1 Pea toki folofola ʻa e ʻEikí: Tau ō hifo. Pea naʻa nau ō hifo ʻi he kamataʻangá, pea ko kinautolu, ʻa ia ko e pehē ko e ngaahi ʻOtuá, naʻa nau fakamāʻopoʻopo mo ngaohi ʻa e ngaahi langí pea mo e māmaní.

2 Pea ko e māmaní, hili hono ngaohí, naʻe fuofuonoa mo lala, koeʻuhí he naʻe teʻeki ai ke nau ngaohi ha meʻa ka ko e māmaní pē; pea naʻe fakafonu ʻe he fakapoʻulí ʻa e funga ʻo e lolotó, pea naʻe ʻōʻōfaki ʻa e Laumālie ʻo e ngaahi ʻOtuá ʻi he fukahi vaí.

3 Pea ko kinautolu (ko e ngaahi ʻOtuá) naʻa nau folofola: Ke ʻi ai ha maama; pea naʻe maama.

4 Pea ko kinautolu (ko e ngaahi ʻOtuá) naʻa nau ʻafioʻi ʻa e māmá, he naʻe ngingila ia; pea naʻa nau vaheʻi ʻa e māmá, pe pule ke vaheʻi ia, mei he fakapoʻulí.

5 Pea naʻe ui ʻe he ngaahi ʻOtuá ʻa e māmá ko e ʻAho, pea nau ui ʻa e fakapoʻulí ko e Poʻuli. Pea naʻe hoko ʻo pehē, ko e efiafí ʻo fai ʻo aʻu ki he pongipongí naʻa nau ui ko e poʻuli; pea ko e pongipongí ʻo fai ʻo aʻu ki he efiafí naʻa nau ui ko e ʻaho; pea ko e ʻuluakí ʻeni, pe ko e kamataʻanga, ʻo e meʻa naʻa nau ui ko e ʻahó mo e poó.

6 Pea naʻe folofola foki ʻa e ngaahi ʻOtuá: Ke ai ha ʻatā ʻi he lotolotonga ʻo e ngaahi vaí, pea te ne vaheʻi ʻa e ngaahi vaí mei he ngaahi vaí.

7 Pea naʻe tuʻutuʻuniʻi ʻe he ngaahi ʻOtuá ʻa e ʻataá, koeʻuhí ke ne vahevaheʻi ʻa e ngaahi vai ʻa ia naʻe ʻi lalo ʻi he ʻataá mei he ngaahi vai ʻa ia naʻe ʻi ʻolunga ʻi he ʻataá; pea naʻe hoko ia, ʻo hangē ko ʻenau tuʻutuʻuní.

8 Pea naʻe ui ʻe he ngaahi ʻOtuá ʻa e ʻataá, ko e Langí. Pea naʻe hoko ʻo pehē, ko e vahaʻa mei he efiafí ki he pongipongí naʻa nau ui ko e poó; pea naʻe hoko ʻo pehē ko e vahaʻa mei he pongipongí ki he efiafí naʻa nau ui ko e ʻahó; pea ko hono tuʻo ua ʻeni ʻo ʻenau ui ʻa e poó mo e ʻahó.

9 Pea naʻe tuʻutuʻuni ʻe he ngaahi ʻOtuá, ʻo pehē: Ke fakatahataha ʻa e ngaahi vai ʻi he lalo langí ki he potu pē ʻe taha, pea ke eʻa hake ʻa e fonuá pea mōmoa; pea naʻe hoko ia, ʻo hangē ko ʻenau tuʻutuʻuní;

10 Pea naʻe ui ʻe he ngaahi ʻOtuá ʻa e fonua mōmoá ko e Fonua; pea nau ui ʻa e fakatahatahaʻanga ʻo e ngaahi vaí ko e Ngaahi Fuʻu Vai Lahi; pea naʻe ʻafioʻi ʻe he ngaahi ʻOtuá kuo talangofua kiate kinautolu.

11 Pea folofola ʻa e ngaahi ʻOtuá: Tau teuteuʻi ʻa e fonuá ke tupu ai ha mohuku; mo e ʻakau iiki ʻoku tupu ai hono tengá; mo e ʻakau fua ʻoku tupu ai hono fuá, ʻo fakatatau ki hono faʻahingá, ʻa ia ʻoku fakatupu ʻe hono tengá ʻiate ia pē ʻa hono tataú ʻi he māmaní; pea naʻe hoko ia, ʻo hangē ko ʻenau tuʻutuʻuní.

