1 Pea naʻe hoko ʻo pehē naʻe folofola ʻa e ʻEikí kia Mōsese, ʻo pehē: Vakai, ʻoku ou fakahā kiate koe ʻa e ngaahi meʻa ʻoku kau ki he langi ko ʻení, pea mo e māmani ko ʻení; tohi ʻa e ngaahi lea ʻa ia ʻoku ou leaʻakí. Ko au ko e Kamataʻangá mo e Ngataʻangá, ko e ʻOtua Māfimafí, naʻá ku fakatupu ʻa e ngaahi meʻá ni ʻi hoku ʻAlo pē Taha naʻe Fakatupú; ʻio, naʻá ku fakatupu ʻi he kamataʻangá ʻa e langí, pea mo e māmani ʻa ia ʻokú ke tuʻu aí.

2 Pea naʻe fuofuonoa ʻa e māmaní mo lala; peá u pule ke hoko mai ʻa e fakapoʻulí ki he funga ʻo e lolotó; pea naʻe ʻalu ʻa hoku Laumālié ʻi he fukahi vaí; he ko e ʻOtuá au.

3 Pea ko au, ko e ʻOtuá, naʻá ku pehē: Ke ʻi ai ha maama; pea naʻe ʻi ai ʻa e maama.

4 Pea ko au, ko e ʻOtuá, naʻá ku mamata ki he māmá; pea naʻe lelei ʻa e maama ko iá. Pea ko au, ko e ʻOtuá, naʻá ku vaheʻi ʻa e māmá mei he fakapoʻulí.

5 Pea ko au, ko e ʻOtuá, naʻá ku ui ʻa e māmá ko e ʻAho; pea ko e fakapoʻulí, naʻá ku ui ko e Pō; pea naʻá ku fai ʻeni ʻi he folofola ʻo hoku mālohí, pea naʻe fai ʻo hangē ko ʻeku leá; pea ko e efiafí mo e pongipongí ko e ʻuluaki ʻahó.

6 Pea ko e tahá, ko au, ko e ʻOtuá, naʻá ku toe pehē: Ke ʻi ai ʻa e ʻatā ʻi he lotolotonga ʻo e vaí, pea naʻe hoko ia, ʻo hangē ko ʻeku leá; pea naʻá ku pehē: Tuku ke ne vaheʻi ʻa e ngaahi vaí mei he ngaahi vai; pea naʻe fai ia;

7 Pea ko au, ko e ʻOtuá, naʻá ku ngaohi ʻa e ʻataá pea vaheʻi ʻa e ngaahi vaí, ʻio, ʻa e ngaahi fuʻu vai lalahi ʻi lalo ʻi he ʻataá mei he ngaahi vai naʻe ʻi ʻolunga ʻi he ʻataá, pea naʻe hoko ʻo hangē ko ʻeku leá.

8 Pea ko au, ko e ʻOtuá, naʻá ku ui ʻa e ʻataá ko e Langi; pea ko e efiafí mo e pongipongí ko e ʻaho hono uá.

9 Pea ko au, ko e ʻOtuá, naʻá ku pehē: Ke fakatahatahaʻi fakataha ʻa e ngaahi vai ʻi he lalo langí ki he feituʻu pē ʻe taha, pea naʻe pehē; pea ko au, ko e ʻOtuá, naʻá ku pehē: Ke ʻi ai ha kelekele mōmoa; pea naʻe hoko ia.

10 Pea ko au, ko e ʻOtuá, naʻá ku ui ʻa e kelekele mōmoá ko e Fonua; pea naʻá ku ui ʻa e ngaahi vai naʻe tānaki fakatahá ko e Tahi; pea ko au, ko e ʻOtuá, naʻá ku vakai ʻoku lelei ʻa e ngaahi meʻa kotoa pē ʻa ia kuó u ngaohí.

