ບົດທີ 2
(ເດືອນມິຖຸນາ–ເດືອນຕຸລາ 1830)
ພຣະເຈົ້າສ້າງຟ້າສະຫວັນ ແລະ ແຜ່ນດິນໂລກ—ສິ່ງທີ່ມີຊີວິດທຸກຮູບແບບໄດ້ຖືກສ້າງຂຶ້ນ—ພຣະເຈົ້າສ້າງມະນຸດ ແລະ ມອບສິດຄອບຄອງທຸກສິ່ງທັງປວງໃຫ້ແກ່ລາວ.
1 ແລະ ເຫດການໄດ້ບັງເກີດຂຶ້ນຄື ພຣະຜູ້ເປັນເຈົ້າໄດ້ກ່າວກັບໂມເຊ, ໂດຍກ່າວວ່າ: ຈົ່ງເບິ່ງ, ເຮົາ ເປີດເຜີຍແກ່ເຈົ້າກ່ຽວກັບ ຟ້າສະຫວັນ, ແລະ ແຜ່ນດິນໂລກນີ້; ຈົ່ງຂຽນຖ້ອຍຄຳທີ່ເຮົາກ່າວ. ເຮົາເປັນຕົ້ນ ແລະ ທີ່ສຸດ, ພຣະເຈົ້າຜູ້ຊົງລິດອຳນາດຍິ່ງໃຫຍ່; ໂດຍ ພຣະອົງດຽວທີ່ຖືກຳເນີດຂອງເຮົາ, ເຮົາໄດ້ ສ້າງສິ່ງເຫລົ່ານີ້; ແທ້ຈິງແລ້ວ, ໃນຕອນຕົ້ນເຮົາໄດ້ນິລະມິດສ້າງຟ້າສະຫວັນ, ແລະ ແຜ່ນດິນໂລກຊຶ່ງເທິງນັ້ນເຈົ້າຢືນຢູ່.
2 ແລະ ແຜ່ນດິນໂລກຍັງບໍ່ທັນມີຮູບຮ່າງ, ແລະ ຍັງວ່າງເປົ່າຢູ່; ແລະ ເຮົາໄດ້ເຮັດໃຫ້ຄວາມມືດຫຸ້ມຫໍ່ມະຫາສະໝຸດອັນກວ້າງໃຫຍ່ໄພສານ; ແລະ ພຣະວິນຍານຂອງເຮົາໄດ້ວົນວຽນຢູ່ເທິງໜ້ານ້ຳ; ເພາະເຮົາຄືພຣະເຈົ້າ.
3 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ ຄວາມສະຫວ່າງສ່ອງຂຶ້ນ; ແລະ ຄວາມສະຫວ່າງກໍສ່ອງຂຶ້ນ.
4 ແລະ ເຮົາ, ພຣະເຈົ້າ, ໄດ້ເຫັນຄວາມສະຫວ່າງ; ແລະ ຊົມຄວາມສະຫວ່າງນັ້ນດ້ວຍ ຄວາມພໍໃຈ. ແລະ ເຮົາ, ພຣະເຈົ້າ, ໄດ້ແຍກຄວາມສະຫວ່າງອອກຈາກຄວາມມືດ.
5 ແລະ ເຮົາ, ພຣະເຈົ້າ, ໄດ້ເອີ້ນຄວາມສະຫວ່າງນັ້ນວ່າ ກາງເວັນ; ແລະ ຄວາມມືດນັ້ນ, ເຮົາເອີ້ນມັນວ່າ ກາງຄືນ; ແລະ ສິ່ງນີ້ເຮົາໄດ້ເຮັດໂດຍ ຄຳແຫ່ງອຳນາດຂອງເຮົາ, ແລະ ກໍເປັນດັ່ງທີ່ເຮົາ ກ່າວ; ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນ ມື້ທີໜຶ່ງ.