12 Pea naʻe fakatupu ʻe he ngaahi ʻOtuá ʻa e fonuá ke tupu ai ʻa e mohukú mei hono tenga ʻoʻoná pea mo e ʻakau īkí ke tupu ai ʻa e ʻakau iiki mei hono tenga ʻoʻoná pea tupu ai ʻa e tenga ʻo fakatatau ki hono faʻahingá; pea mo e fonuá ke tupu ai ʻa e ʻakaú mei hono tenga ʻoʻoná, ʻo fua ʻaki ʻa e fua, ʻa ia ko hono tengá ʻe lava ke fakatupu hono tenga ʻoʻoná pē, ʻo fakatatau ki hono faʻahingá; pea naʻe ʻafioʻi ʻe he ngaahi ʻOtuá kuo talangofua kiate kinautolu.

13 Pea naʻe hoko ʻo pehē, naʻa nau lau ʻa e ngaahi ʻahó; mei he efiafí ʻo aʻu ki he pongipongí naʻa nau ui ko e pō; pea naʻe hoko ʻo pehē, mei he pongipongí ki he efiafí naʻa nau ui ko e ʻaho; pea ko hono tuʻo tolú ia.

14 Pea naʻe fakatupu ʻe he ngaahi ʻOtuá ʻa e ngaahi maama ʻi he ʻatā ʻo e langí, pea tuku ke ne vaheʻi ʻe ia ʻa e ʻahó mei he poó; ʻo teuteu ia ke hoko ko e ngaahi fakaʻilonga mo e ngaahi faʻahitaʻu, mo e ngaahi ʻaho, mo e ngaahi taʻu;

15 Pea nau fakatupu ia ke hoko ko e ngaahi maama ʻi he ʻatā ʻo e langí ke fakamaama ki he māmaní; pea naʻe hoko ia.

16 Pea naʻe fakatupu ʻe he ngaahi ʻOtuá ʻa e ongo maama lalahi ʻe uá, ko e maama lahi angé ke pule ki he ʻahó, pea ko e maama siʻi hifó ke pule ki he poʻulí; naʻa nau fokotuʻu foki mo e ngaahi fetuʻú fakataha mo e maama siʻi hifó;

17 Pea naʻe fokotuʻu ia ʻe he ngaahi ʻOtuá ʻi he ʻatā ʻo e ngaahi langí ke foaki maama ki he māmaní, pea ke pule ki he ʻahó pea ki he poʻulí, pea ke ne vahevaheʻi ʻa e māmá mei he fakapoʻulí.

18 Pea naʻe ʻafio ʻa e ngaahi ʻOtuá ki he ngaahi meʻa ʻa ia kuo nau tuʻutuʻuní kae ʻoua kuo nau talangofua.

19 Pea naʻe hoko ʻo pehē naʻe fai mei he efiafí ʻo aʻu ki he pongipongí pea ko e poʻulí ia; pea naʻe hoko ʻo pehē naʻe fai mei he pongipongí ʻo aʻu ki he efiafí pea ko e ʻahó ia; pea ko hono tuʻo faá ia.

20 Pea naʻe folofola ʻa e ngaahi ʻOtuá: Ke tau teuteuʻi ʻa e ngaahi vaí ke tupu ai ʻo lahi ʻaupito ʻa e ngaahi meʻa ʻoku ngāue ʻa ia ʻoku moʻuí; pea mo e fanga manupuná, koeʻuhí ke nau puna ʻi ʻolunga ʻi he fonuá ʻi he ʻataʻatā ʻo e langí.

21 Pea naʻe teuteuʻi ʻe he ngaahi ʻOtuá ʻa e ngaahi vaí koeʻuhí ke lava ʻo tupu mei ai ʻa e ngaahi fuʻu tofuaʻa lalahi, pea mo e meʻa moʻui kotoa pē ʻoku ngaué, ʻa ia ʻe tupu ʻi he ngaahi vaí ʻo lahi ʻaupito ʻo fakatatau ki honau faʻahingá; pea mo e fanga manupuna kapakau kotoa pē ʻo fakatatau ki honau faʻahingá. Pea naʻe ʻafio ʻa e ngaahi ʻOtuá ʻe talangofua kiate kinautolu, pea naʻe lelei ʻa ʻenau palaní.

22 Pea naʻe folofola ʻa e ngaahi ʻOtuá: Te tau tāpuakiʻi ʻa kinautolu, mo pule ke nau fanafanau mo fakatokolahi, pea fakafonu ʻa e ngaahi vai ʻi he ngaahi tahí pe ko e ngaahi vai lahí; pea pule ke fakatokolahi ʻa e fanga manupuná ʻi he māmaní.

