1 Thiab kuv, Anplaham, muaj lub Ulees thiab Thumees, uas tus Tswv uas yog Vajtswv tau muab rau kuv, nyob tim Ules hauv teb chaws Khadees;

2 Thiab kuv tau pom tej hnub qub, pom tias tej hnub qub ci kawg li, thiab tias muaj ib lub ntawd nyob ze dua rau ntawm Vajtswv lub rooj theej kiab; thiab muaj ntau lub uas ci kawg nyob ze ntawd;

3 Thiab tus Tswv hais rau kuv tias: Cov no yog cov uas tswj hwm; thiab lub uas ci kawg lub npe hu ua Kaulaus, vim lub no nyob ze kuv, vim kuv yog tus Tswv koj tus Vajtswv: Kuv tau tso lub no los tswj hwm tag nrho cov uas nyob tib koog ua ke nrog lub uas koj tab tom sawv rau.

4 Thiab tus Tswv hais rau kuv tias, los ntawm lub Ulees thiab Thumees, hais tias Kaulaus mus raws li tus Tswv txoj kev, raws li Kaulaus lub sij hawm thiab caij nyoog ntawm Kaulaus txoj kev tig mus los, hais tias ib lwm yog ib hnub rau tus Tswv, raws li nws txoj kev suav sij hawm, ces muaj ib txhiab xyoo raws li sij hawm tau teem rau lub koj sawv rau. Qhov no yog kev suav caij suav nyoog ntawm tus Tswv, raws li kev suav caij suav nyoog ntawm Kaulaus.

5 Thiab tus Tswv hais rau kuv tias: Lub ntiaj teb uas ci tsawg zog, ci tsawg zog lub uas kav nruab hnub, twb ci tsawg zog lub uas kav hmo ntuj, hais txog kev suav caij suav nyoog yeej siab dua los sis loj dua lub uas koj sawv rau, vim lub ntiaj teb ntawd txav raws theem qeeb zog; qhov no yog raws li txheej txheem vim lub ntiaj teb ntawd nyob siab dua lub ntiaj teb uas koj sawv rau, yog li ntawd txoj kev suav caij suav nyoog ntawm lub ntawd los tsis muaj pes tsawg hais txog qhov uas muaj pes tsawg hnub, thiab pes tsawg hli, thiab pes tsawg xyoo.

6 Thiab tus Tswv hais rau kuv tias: Nim no, Anplaham, muaj ob qho uas muaj tseeb, saib seb koj qhov muag twb pom; twb cia koj paub suav caij suav nyoog, thiab lub sij hawm uas teem tseg, muaj tseeb tiag, lub sij hawm uas teem tseg rau lub ntiaj teb uas koj sawv rau, thiab lub sij hawm uas teem tseg rau lub teeb ci tshaj uas teem los kav nruab hnub, thiab lub sij hawm uas teem tseg rau lub teeb ci tsawg zog uas teem los kav hmo ntuj.

7 Nim no lub sij hawm uas teem tseg rau lub teeb ci tsawg zog yeej suav caij suav nyoog ntev dua li txoj kev suav caij suav nyoog ntawm lub ntiaj teb uas koj sawv rau.

8 Thiab yog muaj ob qho uas muaj tseeb no, ces yeej muaj lwm qhov uas muaj tseeb nyob siab dua ob qho no thiab, qhov ntawd yog hais tias, yeej muaj dua lwm lub ntiaj teb uas yuav muaj txoj kev suav caij suav nyoog ntev zog thiab;

9 Thiab yog li ntawd yuav muaj kev suav caij suav nyoog rau ib lub ntiaj teb ntev dua ib lub, kom txog thaum koj los ze rau Kaulaus, vim Kaulaus txoj kev suav caij suav nyoog yog raws li tus Tswv txoj kev suav caij suav nyoog; lub Kaulaus uas nyob ze ntawm Vajtswv lub rooj theej kiab, los tswj hwm tag nrho cov ntiaj teb uas nyob tib koog ua ke nrog lub uas koj tab tom sawv rau.

10 Thiab twb cia koj paub tej sij hawm uas teem tseg ntawm txhua lub hnub qub uas teem kom ci, kom txog thaum koj los ze rau ntawm Vajtswv lub rooj theej kiab tso.

11 Kuv, Anplaham, tham nrog tus Tswv tim ntsej tim muag li no, ib yam li ib tug neeg tham nrog lwm tus; thiab nws tau qhia rau kuv txog tej hauj lwm uas nws ob txhais tes tau tsim;

12 Thiab nws tau hais rau kuv tias: Kuv tus tub, kuv tus tub (thiab nws xyab txhais tes tawm), saib seb kuv yuav muab tag nrho tej no rau koj saib. Thiab nws muab nws txhais tes tso saum kuv ob lub qhov muag, ces kuv txawm pom tej uas nws ob txhais tes tau tsim, uas ntau heev; thiab kuv ob lub qhov muag pom tej ntawd ntau zuj zus tuaj, thiab kuv twb tsis pom qhov kawg ntawm tej ntawd.

13 Thiab nws hais rau kuv tias: Lub no yog Sinehas, uas yog lub hnub. Thiab nws hais rau kuv tias: Kaukaus, uas yog hnub qub. Thiab nws hais rau kuv tias: Olias, uas yog lub hli. Thiab nws hais rau kuv tias: Kaukaunpis, uas txhais tias yog cov hnub qub, los yog tag nrho tej teeb ci kawg li, uas nyob saum lub ntuj ntsuab.