6 ແລະ ອີກເທື່ອໜຶ່ງ, ເຮົາ, ພຣະເຈົ້າ, ໄດ້ກ່າວວ່າ: ໃຫ້ມີ ທ້ອງນະພາ, ແລະ ມັນກໍໄດ້ເກີດຂຶ້ນ, ແມ່ນແຕ່ດັ່ງທີ່ເຮົາກ່າວ; ແລະ ເຮົາໄດ້ກ່າວວ່າ: ໃຫ້ນ້ຳແຍກອອກເປັນສອງສ່ວນ; ແລະ ກໍເປັນດັ່ງນັ້ນ;
7 ແລະ ເຮົາ, ພຣະເຈົ້າ, ໄດ້ນິລະມິດສ້າງທ້ອງນະພາ ແລະ ແຍກ ນ້ຳອອກຈາກກັນ, ແທ້ຈິງແລ້ວ, ນ້ຳທີ່ຢູ່ເທິງທ້ອງນະພາ ແລະ ນ້ຳທີ່ຢູ່ລຸ່ມທ້ອງນະພາ, ແລະ ກໍເປັນດັ່ງນັ້ນ ແມ່ນແຕ່ດັ່ງທີ່ເຮົາກ່າວ.
8 ແລະ ເຮົາ, ພຣະເຈົ້າ, ໄດ້ເອີ້ນທ້ອງນະພານັ້ນວ່າ ຟ້າສະຫວັນ; ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນມື້ທີສອງ.
9 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ນ້ຳທີ່ຢູ່ລຸ່ມຟ້າສະຫວັນມາໂຮມກັນຢູ່ ບ່ອນດຽວ, ແລະ ກໍເປັນດັ່ງນັ້ນ; ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ພື້ນດິນປະກົດຂຶ້ນ; ແລະ ກໍເປັນດັ່ງນັ້ນ.
10 ແລະ ເຮົາ, ພຣະເຈົ້າ, ໄດ້ເອີ້ນພື້ນດິນວ່າ ແຜ່ນດິນໂລກ; ແລະ ບ່ອນທີ່ນ້ຳມາໂຮມກັນນັ້ນ, ເຮົາໄດ້ເອີ້ນວ່າ ມະຫາສະໝຸດ; ແລະ ເຮົາ, ພຣະເຈົ້າ, ໄດ້ຊົມສິ່ງທີ່ໄດ້ນິລະມິດສ້າງຂຶ້ນມາແລ້ວກໍພໍໃຈ.
11 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ແຜ່ນດິນໂລກເກີດ ພືດທຸກຊະນິດ, ທັງແນວເປັນເມັດ, ແລະ ແນວເປັນໝາກ, ຕາມຊະນິດຂອງມັນ, ແລະ ຕົ້ນໄມ້ເກີດໝາກ, ຊຶ່ງເມັດຂອງມັນຢູ່ໃນຕົວຂອງມັນເອງຢູ່ເທິງແຜ່ນດິນໂລກ, ແລະ ກໍເປັນດັ່ງນັ້ນ ແມ່ນແຕ່ດັ່ງທີ່ເຮົາກ່າວ.
12 ແລະ ແຜ່ນດິນໂລກຈຶ່ງເກີດພືດທຸກຊະນິດ, ທັງແນວເປັນເມັດ, ແລະ ແນວເປັນໝາກ, ຕາມຊະນິດຂອງມັນ, ແລະ ຕົ້ນໄມ້ກໍເກີດໝາກ, ຊຶ່ງເມັດຂອງມັນຢູ່ໃນຕົວຂອງມັນເອງຕາມຊະນິດຂອງມັນ; ແລະ ເຮົາ, ພຣະເຈົ້າ, ໄດ້ຊົມສິ່ງທີ່ໄດ້ນິລະມິດສ້າງຂຶ້ນມາແລ້ວກໍພໍໃຈ;
13 ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນມື້ທີສາມ.
14 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ມີດວງແຈ້ງໃນທ້ອງນະພາແຫ່ງຟ້າສະຫວັນ, ເພື່ອແຍກກາງເວັນຈາກກາງຄືນ, ແລະ ໃຫ້ກຳນົດເວລາຂອງມື້, ປີ, ແລະ ລະດູການ;
15 ແລະ ເພື່ອໃຫ້ມັນເປັນຄວາມສະຫວ່າງໃນທ້ອງນະພາແຫ່ງຟ້າສະຫວັນເພື່ອໃຫ້ສ່ອງແສງລົງມາສູ່ແຜ່ນດິນໂລກ; ແລະ ກໍເປັນດັ່ງນັ້ນ.