23 Pea naʻe hoko ʻo pehē ko e efiafí ʻo aʻu ki he pongipongí naʻa nau ui koe poʻulí; pea naʻe hoko ʻo pehē ko e pongipongí ʻo aʻu ki he efiafí naʻa nau ui ko e ʻahó; pea ko hono tuʻo nimá ia.

24 Pea naʻe teuteuʻi ʻe he ngaahi ʻOtuá ʻa e māmaní ke tupu ai ʻa e meʻa moʻuí ʻo fakatatau ki hono faʻahingá, ʻa e fanga pulú ʻi hono faʻahinga, mo e ngaahi meʻa totoló, mo e fanga manu ʻo e fonuá ʻo fakatatau ki honau faʻahingá; pea naʻe hoko ia, ʻo hangē ko ʻenau folofolá.

25 Pea naʻe fakatupu ʻe he ngaahi ʻOtuá ʻa e māmaní ke tupu ai ʻa e fanga manú ʻo fakatatau ki honau faʻahingá, mo e fanga pulú ʻo fakatatau ki honau faʻahingá, pea mo e meʻa kotoa pē ʻoku totolo ʻi he māmaní ʻo fakatatau ki hono faʻahingá; pea naʻe ʻafioʻi ʻe he ngaahi ʻOtuá te nau talangofua.

26 Pea naʻe alealea ʻa e ngaahi ʻOtuá ʻiate kinautolu pē pea nau folofola: Tau ō hifo ʻo ngaohi ʻa e tangatá ʻi hotau ʻīmisí, mo hotau tataú, pea te tau foaki kiate kinautolu ke pule ki he fanga ika ʻo e tahí, pea ki he fanga manupuna ʻo e ʻataá, pea ki he fanga pulú mo honau faʻahingá, pea ki he māmaní kotoa pē, pea ki he meʻa totolo kotoa pē ʻa ia ʻoku totolo ʻi he funga ʻo e fonuá.

27 Ko ia naʻe hāʻele hifo ʻa e ngaahi ʻOtuá ke fakatupu ʻa e tangatá ʻi honau ʻīmisi ʻonautolú, naʻa nau ngaohi ia ʻi he ʻīmisi ʻo e ngaahi ʻOtuá, naʻa nau ngaohi ʻa kinaua ko e tangata mo e fefine.

28 Pea naʻe folofola ʻa e ngaahi ʻOtuá: Te tau tāpuakiʻi ʻa kinaua. Pea naʻe folofola ʻa e ngaahi ʻOtuá: Te tau pule ke nau fanafanau mo fakatokolahi, pea fakakakai ʻa e māmaní, ʻo ikunaʻi ia, pea pule ki he fanga ika ʻo e tahí, pea ki he fanga manupuna ʻo e ʻataá, pea ki he meʻa moʻui kotoa pē ʻa ia ʻoku ʻalu holo ʻi he funga fonuá.

29 Pea naʻe folofola ʻa e ngaahi ʻOtuá: Vakai, te tau foaki kiate kinaua ʻa e ʻakau iiki kotoa pē ʻoku tupu ai ha tenga ʻa ia ʻe tupu ʻi he funga ʻo e māmaní hono kotoa, pea mo e ngaahi ʻakau kotoa pē ʻa ia ʻe ʻi ai ha fuá; ʻio, ko e fua ʻo e fuʻu ʻakau ʻoku tupu ai ha tengá, te tau foaki ia kiate kinaua; ʻe hoko ia ko ʻena meʻakai.

30 Pea ki he fanga manu kotoa pē ʻo e māmaní, pea ki he fanga manupuna kotoa pē ʻo e ʻataá, pea ki he meʻa kotoa pē ʻoku totolo ʻi he funga ʻo e māmaní, vakai, te tau foaki kiate kinaua ʻa e moʻuí, pea te tau foaki foki kiate kinaua ʻa e ʻakau iiki lanu-mata kotoa pē ke hoko ko e meʻakai, pea ʻe pehē hono fakatupu ʻo e ngaahi meʻá ni kotoa pē.

31 Pea naʻe folofola ʻa e ngaahi ʻOtuá: Te tau fai ʻa e meʻa kotoa pē kuo tau leaʻakí, ʻo fakatupu ia; pea vakai, te nau talangofua ʻaupito. Pea naʻe hoko ʻo pehē ko e efiafí ʻo aʻu ki he pongipongí naʻa nau ui ko e poʻulí; pea naʻe hoko ʻo pehē ko e pongipongí ʻo aʻu ki he efiafí naʻa nau ui ko e ʻahó; pea naʻa nau lau ʻa e taimi ko hono onó.