14 Thiab yog lub sij hawm tsaus ntuj thaum tus Tswv hais cov lus no rau kuv tias: Kuv yuav ua kom koj huaj vam coob, thiab koj cov tub ki tom qab koj, zoo li tej no; thiab yog koj muaj peev xwm suav tag tej xuab zeb, ces koj cov tub ki twb yuav coob li ntawd.

15 Thiab tus Tswv tau hais rau kuv tias: Anplaham, kuv muab tej no qhia rau koj ua ntej koj mus tim Iyiv teb chaws, kom koj yuav tshaj tawm tag nrho tej lus no.

16 Yog muaj ob qho, thiab ib qho nyob siab zog ib qho, ces yeej muaj tej uas tseem ceeb dua siab zog ob qho ntawd; yog li ntawd Kaulaus yog lub tseem ceeb tshaj plaws tag nrho tej Kaukaunpis uas koj tau pom, vim Kaulaus ze tshaj rau kuv.

17 Nim no, yog muaj ob qho, ib qho nyob siab zog ib qho, thiab lub hli nyob siab zog lub ntiaj teb, ces tej zaum twb muaj ib lub ntiaj teb los yog hnub qub nyob siab zog; thiab tsis muaj ib yam dab tsi uas tus Tswv koj tus Vajtswv yuav txiav txim siab ua tsuas yog yam uas nws yuav ua xwb.

18 Txawm li ntawd los nws tau tsim lub hnub qub uas ci dua ntais; ib yam li ntawd thiab, yog tias muaj ob tug ntsuj plig, thiab ib tug ntse dua ib tug los, ob tug ntsuj plig no, txawm hais tias ib tug ntse dua ib tug los, nkawd tsis muaj qhov pib; twb muaj nkawd nyob ua ntej, nkawd yuav tsis muaj qhov kawg, yuav muaj nkawd nyob tom qab ntawd mus, vim nkawd yog noloos, los yog nyob mus ib txhis.

19 Thiab tus Tswv hais rau kuv tias: Muaj ob qho uas muaj tseeb no, hais tias yog muaj ob tug ntsuj plig, ib tug ntse dua ib tug; yuav muaj dua ib tug uas ntse dua nkawd; kuv yog tus Tswv koj tus Vajtswv, kuv ntse tshaj lawv txhua tus.

20 Tus Tswv koj tus Vajtswv tau xa nws tus tim tswv los tso koj dim ntawm Elakenas tus pov thawj txhais tes.

21 Kuv nyob hauv nruab nrab ntawm lawv tag nrho; yog li ntawd, nim no kuv thiaj nqis los cuag koj los qhia rau koj txog tej hauj lwm uas kuv ob txhais tes tau tsim, uas qhia tias kuv laj lim tswv yim siab tshaj lawv txhua tus li, vim kuv kav nyob saum lub ntuj, thiab nyob hauv lub ntiaj teb, raws li txoj kev txawj ntse thiab kev muaj tswv yim tag nrho, muaj hwj chim tshaj txhua tus ntsuj plig uas koj qhov muag tau pom txij thaum chiv keeb los; thaum chiv keeb kuv tau nqis los nyob nrog tag nrho cov ntsuj plig uas koj tau pom.

22 Nim no tus Tswv tau ua rau kuv, Anplaham, pom cov ntsuj plig uas tau tsim ua ntej ntuj tsim teb raug; thiab nyob hauv tag nrho cov no twb muaj ntau tus uas tsim txiaj thiab muaj koob meej;

23 Thiab Vajtswv pom cov ntsuj plig no tias lawv zoo heev, thiab nws sawv hauv lawv nruab nrab, thiab nws hais tias: Kuv yuav muab cov no ua kuv cov thawj coj; vim nws sawv nrog cov uas yog ntsuj plig, thiab nws pom hais tias lawv zoo heev; thiab nws hais rau kuv tias: Anplaham, koj yog ib tug ntawm cov ntawd; kuv twb xaiv koj ua ntej koj yug los.

24 Thiab muaj ib tug sawv hauv lawv uas zoo li Vajtswv, thiab nws hais rau cov uas nrog nws tias: Peb yuav nqis mus, vim twb muaj chaw nyob haud, thiab peb yuav coj ib feem ntawm tej khoom no mus, thiab peb yuav tsim ib lub ntiaj teb rau cov neeg no mus nyob;

25 Thiab peb los ntawm qhov no peb yuav sim lawv lub siab, seb lawv puas yuav ua txhua tsav txhia yam uas tus Tswv lawv tus Vajtswv yuav txib kom lawv ua;

26 Thiab lawv cov uas coj raws li lawv lub neej theem ib yuav tau ntxiv; thiab lawv cov uas tsis coj raws li lawv lub neej theem ib yuav tsis tau yeeb koob nyob hauv tib lub nceeg vaj nrog cov uas coj raws li lawv lub neej theem ib; thiab lawv cov uas coj raws li lawv lub neej theem ob yuav tau yeeb koob ntxiv rau saum lawv lub taub hau mus ib txhiab thiab ib txhis.

27 Thiab tus Tswv hais tias: Kuv yuav txib leej twg mus? Thiab muaj ib tug zoo li Neeg Leej Tub teb hais tias: Kuv nyob ntawm no, txib kuv mus. Thiab muaj dua ib tug teb thiab hais tias: Kuv nyob ntawm no, txib kuv mus. Thiab tus Tswv hais tias: Kuv yuav txib tus thib ib.

28 Ces tus thib ob txawm npau taws, thiab tsis coj raws li nws lub neej theem ib; thiab, hnub ntawd, coob leej raws nws qab.