1 Kag natabo ini nga pagkatapos nga ako, nga Ginuong Dios nagtabog sa ila, nagsugod si Adan sa pag-uma sang duta, kag sa paggahum sa mga kasapatan sang kapatagan, kag sa pagkaon sang kalan-on sa balhas sang iya agtang, pareho nga ako, nga Ginuo nagmando sa iya. Kag si Eva man, nga iya asawa, nagpangabudlay upod sa iya.

2 Kag lubos nga ginkilala ni Adan ang iya asawa kag nagbun-ag sia sa iya sang mga anak nga lalaki kag mga anak nga babayi, kag nagsugod sila sa pagpadamo kag sa pagpuno sang duta.

3 Kag sumugod sa sina nga tion, ang mga anak nga lalaki kag mga anak nga babayi ni Adan nagsugod sa pagsipak sing tinagduha-duha sa duta, kag sa pag-uma sang duta, kag sa pag-atipan sang mga panong, kag nag-anak man sila sang mga anak nga lalaki kag mga anak nga babayi.

4 Kag si Adan kag si Eva nga iya asawa, nagtawag sa ngalan sang Ginuo, kag nabatian nila ang tingug sang Ginuo halin sa direksyon sang Hardin sang Eden, nga nagahambal sa ila, kag indi nila sia makit-an; kay gintabog sila halin sa iya presensya.

5 Kag ginhatagan niya sila sang mga kasugoan, nga dapat sila magsimba sa Ginuo nga ila Dios, kag dapat maghatag sang mga panganay sang ila mga panong, bilang halad sa Ginuo. Kag nangin matinumanon si Adan sa mga kasugoan sang Ginuo.

6 Kag pagligad sang madamo nga inadlaw isa ka anghel sang Ginuo ang nagpakita kay Adan nga nagasiling: Ngaa nagahalad ka sang mga sakripisyo sa Ginuo? Kag nagsabat si Adan sa iya: Wala ako makahibalo, luwas lang nga ang Ginuo nagsugo sa akon.

7 Kag dayon ang anghel naghambal nga nagasiling: Ini nga butang kaangay sang sakripisyo sang Bugtong nga Anak sang Amay, nga puno sang grasya kag kamatuoran.

8 Gani, himuon mo ang tanan nga imo ginahimo sa ngalan sang Anak, kag maghinulsol kag magpanawag ka sa Dios sa ngalan sang Anak sa wala’y katubtuban.

9 Kag sa sina nga adlaw ang Balaan nga Espiritu nagpanaog kay Adan, nga nagapamatuod sa Amay kag sa Anak nga nagasiling: Ako ang Bugtong nga Anak sang Amay halin sa ginsuguran, sugod subong kag tubtob sa wala’y katapusan, kag kay bangod nahulog ka mahimo ka matubos, kag ang tanan nga katawhan, bisan pa ang tanan nga luyag matubos.

10 Kag sa sina nga adlaw si Adan nagpakamaayo sa Dios kag napuno sang Balaan nga Espiritu, kag nagsugod sa pagpropesiya parte sa tanan nga mga panimalay sang duta nga nagasiling: Bulahan ang ngalan sang Dios, kay bangod sa akon paglapas nabuksan ang akon mga mata, kag sa sining kabuhi makaangkon ako sing kalipay, kag sa liwat sa akon unod makita ko ang Dios.

11 Kag si Eva, nga iya asawa, nakabati sining mga butang kag nagkasadya nga nagasiling: Kon indi tungod sa aton paglapas wala gid kuntani kita sang mga anak, kag wala gid kuntani makahibalo sang maayo kag malain, kag sang kalipay sang pagtubos sa aton, kag sang kabuhi nga wala’y katapusan nga ginahatag sang Dios sa tanan nga matinumanon.

12 Kag ginpakamaayo ni Adan kag ni Eva ang ngalan sang Dios kag ginpahayag nila ang tanan nga butang sa ila mga anak nga lalaki kag mga anak nga babayi.

13 Kag si Satanas nakigsimpon sa ila nga nagasiling: Anak man ako sang Dios; kag ginsugo niya sila nga nagasiling: Indi kamo magpati; kag wala sila nagpati, kag ginhigugma nila si Satanas sing labaw sangsa Dios. Kag ang mga tawo sumugod sa sina nga tion nagsugod nga mangin dutan-on, lawasnon, kag yawan-on.

14 Kag nagpanawag ang Ginuong Dios sa mga tawo sa bisan diin paagi sa Balaan nga Espiritu kag ginsugo sila nga maghinulsol;

15 Kag ang tanan nga nagpati sa Anak kag naghinulsol sang ila mga sala pagaluwason; kag ang tanan nga wala nagpati kag wala naghinulsol pagasilotan; kag naggwa ang mga pulong sa baba sang Dios bilang malig-on nga mando; gani matuman gid ang mga ini.

16 Kag si Adan kag si Eva nga iya asawa, wala nag-untat sa pagtawag sa Dios. Kag lubos nga ginkilala ni Adan si Eva nga iya asawa, kag nagpanamkon sia kag nagbun-ag kay Cain, kag nagsiling: Nakabaton ako sang lalaki halin sa Ginuo; gani, indi niya pag-isikway ang iya mga pulong. Apang tan-awa, si Cain wala nagpamati nga nagasiling: Sin-o ang Ginuo nga kilalahon ko sia?

17 Kag nagpanamkon sia liwat kag nagbun-ag sang utod nga lalaki ni Cain nga si Abel. Kag si Abel nagpamati sa tingug sang Ginuo. Kag si Abel manugbantay sang carnero, apang si Cain mangunguma sang duta.

