແລະ ພຣະເຈົ້າຂອງໂຄແຣສ໌, ແລະ ພຣະເຈົ້າຂອງຟາໂຣ, ກະສັດແຫ່ງເອຢິບ; ສະນັ້ນ ເຮົາຈຶ່ງໄດ້ລົງມາຢ້ຽມຢາມພວກເຂົາ, ແລະ ທຳລາຍຄົນທີ່ຍົກມືຂອງພວກເຂົາຂຶ້ນຕໍ່ຕ້ານເຈົ້າ, ອັບຣາຮາມ, ບຸດຂອງເຮົາ, ເພື່ອເອົາຊີວິດຂອງເຈົ້າ.
18 ຈົ່ງເບິ່ງ, ເຮົາຈະຈູງເຈົ້າໄປດ້ວຍມືຂອງເຮົາ, ແລະ ເຮົາຈະພາເຈົ້າໄປ, ເພື່ອມອບນາມຂອງເຮົາໄວ້ກັບເຈົ້າ, ແມ່ນແຕ່ ຖານະປະໂລຫິດຂອງບິດາຂອງເຈົ້າ, ແລະ ອຳນາດຂອງເຮົາຈະຢູ່ເໜືອເຈົ້າ.
19 ດັ່ງທີ່ໄດ້ເປັນກັບໂນອາສັນໃດ ມັນກໍຈະເປັນກັບເຈົ້າສັນນັ້ນ; ແຕ່ຜ່ານການປະຕິບັດສາດສະໜາກິດຂອງເຈົ້າ ນາມຂອງເຮົາຈະເປັນທີ່ຮູ້ຈັກໃນແຜ່ນດິນໂລກຕະຫລອດການ, ເພາະວ່າເຮົາຄືພຣະເຈົ້າຂອງເຈົ້າ.
20 ຈົ່ງເບິ່ງ, ໂນນພູໂປຕີຟາຢູ່ໃນແຜ່ນດິນ ອູເຣ, ແຫ່ງເຄນເດຍ. ແລະ ພຣະຜູ້ເປັນເຈົ້າໄດ້ໂຄ່ນລົ້ມແທນບູຊາຂອງເອເຄນາ, ແລະ ຂອງພຣະເຈົ້າຕ່າງໆຂອງແຜ່ນດິນ, ແລະ ໄດ້ທຳລາຍມັນຈົນໝົດສິ້ນ, ແລະ ໄດ້ລົງທັນປະໂລຫິດຈົນວ່າລາວໄດ້ຕາຍໄປ; ແລະ ມີຄວາມເປັນທຸກຫລາຍຢູ່ໃນເຄນເດຍ, ແລະ ໃນວັງຂອງຟາໂຣນຳອີກ; ຊຶ່ງຟາໂຣໝາຍຄວາມວ່າກະສັດໂດຍສາຍເລືອດ.
21 ບັດນີ້ ກະສັດແຫ່ງເອຢິບຜູ້ນີ້ເປັນຜູ້ສືບຕະກຸນຈາກຜົນແອວຂອງ ຮາມ, ແລະ ເປັນສາຍເລືອດຂອງ ຊາວການາອານໂດຍກຳເນີດ.
22 ຈາກຕະກຸນນີ້ ຊາວເອຢິບທັງປວງຈຶ່ງມີມາ, ແລະ ສາຍເລືອດຂອງຊາວການາອານໄດ້ຖືກປົກປັກຮັກສາໄວ້ໃນແຜ່ນດິນດັ່ງນີ້.
23 ແຜ່ນດິນ ເອຢິບທຳອິດໄດ້ຖືກພົບເຫັນໂດຍຜູ້ຍິງຄົນໜຶ່ງ, ຜູ້ຊຶ່ງເປັນລູກສາວຂອງຮາມ, ແລະ ລູກສາວຂອງເອຢິບໂຕ, ຊຶ່ງໃນພາສາຂອງຊາວເຄນເດຍໝາຍເຖິງເອຢິບ, ຊຶ່ງໝາຍເຖິງສິ່ງຕ້ອງຫ້າມ;
24 ຕອນຜູ້ຍິງຄົນນີ້ພົບເຫັນແຜ່ນດິນ ມັນຢູ່ໃຕ້ນ້ຳ, ຜູ້ຊຶ່ງຕໍ່ມາໄດ້ຕັ້ງຖິ່ນຖານພວກລູກຊາຍຂອງນາງໃນນັ້ນ; ແລະ ດັ່ງນັ້ນ, ຈາກຮາມ, ເຊື້ອຊາດນັ້ນຈຶ່ງຮັກສາຄຳສາບແຊ່ງໄວ້ໃນແຜ່ນດິນ.
25 ບັດນີ້ ການປົກຄອງທຳອິດຂອງເອຢິບໄດ້ຖືກສະຖາປະນາຂຶ້ນໂດຍຟາໂຣ, ລູກຊາຍກົກຂອງເອຢິບໂຕ, ລູກສາວຂອງຮາມ, ແລະ ເປັນໄປຕາມວິທີການປົກຄອງຂອງຮາມ, ຊຶ່ງຄື ແບບປິຕຸ.
