1 Gani nahuman ang langit kag ang duta kag ang tanan nga yara sa sini.

2 Kag sa ika-pito nga adlaw, ako, nga Dios, nagtapos sang akon pagpangabudlay, kag sang tanan nga butang nga akon nahimo; kag nagpahuway ako sa ika-pito nga adlaw halin sa tanan ko nga pagpangabudlay, kag nahuman ang tanan nga butang nga akon nahimo, kag ako, nga Dios, nakita nga maayo ang mga ini;

3 Kag ako, nga Dios, nagpakamaayo sang ika-pito nga adlaw, kag ginpakabalaan ini; bangod sa sini nagpahuway ako sa tanan ko nga binuhatan nga ako, nga Dios, nagtuga kag naghimo.

4 Kag karon, tan-awa, ginasiling ko sa imo nga amo ini ang kasaysayan sang langit kag sang duta, sang ang mga ini gintuga, sa adlaw nga ako, nga Ginuong Dios, naghimo sang langit kag sang duta,

5 Kag sang tagsa ka tanom sang kapatagan antes ini nahamtang sa duta, kag sang tagsa ka tanom nga may binhi sa kapatagan antes ini nagtubo. Kay ako, nga Ginuong Dios, nagtuga sang tanan nga butang nga akon ginmitlang sing espirituhanon antes ang mga ini ginpahamtang sa ibabaw sang duta. Kay ako, nga Ginuong Dios wala pa nakapaulan sa ibabaw sang duta. Kag ako, nga Ginuong Dios, nagtuga sang tanan nga anak sang tawo; kag wala pa sing tawo nga magpanguma sang duta, kay sa langit gintuga ko sila; kag wala pa sang buhi nga tinuga sa ibabaw sang duta, bisan sa tubig, ukon sa kahanginan;

6 Apang, ako nga Ginuong Dios, nagmando, kag may nag-usbong nga gal-um halin sa duta, kag nagbunyag sang bug-os nga ibabaw sang duta.

7 Kag ako, nga Ginuong Dios, naghimo sang tawo halin sa yab-ok sang duta, kag naghuyop sa iya ilong sang ginhawa sang kabuhi; kag ang tawo nangin buhi nga kalag, ang una nga unod sa duta, ang una man nga tawo; bisan pa, ang tanan nga butang antes pa natuga na; apang espirituhanon sila nga gintuga kag ginhimo suno sa akon pulong.

8 Kag ako nga Ginuong Dios, nagtanom sang hardin sa este nayon sa Eden, kag didto ginbutang ko ang lalaki nga akon ginhimo.

9 Kag halin sa duta nagpatubo ako, nga Ginuong Dios, sang tagsa ka kahoy sing duna, nga manami sa panulokan sang tawo; kag makita ini sang tawo. Kag nangin buhi man ini nga kalag. Kay espirituhanon ini sa adlaw nga gintuga ko ini; kay nagapabilin ini sa kaharian nga ako, nga Dios, nagtuga sini, huo, bisan ang tanan nga butang nga ginhanda ko agud gamiton sang tawo; kag nakita sang tawo nga maayo ini nga kalan-on. Kag ako, nga Ginuong Dios, nagtanom man sang kahoy sang kabuhi sa tunga sang hardin, kag amo man sang kahoy sang ihibalo sang maayo kag malain.

10 Kag ako, nga Ginuong Dios, nagpailig sang isa ka suba halin sa Eden agud bunyagan ang hardin; kag halin didto nagsipak ini kag nangin apat ka sanga.

11 Kag ako, nga Ginuong Dios, naghingalan sang nahauna nga Pison, kag nagalibot ini sa bug-os nga duta sang Havila nga sa diin ako, nga Ginuong Dios, nagtuga sang madamo nga bulawan;

12 Kag maayo ang bulawan sang sinang duta, kag may bedelio kag bato nga onice.

13 Kag ang ngalan sang ika-duha nga suba gintawag nga Gihon; nga amo ang nagalibot sa bug-os nga duta sang Etiopia.

14 Kag ang ngalan sang ika-tatlo nga suba Hidekel; nga nagailig pakadto sa este sang Asiria. Kag ang ika-apat nga suba amo ang Eufrates.

15 Kag ako, nga Ginuong Dios, nagkuha sang lalaki kag nagbutang sa iya sa Hardin sang Eden, sa pagtatap kag sa pagbantay sini.

16 Kag ako, nga Ginuong Dios, nagsugo sa lalaki nga nagasiling: Sa tagsa ka kahoy sang hardin makakaon ka sing hilway,

17 Apang sa kahoy sang ihibalo sang maayo kag malain, indi ka magkaon, bisan pa, mahimo ka magpili para sa imo kaugalingon, kay ginahatag ini sa imo; pero dumduma nga ginadilian ko ini, kay sa adlaw nga magkaon ka sini, sigurado nga mapatay ka.

18 Kag ako, nga Ginuong Dios nagsiling sa akon Bugtong nga Anak nga indi maayo para sa lalaki nga mag-isahanon; gani, himoan ko sia sang kaupod sa pagbulig sa iya.

19 Kag halin sa duta ako, nga Ginuong Dios, naghimo sang tagsa ka sapat sang kapatagan, kag tagsa ka pispis sang kahanginan; kag nagsugo sa ila nga magpalapit kay Adan, agud tan-awon kon ano ang itawag niya sa ila; kag buhi man sila nga mga kalag; kay ako, nga Dios, naghuyop sa ila sang ginhawa sang kabuhi, kag nagsugo nga kon ano ang itawag ni Adan sa tagsa ka buhi nga tinuga, amo sina ang iya mangin ngalan.

20 Kag naghatag si Adan sang ngalan sa tanan nga kahayupan, kag sa mga kapispisan sang kahanginan, kag sa tagsa ka sapat sang kapatagan; apang kay Adan, wala sing makita nga kaupod sa pagbulig sa iya.

21 Kag ako, nga Ginuong Dios, naghatag sing hamuok nga katulogon kay Adan; kag nagtulog sia, kag ginkuhaan ko sia sing isa ka gusok kag ginpapali ang unod sa lugar sini;

22 Kag ang gusok nga ako, nga Ginuong Dios, nagkuha halin sa lalaki, ginhimo ko nga babayi, kag gindala sia sa lalaki.

23 Kag nagsiling si Adan: Ini nahibaloan ko karon nga tul-an sang akon tul-an, kag unod sang akon unod; pagatawgon sia nga Babayi, kay ginkuha sia halin sa lalaki.

24 Gani bayaan sang lalaki ang iya amay kag iya iloy, kag magpabilin nga tampad sa iya asawa; kag mangin isa sila ka unod.

25 Kag pareho sila nga hublas, ang lalaki kag iya asawa, kag wala sila nahuya.