11 Pea ko au, ko e ʻOtuá, naʻá ku pehē: Tuku ke fakatupu mai ʻe he kelekelé ʻa e mohukú mo e ʻakau iiki ʻoku tupu ai ʻa e tengá, ko e ʻakau fua ʻoku tupu ai hono fuá, ʻo fakatatau ki hono faʻahingá, pea mo e ʻakau ʻoku tupu ai ha fua, ʻa ia ʻoku totonu ke ʻi ai hono tenga ʻoʻona ʻi he kelekelé, pea naʻe hoko ia ʻo hangē pē ko ʻeku leá.

12 Pea naʻe fakatupu mai ʻe he kelekelé ʻa e mohukú, ko e ʻakau iiki kotoa pē ʻoku tupu ai ʻa e tenga ʻo fakatatau ki hono faʻahingá, pea mo e ʻakau ʻoku tupu ai ha fua, ʻa ia ʻoku totonu ke ʻi ai ʻa hono tenga ʻoʻona, ʻo fakatatau ki hono faʻahinga; pea ko au, ko e ʻOtuá, naʻá ku vakai kuo lelei ʻa e ngaahi meʻa kotoa pē ʻa ia kuó u ngaohí;

13 Pea ko e efiafí mo e pongipongí ko hono ʻaho tolú.

14 Pea ko au, ko e ʻOtuá, naʻá ku pehē: Tuku ke ʻi ai ʻa e ngaahi maama ʻi he ʻatā ʻo e langí, ke vahevaheʻi ʻa e ʻahó mei he poó, pea tuku ke hoko ia ko e ngaahi fakaʻilonga, pea mo e ngaahi faʻahitaʻu, pea mo e ngaahi ʻaho, pea mo e ngaahi taʻu;

15 Pea tuku ke hoko ia ko e ngaahi maama ʻi he ʻatā ʻo e langí ke fakamāmaʻi ʻa e māmaní; pea naʻe hoko ia.

16 Pea ko au, ko e ʻOtuá, naʻá ku ngaohi ʻa e maama lalahi ʻe ua; ko e maama lahi haké ke pule ki he ʻahó, mo e maama siʻi hifó ke pule ki he poó, pea ko e maama lahi haké ko e laʻaá, pea ko e maama siʻi hifó ko e māhiná; pea naʻe ngaohi foki mo e ngaahi fetuʻú ʻo fakatatau ki heʻeku leá.

17 Pea ko au, ko e ʻOtuá, naʻá ku fokotuʻu ia ʻi he ʻatā ʻo e langí ke fakamāmaʻi ʻa e māmaní,

18 Pea mo e laʻaá ke pule ki he ʻahó, pea mo e māhiná ke pule ki he poó, pea ke vaheʻi ʻa e māmá mei he fakapoʻulí; pea ko au, ko e ʻOtuá, naʻá ku vakai kuo lelei ʻa e ngaahi meʻa kotoa pē ʻa ia kuó u ngaohí;

19 Pea ko e efiafí mo e pongipongí ko hono ʻaho faá.

20 Pea ko au, ko e ʻOtuá, naʻá ku pehē: Tuku ke fakatupu mai ʻo lahi ʻaupito ʻe he ngaahi vaí ʻa e ngaahi meʻa ʻoku ʻalu holo ʻa ia ʻoku moʻuí, mo e fanga manupuna ʻa ia ʻe lava ʻo puna ʻi ʻolunga ʻi he kelekelé ʻi he ʻataʻatā ʻo e langí.

21 Pea ko au, ko e ʻOtuá, naʻá ku fakatupu ʻa e fanga tofuaʻa lalahi, pea mo e meʻa moʻui kotoa pē ʻoku ngaue, ʻa ia naʻe fakatupu mai ʻo lahi ʻaupito ʻi he ngaahi vaí, ʻo fakatatau ki honau faʻahingá, pea mo e manupuna kotoa pē ʻoku kapakaú ʻo fakatatau ki hono faʻahinga; pea ko au, ko e ʻOtuá, naʻá ku vakai, kuo lelei ʻa e ngaahi meʻa kotoa pē ʻa ia kuó u fakatupú.