26 ຟາໂຣ, ໂດຍທີ່ເປັນຄົນຊອບທຳ, ໄດ້ສະຖາປະນາອານາຈັກຂອງຕົນຂຶ້ນ ແລະ ຕັດສິນຜູ້ຄົນຂອງເພິ່ນຢ່າງສະຫລາດ ແລະ ທ່ຽງທຳຕະຫລອດວັນເວລາຂອງເພິ່ນ, ໂດຍສະແຫວງຫາຢ່າງພາກພຽນທີ່ຈະຮຽນແບບລະບຽບນັ້ນທີ່ຖືກສະຖາປະນາໄວ້ໂດຍບັນພະບຸລຸດໃນລຸ້ນທຳອິດ, ໃນວັນເວລາຂອງການປົກຄອງແບບປິຕຸໃນສະໄໝທຳອິດ, ແມ່ນແຕ່ໃນການປົກຄອງຂອງອາດາມ, ແລະ ຂອງໂນອານຳອີກ, ບິດາຂອງເພິ່ນນຳອີກ, ຜູ້ໄດ້ອວຍພອນເພິ່ນດ້ວຍ ພອນຂອງແຜ່ນດິນໂລກ, ແລະ ດ້ວຍພອນແຫ່ງປັນຍາ, ແຕ່ໄດ້ສາບແຊ່ງເພິ່ນກ່ຽວກັບຖານະປະໂລຫິດ.
27 ບັດນີ້, ຟາໂຣໂດຍທີ່ເປັນຂອງທາຍາດນີ້ ຈຶ່ງບໍ່ສາມາດມີສິດຂອງ ຖານະປະໂລຫິດ, ທັງໆທີ່ບັນດາຟາໂຣຢາກຈະອ້າງສິດນີ້ດ້ວຍຄວາມເຕັມໃຈຈາກໂນອາກໍຕາມ, ໂດຍຜ່ານຮາມ, ສະນັ້ນ ບິດາຂອງຂ້າພະເຈົ້າຈຶ່ງໄດ້ຖືກພາໄປຫລົງຜິດໂດຍການນັບຖືຮູບບູຊາຂອງພວກເຂົາ;
28 ແຕ່ຂ້າພະເຈົ້າຈະພະຍາຍາມ, ໃນພາຍຫລັງ, ເພື່ອໃຫ້ເລື່ອງລາວກ່ຽວກັບເຫດການທີ່ໄດ້ເກີດຂຶ້ນຈາກຕົວຂອງຂ້າພະເຈົ້າເອງຢ້ອນກັບໄປເຖິງການເລີ່ມຕົ້ນຂອງການສ້າງ, ເພາະ ບັນທຶກໄດ້ມາເຖິງມືຂອງຂ້າພະເຈົ້າ, ຊຶ່ງຂ້າພະເຈົ້າມີຢູ່ໃນປະຈຸບັນນີ້.
29 ບັດນີ້, ຫລັງຈາກພວກປະໂລຫິດຂອງເອເຄນາໄດ້ຖືກລົງທັນຈົນເຖິງແກ່ຄວາມຕາຍ, ສິ່ງທີ່ໄດ້ກ່າວໄວ້ກັບຂ້າພະເຈົ້າຈຶ່ງໄດ້ສຳເລັດຄົບຖ້ວນກ່ຽວກັບແຜ່ນດິນເຄນເດຍ, ວ່າຈະມີຄວາມອຶດຢາກໃນແຜ່ນດິນ.
30 ຄວາມອຶດຢາກໄດ້ເກີດຂຶ້ນຕະຫລອດທົ່ວແຜ່ນດິນເຄນເດຍດັ່ງນີ້, ແລະ ບິດາຂອງຂ້າພະເຈົ້າໄດ້ຮັບທຸກທໍລະມານແສນສາຫັດເພາະຄວາມອຶດຢາກ, ແລະ ເພິ່ນໄດ້ກັບໃຈຈາກຄວາມຊົ່ວ ຊຶ່ງເພິ່ນໄດ້ຕັ້ງໃຈຕໍ່ຕ້ານຂ້າພະເຈົ້າ, ເພື່ອເອົາ ຊີວິດຂອງຂ້າພະເຈົ້າ.
31 ແຕ່ບັນທຶກຂອງບັນພະບຸລຸດ, ແມ່ນແຕ່ປິຕຸ, ກ່ຽວກັບສິດຂອງຖານະປະໂລຫິດ, ພຣະຜູ້ເປັນເຈົ້າອົງເປັນພຣະເຈົ້າຂອງຂ້າພະເຈົ້າໄດ້ປົກປັກຮັກສາໄວ້ໃນມືຂອງຂ້າພະເຈົ້າເອງ; ສະນັ້ນຄວາມຮູ້ເລື່ອງການເລີ່ມຕົ້ນຂອງການສ້າງ, ແລະ ເລື່ອງ ດາວພະເຄາະທັງຫລາຍນຳອີກ, ແລະ ເລື່ອງດວງດາວ, ດັ່ງທີ່ມັນໄດ້ຖືກເຮັດໃຫ້ເປັນທີ່ຮູ້ຈັກແກ່ບັນພະບຸລຸດ, ໄດ້ຖືກຮັກສາໄວ້ແມ່ນແຕ່ຈົນເຖິງວັນນີ້, ແລະ ຂ້າພະເຈົ້າຈະພະຍາຍາມຂຽນບາງເລື່ອງຈາກສິ່ງເຫລົ່ານີ້ໄວ້ໃນບັນທຶກນີ້, ເພື່ອຜົນປະໂຫຍດຂອງລູກຫລານທີ່ຈະເກີດມາຫລັງຈາກຂ້າພະເຈົ້າ.