16 ແລະ ເຮົາ, ພຣະເຈົ້າ, ໄດ້ນິລະມິດສ້າງ ດວງແຈ້ງສອງດວງ; ດວງທີ່ມີຄວາມສະຫວ່າງຫລາຍກວ່າໃຫ້ປົກຄອງກາງເວັນ, ແລະ ດວງທີ່ມີຄວາມສະຫວ່າງໜ້ອຍກວ່າໃຫ້ປົກຄອງກາງຄືນ, ແລະ ດວງທີ່ມີຄວາມສະຫວ່າງຫລາຍກວ່າຄືດວງຕາເວັນ, ແລະ ດວງທີ່ມີຄວາມສະຫວ່າງໜ້ອຍກວ່າຄືດວງເດືອນ; ແລະ ໄດ້ນິລະມິດສ້າງດວງດາວອື່ນໆນຳອີກ ແມ່ນແຕ່ຕາມຄຳຂອງເຮົາ.
17 ແລະ ເຮົາ, ພຣະເຈົ້າ, ໄດ້ວາງດວງແຈ້ງໄວ້ໃນທ້ອງນະພາແຫ່ງຟ້າສະຫວັນໃຫ້ສ່ອງແສງລົງມາສູ່ແຜ່ນດິນໂລກ,
18 ແລະ ດວງຕາເວັນໃຫ້ປົກຄອງກາງເວັນ, ແລະ ດວງເດືອນໃຫ້ປົກຄອງກາງຄືນ, ແລະ ໃຫ້ແຍກແຈ້ງຈາກມືດ; ແລະ ເຮົາ, ພຣະເຈົ້າ, ໄດ້ຊົມສິ່ງທີ່ໄດ້ນິລະມິດສ້າງຂຶ້ນມາແລ້ວກໍພໍໃຈ;
19 ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນມື້ທີສີ່.
20 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ສັດຫລາຍຈຳພວກເກີດຂຶ້ນຢູ່ໃນນ້ຳ, ແລະ ໃຫ້ມີນົກບິນໄປມາໃນທ້ອງນະພາແຫ່ງຟ້າສະຫວັນ.
21 ແລະ ເຮົາ, ພຣະເຈົ້າ, ໄດ້ນິລະມິດສ້າງ ປາວານຂະໜາດໃຫຍ່, ແລະ ສັດທຸກຊະນິດທີ່ເຄື່ອນຍ້າຍ, ຊຶ່ງເຕັມຢູ່ຢ່າງອຸດົມສົມບູນໃນຜືນນ້ຳ, ຕາມຊະນິດຂອງມັນ, ແລະ ສັດມີປີກທຸກຕົວ ຕາມຊະນິດຂອງມັນ; ແລະ ເຮົາ, ພຣະເຈົ້າ, ເຫັນວ່າສິ່ງທັງປວງທີ່ເຮົາໄດ້ສ້າງໄວ້ນັ້ນດີ.
22 ແລະ ເຮົາ, ພຣະເຈົ້າ, ໄດ້ອວຍພອນມັນ, ໂດຍກ່າວວ່າ: ໃຫ້ພາກັນ ອອກແມ່ແຜ່ລູກຫລາຍຢູ່ເຕັມມະຫາສະໝຸດ; ແລະ ທັງໃຫ້ຝູງນົກແຜ່ຜາຍຂະຫຍາຍພັນຫລາຍຂຶ້ນຢູ່ໃນແຜ່ນດິນໂລກ;
23 ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນມື້ທີຫ້າ.
24 ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ມີສັດຈຳພວກຕ່າງໆຢູ່ເທິງແຜ່ນດິນໂລກຕາມຊະນິດຂອງມັນ, ສັດບ້ານ, ແລະ ສັດຍ່າງຍ້າຍເລືອຄານ, ແລະ ສັດປ່າເກີດຂຶ້ນທົ່ວແຜ່ນດິນໂລກຕາມຊະນິດຂອງມັນ, ແລະ ກໍເປັນດັ່ງນັ້ນ;
25 ແລະ ເຮົາ, ພຣະເຈົ້າ, ໄດ້ນິລະມິດສ້າງສັດປ່າຢູ່ເທິງແຜ່ນດິນໂລກຕາມຊະນິດຂອງມັນ, ແລະ ສັດບ້ານຕາມຊະນິດຂອງມັນ, ແລະ ສັດຍ່າງຍ້າຍເລືອຄານຢູ່ເທິງແຜ່ນດິນໂລກຕາມຊະນິດຂອງມັນ; ແລະ ເຮົາ, ພຣະເຈົ້າ, ໄດ້ຊົມສິ່ງທີ່ໄດ້ນິລະມິດສ້າງຂຶ້ນມາແລ້ວກໍພໍໃຈ.
