1 Ka sa yaco ni sa vosa vei Mosese na Turaga, ka kaya: Raica, au sa na vakatakila vei iko na veika ni lomalagi, kei na vuravura oqo; mo vola na vosa au sa tukuna. Koi au na iVakatekivu kei na iVakataotioti, na Kalou Kaukauwa; mai vua na noqu Le Duabau Ga au sa bulia kina na veika oqo; io, ena ivakatekivu au sa bulia na lomalagi ia sa bulia na veika kece oqo na noqu Le Duabau ga ena vukuqu; io ena ivakatekivu au sa bulia na lomalagi, kei na vuravura ko sa tiko kina oqo.

2 A sa sega ni vakacokotaki ko vuravura, ka sa lala tu; au sa vakavuna me tu na butobuto ena wasa titobu; ka sa yavavala e dela ni wai na Yaloqu; ni sai Au na Kalou.

3 Ia koi Au na Kalou, au sa kaya: Me rarama mai; a sa rarama mai.

4 Ia koi Au na Kalou, au sa raica na rarama, ka ni sa vinaka na rarama. Ia koi Au na Kalou, au sa wasea na rarama mai na butobuto.

5 Ia koi Au na Kalou au sa vakatoka na rarama me Siga; ia na butobuto, Au sa vakatoka me Bogi; ia oqori au sa vakayacora ena vosa ni noqu kaukauwa, ka sa vakavotukana ena gauna au vosa tiko kina; ia na yakavi kei na mataka sa kena imatai ni siga.

6 Au sa kaya tale koi Au na Kalou: Me dua na maliwa lala me wasea na wai, ia sa yaco me vaka na noqu vosa; kau sa kaya: Io me wasea na wai mai na wai; ka sa yaco me vakakina;

7 Ia koi Au na Kalou, au sa cakava na maliwa lala ka wasea na wai, io, na wai lelevu e ruku ni maliwa lala mai na wai e cake ena maliwa lala, a sa yaco me vaka na noqu vosa.

8 Ia koi Au na Kalou, au sa vakatoka na maliwa lala me Lomalagi; ia na yakavi kei na mataka sa kena ikarua ni siga.

9 Ia koi Au na Kalou, au sa kaya: Me soqoni vata na wai e rukui lomalagi ki na dua na yasana, a sa vakakina; ia koi Au na Kalou, au sa kaya: Me rairai mai na vanua mamaca, a sa vakakina.

10 Ia koi Au na Kalou, au sa vakatoka na vanua mamaca me Vuravura; kei na wai sa vakasoqoni vata, Au sa vakatoka me Wasawasa; ia koi Au na Kalou, au sa raica ni sa vinaka na veika au sa kitaka.

11 Ia koi Au na Kalou, au sa kaya: Me vakatubura na co ko vuravura, na co sa vakasorena, kei na kau dau vua, ena kena mataqali, kei na kau vuata, ia na sorena sa tiko ga kina e vuravura, ia a sa yaco me vaka na noqu vosa.

12 A sa vakatubura na co ko vuravura, na co kecega sa vakasorena ena kena mataqali, kei na kau dau vua, sa tiko kina na sorena, ena kena mataqali; ia koi Au na Kalou, au sa raica ni sa vinaka na veika au sa kitaka.

13 Ia na yakavi kei na mataka sa kena ikatolu ni siga.

14 Ia koi Au na Kalou, au sa kaya: Me tu na rarama e maliwa lala ni lomalagi, me wasea na siga mai na bogi, io me ivakatakilakila tale ga ni gauna, kei na siga, kei na yabaki.

15 Ia me rau vunirarama mai na maliwa lala kei lomalagi me vakararamataki vuravura; a sa vakakina.

16 Ia koi Au na Kalou, au sa bulia e rua na vunirarama lelevu; na vunirarama levu me lewa na siga, kei na vunirarama lailai me lewa na bogi, ia na vunirarama levu na matanisiga, ka vunirarama lailai na vula; ia na kalokalo talega sa buli me vaka na noqu vosa.