22 Pea ko au, ko e ʻOtuá, naʻá ku tāpuakiʻi ʻa kinautolu ʻo pehē: Mou fanafanau mo fakatokolahi, pea fakafonu ʻa e ngaahi vai ʻi he tahí; pea ke fakatokolahi ʻa e fanga manupuná ʻi he māmaní;

23 Pea ko e efiafí mo e pongipongí ko e ʻaho hono nimá.

24 Pea ko au, ko e ʻOtuá, naʻá ku pehē: Tuku ke fakatupu mai ʻe he māmaní ʻa e meʻa moʻuí ʻi hono faʻahinga, ʻa e fanga pulú, mo e ngaahi meʻa totoló, mo e fanga manu ʻo e māmaní ʻi honau faʻahingá, pea naʻe hoko ia;

25 Pea ko au, ko e ʻOtuá, naʻá ku fakatupu ʻa e fanga manu ʻo e māmaní ʻi honau faʻahingá, mo e fanga pulú ʻi honau faʻahinga, pea mo e meʻa kotoa pē ʻoku totolo ʻi he māmaní ʻi honau faʻahinga; pea ko au, ko e ʻOtuá, naʻá ku vakai kuo lelei ʻa e ngaahi meʻá ni kotoa pē.

26 Pea ko au, ko e ʻOtuá, naʻá ku pehē ange ki hoku ʻAlo pē Taha naʻe Fakatupú, ʻa ia naʻe ʻiate au talu mei he kamataʻangá: Tuku ke ta ngaohi ʻa e tangatá ʻi hota ʻīmisí, ʻo fakatatau ki hota tataú; pea naʻe hoko ia. Pea ko au, ko e ʻOtuá, naʻá ku pehē ange: Tuku ke nau pule ki he fanga ika ʻo e tahí, pea ki he fanga manupuna ʻo e ʻataá, pea ki he fanga pulú, pea ki he māmaní kotoa pē, pea ki he meʻa totolo kotoa pē ʻa ia ʻoku totolo ʻi he funga ʻo e fonuá.

27 Pea ko au, ko e ʻOtuá, naʻá ku ngaohi ʻa e tangatá ʻi hoku ʻīmisi ʻoʻokú, naʻá ku ngaohi ia ʻi he ʻīmisi ʻo hoku ʻAlo pē Taha naʻe Fakatupú; naʻá ku ngaohi ʻa kinaua koe tangata mo e fefine.

28 Pea ko au, ko e ʻOtuá, naʻá ku tāpuakiʻi ʻa kinaua, ʻo pehē ange kiate kinaua: Mo fanafanau, mo fakatokolahi, pea fakakakai ʻa e māmaní, ʻo ikunaʻi ia, pea pule ki he fanga ika ʻo e tahí, pea ki he fanga manupuna ʻo e ʻataá, pea ki he meʻa moʻui kotoa pē ʻa ia ʻoku ʻalu holo ʻi he funga fonuá.

29 Pea ko au, ko e ʻOtuá, naʻá ku pehē ki he tangatá: Vakai, kuó u foaki kiate kimoua ʻa e ʻakau iiki kotoa pē ʻoku tupu ai ha tenga, ʻa ia ʻoku ʻi he funga hono kotoa ʻo e māmaní, pea mo e ʻakau kotoa pē ʻa ia ʻe ʻi ai ʻa e fua ʻo ha ʻakau ʻoku tupu ai ha tenga; ʻe hoko ia ko hoʻomo meʻakai.

30 Pea ki he manu kotoa pē ʻo e māmaní, pea ki he manupuna kotoa pē ʻo e ʻataá, pea ki he meʻa kotoa pē ʻoku totolo ʻi he māmaní, ʻa ia ʻoku ou tuku ki ai ʻa e moʻuí, ʻe foaki kiate kinautolu ʻa e ʻakau iiki maʻá ke hoko ko e meʻakai; pea naʻe hoko ia, ʻo hangē ko ʻeku leá.

31 Pea ko au, ko e ʻOtuá, naʻá ku vakai ki he meʻa kotoa pē kuó u ngaohí, pea vakai, kuo lelei ʻaupito ʻa e meʻa kotoa pē kuó u ngaohí; pea ko e efiafí mo e pongipongí ko e ʻaho hono onó.