26 ແລະ ເຮົາ, ພຣະເຈົ້າ, ໄດ້ກ່າວກັບ ພຣະອົງດຽວທີ່ຖືກຳເນີດຂອງເຮົາ, ຊຶ່ງໄດ້ຢູ່ກັບເຮົາຕັ້ງແຕ່ຕົ້ນວ່າ: ໃຫ້ພວກເຮົານິລະມິດ ສ້າງມະນຸດໃຫ້ເປັນ ຮູບລັກສະນະໃຫ້ຄ້າຍຄືພວກເຮົາ, ຕາມລັກສະນະຂອງພວກເຮົາ; ແລະ ກໍເປັນດັ່ງນັ້ນ. ແລະ ເຮົາ, ພຣະເຈົ້າ, ໄດ້ກ່າວວ່າ: ໃຫ້ພວກເຂົາ ມີອຳນາດເໜືອປາໃນນ້ຳ, ແລະ ເໜືອນົກໃນອາກາດ, ແລະ ເໜືອສັດທັງໝົດ, ແລະ ເໜືອທັງແຜ່ນດິນໂລກ, ແລະ ເໜືອສັດຍ່າງຍ້າຍເລືອຄານທຸກຊະນິດຢູ່ເທິງແຜ່ນດິນໂລກ.
27 ແລະ ເຮົາ, ພຣະເຈົ້າ, ໄດ້ນິລະມິດສ້າງມະນຸດໃຫ້ເປັນຮູບລັກສະນະໃຫ້ຄ້າຍຄືເຮົາເອງ, ໃນຮູບລັກສະນະຂອງພຣະອົງດຽວທີ່ຖືກຳເນີດຂອງເຮົາ ຊຶ່ງເຮົາໄດ້ສ້າງ; ເຮົາໄດ້ສ້າງພວກເຂົາໃຫ້ເປັນຊາຍ ແລະ ຍິງ.
28 ແລະ ເຮົາ, ພຣະເຈົ້າ, ໄດ້ອວຍພອນພວກເຂົາ, ແລະ ໄດ້ກ່າວກັບພວກເຂົາວ່າ: ຈົ່ງມີລູກດົກໃຫ້ ແຜ່ຂະຫຍາຍຫລາຍ, ແລະ ເພີ່ມຫລາຍຂຶ້ນຈົນເຕັມແຜ່ນດິນໂລກ, ແລະ ປົກຄອງມັນ, ແລະ ມີອຳນາດເໜືອປາໃນນ້ຳ, ແລະ ເໜືອນົກໃນອາກາດ, ສັດທຸກຊະນິດທີ່ເຄື່ອນຍ້າຍຢູ່ເທິງແຜ່ນດິນໂລກ.
29 ແລະ ເຮົາ, ພຣະເຈົ້າ, ໄດ້ກ່າວກັບມະນຸດວ່າ: ຈົ່ງເບິ່ງ, ເຮົາໃຫ້ພືດເປັນເມັດທຸກຊະນິດ, ຊຶ່ງມີຢູ່ຕະຫລອດທົ່ວແຜ່ນດິນໂລກ, ແລະ ຕົ້ນໄມ້ທັງໝົດ ແລະ ໝາກຂອງມັນແກ່ເຈົ້າເພື່ອເປັນ ອາຫານ.
30 ແລະ ສຳລັບສັດປ່າຢູ່ໃນແຜ່ນດິນໂລກ, ແລະ ສຳລັບນົກຢູ່ໃນອາກາດ, ແລະ ສຳລັບສັດຍ່າງຍ້າຍເລືອຄານທຸກຊະນິດຢູ່ໃນແຜ່ນດິນໂລກ, ຊຶ່ງໃນການນີ້ເຮົາຈະໃຫ້ຫຍ້າກັບພືດເປັນອາຫານ; ແລະ ກໍເປັນດັ່ງນັ້ນ, ແມ່ນແຕ່ ດັ່ງທີ່ເຮົາກ່າວ.
31 ແລະ ເຮົາ, ພຣະເຈົ້າ, ໄດ້ຊົມທຸກໆສິ່ງທີ່ໄດ້ນິລະມິດສ້າງຂຶ້ນມາ, ແລະ, ຈົ່ງເບິ່ງ, ທຸກສິ່ງທີ່ໄດ້ນິລະມິດສ້າງຂຶ້ນມາແລ້ວກໍ ພໍໃຈຫລາຍ; ແລະ ມື້ຄືນຜ່ານໄປ ແລະ ມື້ເຊົ້າຕ່າວມາ ນັ້ນແມ່ນມື້ ທີຫົກ.