17 Ia koi Au na Kalou, au sa vakatikori rau ena maliwa lala kei lomalagi me vakararamataki vuravura.

18 Ia na matanisiga sa lewa na siga, kei na vula sa lewa na bogi; ka me wasea na rarama mai na butobuto; ia koi Au na Kalou, au sa raica ni sa vinaka na veika au sa kitaka;

19 Ia na yakavi kei na mataka sa kena ikava ni siga.

20 Ia koi Au na Kalou au sa kaya: Me vakatubura vakalevu sara na wai na ka sa lako voli ka bula rawa; kei na manumanu vuka me vuka voli e delai vuravura ena maliwa lala ni lomalagi.

21 Ia koi Au na Kalou, au sa bulia na ika lelevu ka rerevaki, kei na ka buli kecega sa bula ka yavavala rawa, sa vakatubura vakalevu na wai, ena kedra mataqali; ia koi Au na Kalou, au sa raica ni sa vinaka na veika kecega au sa kitaka.

22 Ia koi Au na Kalou, au sa vosa vakalougatataki ira ka kaya: Dou luvea ka tubu me lewe vuqa, ka vakatawa na wai ni veiwasawasa; ia me tubu talega me lewevuqa na manumanu vuka e vuravura.

23 Ia na yakavi kei na mataka sa kena ikalima ni siga.

24 Ia koi Au na Kalou, au sa kaya: Me vakatubura na ka bula na qele ena kedra mataqali, na manumanu e yavaiva, kei na ka sa qasi voli, kei na manumanu tawa lasa ni vanua, ena kedra mataqali, ka sa vakakina;

25 Ia koi Au na Kalou, au sa bulia na manumanu tawa lasa ni vanua ena kedra mataqali, kei na manumanu e yava i va ena kedra mataqali, kei na ka kecega sa qasi voli e dela ni vanua ena kedra mataqali; ia koi Au na Kalou, au sa raica ni sa vinaka na veika kecega oqo.

26 Ia koi Au na Kalou, au sa kaya vua na noqu Le Duabau ga, o koya sa tiko vata kei au mai na ivakatekivu: Me daru ia ka bulia na tamata ena kedaru ibulibuli, ka me ucui kedaru; a sa vakakina. Ia koi Au na Kalou, au sa kaya: Me ra lewa na ika ni veiwasawasa, kei na manumanu vuka ni macawa, kei na manumanu e yavaiva, kei vuravura taucoko, kei na ka kecega sa qasi voli e delai vuravura.

27 Ia koi au na Kalou, au sa bulia na tamata ena kequ ibulibuli, io Au sa buli koya ena kena ibulibuli na noqu Le Duabau ga; au sa bulia na tagane kei na yalewa.

28 Ia koi au na Kalou, au sa vosa vakalougatataki rau, ka kaya vei rau: Drau vakaluveni, ka tubu me lewe vuqa, ka vakatawai vuravura, ka vakamalumalumutaka, ka lewa na ika ni waitui, kei na manumanu vuka ni macawa, kei na ka bula kecega sa veitosoyaki voli e delai vuravura.

29 Ia koi Au na Kalou, au sa kaya vua na tamata: Raica, au sa solia vei kemudrau na co kecega sa vakasorena, sa tu e delai vuravura taucoko, kei na kau kecega sa tu kina na vua ni kau sa vakasorena; ko ya ena kemudrau kakana.

30 Ia ki na manumanu tawalasa kecega ni vanua, kei na manumanu vuka kecega ni macawa, kei na ka kecega sa qasi voli e delai vuravura, ka’u sa solia kina na bula; au sa solia na co drokadroka kecega me kedra kakana; a sa yaco me vakakina, ena noqu vosa.

31 Ia koi Au na Kalou, au sa vakaraica na ka kecega au sa bulia, ka’u raica ni sa vinaka sara na veika kecega au sa bulia; ia na yakavi kei na mataka sa kena ikaono ni siga.