1 Kag dayon ang Ginuo nagsiling: Manaog kita. Kag nagpanaog sila sa ginsuguran, kag sila, nga mga Dios, nagpahamtang kag naghimo sang mga langit kag sang duta.

2 Kag ang duta, pagkatapos nga nahimo ini, wala sing sulod kag mamingaw, bangod wala sila sing may nahimo nga iban kundi ang duta; kag ang kadulom naghari sa nawong sang kadadalman, kag ang Espiritu sang mga Dios nagahulag sa nawong sang mga tubig.

3 Kag sila (nga mga Dios) nagsiling: Magluntad ang kasanag; kag may kasanag.

4 Kag sila (nga mga Dios) nakahangop sang kasanag, kay nagasilak ini; kag ginpain nila ang kasanag, ukon ginpahanabo nga mapain ini sa kadulom.

5 Kag ang mga Dios nagtawag sang kasanag nga Adlaw, kag ang kadulom gintawag nila nga Gab-i. Kag natabo ini nga sumugod magsirum tubtob magkaagahon gintawag nila nga gab-i; kag sumugod magkaagahon tubtob magsirum gintawag nila nga adlaw; kag amo ini ang una, ukon ang panugod sang sinang gintawag nila nga adlaw kag gab-i.

6 Kag ang mga Dios nagsiling man: Magluntad ang kahawaan sa tunga sang mga tubig, kag painon sini ang mga tubig sa mga tubig.

7 Kag ang mga Dios nagmando sa kahawaan, sa bagay nga ginpain sini ang mga tubig sa idalom sang kahawaan sa mga tubig sa ibabaw sang kahawaan; kag nangin amo sini suno sa ila ginmando.

8 Kag gintawag sang mga Dios ang kahawaan nga Langit. Kag natabo ini nga humalin magsirum tubtob magkaagahon nga gintawag nila nga gab-i; kag natabo ini nga humalin magkaagahon tubtob magsirum nga gintawag nila nga adlaw; kag ini ang ika-duha nga higayon nga gintawag nila nga gab-i kag adlaw.

9 Kag ang mga Dios nagmando nga nagasiling: Magtingob ang mga tubig sa idalom sang langit sa isa ka lugar, kag magluntad ang mamala nga duta; kag nangin amo sini suno sa ila ginmando;

10 Kag gintawag sang mga Dios ang mamala nga duta, Duta; kag ang pagtingob sang mga tubig gintawag nila, Dako nga Katubigan; kag nakita sang mga Dios nga natuman ang mga ini.

11 Kag ang mga Dios nagsiling: Ihanda naton ang duta nga magpatubo sang hilamon; sang tanom nga nagadala sang binhi; sang kahoy nga nagadala sang bunga suno sa iya sari, nga ang iya binhi sa iya kaugalingon nagadala sang pareho niya sa duta; kag nangin amo sini bisan pa suno sa ila ginmando.

12 Kag ang mga Dios nagpahamtang sang duta sa pagpatubo sang hilamon halin sa kaugalingon sini nga binhi, kag sang tanom sa pagpatubo sang tanom halin sa kaugalingon sini nga binhi, nga nagadala sang binhi nga pareho sang iya sari; kag sang duta sa pagpatubo sang kahoy halin sa kaugalingon sini nga binhi, nga nagadala sang bunga, nga ang binhi sini makapatubo sang pareho lamang sa iya kaugalingon, suno sa iya sari; kag nakita sang mga Dios nga natuman ang mga ini.

13 Kag natabo ini nga gin-isip nila ang mga adlaw; humalin magsirum tubtob magkaagahon gintawag nila nga gab-i; kag natabo ini nga humalin magkaagahon tubtob magsirum gintawag nila nga adlaw; kag ika-tatlo ini nga higayon.

14 Kag ang mga Dios nagpahamtang sang mga kasanag sa kahawaan sang langit, kag ginpapain sa mga ini ang gab-i sa adlaw; kag ginpahamtang ang mga ini agud mangin mga palatandaan, kag mga panag-on, kag sa mga adlaw, kag sa mga tuig;

15 Kag ginpahamtang ang mga ini nga mangin mga kasanag sa kahawaan sang langit sa paghatag sang kasanag sa duta; kag nangin amo sini.

16 Kag ang mga Dios nagpahamtang sang duha ka dalagko nga kasanag, ang mas dako nga kasanag sa paggahum sang kaadlawon, kag ang mas diutay nga kasanag sa paggahum sang kagab-ihon; upod sa mas diutay nga kasanag ginpahamtang man nila ang mga bituon;

17 Kag ang mga Dios nagpahamtang sa mga ini sa kahawaan sang mga langit, sa paghatag sang kasanag sa duta, kag sa paggahum sa kaadlawon kag sa kagab-ihon, kag sa pagpain sang kasanag sa kadulom.

18 Kag ginbantayan sang mga Dios inang mga butang nga ila ginmando tubtob nga natuman ang mga ini.

19 Kag natabo ini nga humalin magsirum tubtob magkaagahon nga ini gab-i; kag natabo ini nga humalin magkaagahon tubtob magsirum nga ini adlaw; kag ini ang ika-apat nga higayon.

20 Kag ang mga Dios nagsiling: Ihanda naton ang mga tubig sa pagdala sing bugana sang buhi nga nagagiho nga mga tinuga; kag ang mga kapispisan, agud nga maglupad sila sa ibabaw sang duta sa malapad nga kahawaan sang langit.

21 Kag ang mga Dios naghanda sang mga tubig nga makadala ang mga ini sang mga balyena nga dako, kag tanan nga buhi nga mga tinuga nga nagagiho, nga dal-on sang mga tubig sing bugana suno sa ila sari; kag sang tagsa ka pispis nga may pakpak suno sa ila sari. Kag nakita sang mga Dios nga natuman ang mga ini, kag ang ila plano maayo.

22 Kag ang mga Dios nagsiling: Pakamaayohon naton ang mga ini, kag himuon naton sila nga magmabungahon kag magpadamo, kag magpuno sang mga tubig sa kadagatan ukon dako nga mga katubigan; kag himuon naton nga magpadamo ang mga kapispisan sa duta.

23 Kag natabo ini nga humalin magsirum tubtob magkaagahon nga gintawag nila nga gab-i; kag natabo ini nga humalin magkaagahon tubtob magsirum nga gintawag nila nga adlaw; kag ika-lima ini nga higayon.

24 Kag ang mga Dios naghanda sang duta sa pagdala sang buhi nga tinuga suno sa iya sari, mga kahayupan kag nagakamang nga mga tinuga, kag mga kasapatan sang duta suno sa ila sari; kag nangin amo sini, pareho sa ila ginhambal.

25 Kag ang mga Dios nagpahamtang sang duta sa pagdala sang mga kasapatan suno sa ila sari, kag mga kahayupan suno sa ila sari, kag sang tagsa ka tinuga nga nagakamang sa ibabaw sang duta suno sa iya sari; kag nakita sang mga Dios nga magatuman ang mga ini.

26 Kag ang mga Dios nagsinugilanon sa ila mga kaugalingon kag nagsiling: Manaog kita kag himuon ang tawo sa aton dagway, suno sa aton kaanggid; kag hatagan naton sila sang paggahum sa mga kaisdaan sang dagat, kag sa mga kapispisan sang kahanginan, kag sa mga kahayupan; kag sa bug-os nga duta, kag sa tanan nga nagakamang nga tinuga nga nagakamang sa ibabaw sang duta.

27 Gani ang mga Dios nagpanaog sa pagtuga sang tawo sa ila kaugalingon nga dagway, sa dagway sang mga Dios sa paghimo nila sa iya, lalaki kag babayi sa paghimo nila sa ila.

28 Kag ang mga Dios nagsiling: Pakamaayohon naton sila. Kag ang mga Dios nagsiling: Himuon naton sila nga magmabungahon kag magpadamo, kag magpuno sang duta, kag dumalahan ini, kag maggahum sa mga kaisdaan sang dagat, kag sa mga kapispisan sang kahanginan, kag sa tagsa ka buhi nga tinuga nga nagagiho sa ibabaw sang duta.

29 Kag ang mga Dios nagsiling: Tan-awa, ihatag naton sa ila ang tagsa ka tanom nga nagadala sang binhi nga magatubo sa ibabaw sang duta, kag ang tagsa ka kahoy nga magapamunga; huo, ang bunga sang kahoy nga nagadala sang binhi sa ila ihatag naton ini; mangin ila ini kalan-on.

30 Kag sa tagsa ka sapat sang duta, kag sa tagsa ka pispis sang kahanginan, kag sa tagsa ka nagakamang sa duta, tan-awa, hatagan naton sila sang kabuhi, kag hatagan man naton sila sang tagsa ka berde nga tanom nga mangin kalan-on, kag tanan sining mga butang ipahamtang sa sini nga paagi.

31 Kag ang mga Dios nagsiling: Himuon naton ang tanan nga aton ginhambal, kag ipahamtang ang mga ini; kag tan-awa, mangin tuman sila ka matinumanon. Kag natabo ini nga humalin magsirum tubtob magkaagahon nga gintawag nila nga gab-i; kag natabo ini nga humalin magkaagahon tubtob magsirum nga gintawag nila nga adlaw; kag gin-isip nila ang ika-anum nga higayon.