18 Kag ginhigugma ni Cain si Satanas sing labaw sangsa Dios. Kag si Satanas nagsugo sa iya nga nagasiling: Maghimo ka sang halad sa Ginuo.

19 Kag sa pagligad sang panahon natabo ini nga si Cain nagdala sang bunga sang duta nga halad sa Ginuo.

20 Kag si Abel, sia man nagdala sang mga panganay sang iya panong, kag sang tambok sang mga ini. Kag nahamut-an sang Ginuo si Abel, kag ang iya halad;

21 Apang si Cain kag ang iya halad, wala niya nahamut-an. Karon, nahibaloan ini ni Satanas kag nalipay sa sini. Kag naakig gid si Cain, kag nahulog ang iya nawong.

22 Kag nagsiling ang Ginuo kay Cain: Ngaa akig ka? Ngaa nahulog ang imo nawong?

23 Kon husto ang imo ginahimo, batonon ka. Kag kon indi husto ang imo ginahimo, nagahulat ang sala sa puwertahan, kag luyag ni Satanas nga maggahum sa imo; kag luwas lang kon magtuman ka sang akon mga kasugoan, itugyan ko ikaw, kag mangin sa imo ang suno sa iya luyag. Kag magahari ka sa iya;

24 Kay sugod subong mangin amay ka sang iya mga kabutigan; pagatawgon ka nga Kalaglagan; kay yara ka na antes pa nagsugod ang kalibutan.

25 Kag isiling sa magaabot nga tion—Nga ining mga kangil-aran naagom halin kay Cain; kay ginsikway niya ang mas maalam nga laygay nga nabaton halin sa Dios; kag isa ini ka sumpa nga ihatag ko sa imo, luwas lang kon maghinulsol ka.

26 Kag naakig si Cain kag wala na nagpamati sa tingug sang Ginuo, ukon man kay Abel nga iya utod nga nagalakat sa pagkabalaan sa atubang sang Ginuo.

27 Kag nagkalisud si Adan kag iya asawa sa atubang sang Ginuo, bangod kay Cain kag iya mga utod nga lalaki.

28 Kag natabo ini nga nagpangasawa si Cain sang isa sang mga anak nga babayi sang iya mga utod nga lalaki, kag ginhigugma nila si Satanas labaw pa sangsa Dios.

29 Kag nagsiling si Satanas kay Cain: Magsumpa ka sa akon kabaylo sa imo tutunlan, kag kon isugid mo ini mapatay ka; kag pasumpaa ang imo mga utod kabaylo sa ila mga ulo kag sa ngalan sang Dios nga buhi, nga indi nila ini pag-isugid; kay kon isugid nila ini, sigurado gid nga mapatay sila; kag ini agud nga indi ini mahibaloan sang imo amay; kag sini nga adlaw itugyan ko ang imo utod nga si Abel sa imo mga kamot.

30 Kag nagsumpa si Satanas kay Cain nga himuon niya ang suno sa iya mga sugo. Kag ining tanan nga butang ginhimo sing sekreto.

31 Kag nagsiling si Cain: Matuod gid nga ako si Mahan, ang agalon sining dako nga sekreto, kon sa diin mahimo ako magpatay kag mag-agom sing daug. Gani gintawag si Cain nga Agalon Mahan, kag nagpabugal sia sa iya kalainan.

32 Kag naglakat si Cain sa kapatagan kag nakighambal si Cain kay Abel nga iya utod. Kag natabo ini nga sang sa kapatagan sila, ginsalakay ni Cain si Abel nga iya utod kag ginpatay sia.

33 Kag nagpabugal si Cain sa iya nahimo nga nagasiling: Hilway ako; sigurado nga matupa sa akon mga kamot ang mga panong sang akon utod.

34 Kag nagsiling ang Ginuo kay Cain: Diin si Abel nga imo utod? Kag nagsiling sia: Wala ako nakahibalo. Manugbantay bala ako sang akon utod?

35 Kag nagsiling ang Ginuo: Ano bala ang nahimo mo? Nagasinggit ang tingug sang dugo sang imo utod sa akon halin sa duta.

36 Kag karon pagasumpaon ka sa duta nga nagbuka sang iya baba agud batonon ang dugo sang imo utod halin sa imo kamot.

37 Kon manguma ka sang duta indi na ini magpatubas sa imo sa iya kusog sugod subong. Magapalagyo kag magadalang-dalang ka sa duta.

38 Kag nagsiling si Cain sa Ginuo: Gintentar ako ni Satanas bangod sang mga panong sang akon utod. Kag akig man ako; kay ang iya halad ginbaton mo kag ang akon wala; sobra ang akon silot sangsa akon mabatas.

39 Tan-awa gintabog mo ako sini nga adlaw halin sa nawong sang Ginuo, kag halin sa imo nawong pagalipdan ako; kag magapalagyo ako kag magadalang-dalang sa duta; kag matabo ini nga patyon ako sing bisan sin-o nga makakita sa akon bangod sang akon mga kalainan, kay ining mga butang indi lipod sa Ginuo.

40 Kag ako nga Ginuo nagsiling sa iya: Ang bisan sin-o nga magpatay sa imo, timalusan sing makapito. Kag ako nga Ginuo nagbutang sang tanda kay Cain, kay basi patyon sia sing bisan sin-o nga makakita sa iya.

41 Kag gintabog si Cain halin sa presensya sang Ginuo, kag upod ang iya asawa kag madamo sang iya kauturan nagpuyo sa duta sang Nod, sa este sang Eden.

42 Kag lubos nga ginkilala ni Cain ang iya asawa kag nagpanamkon sia kag nagbun-ag kay Enoc, kag nangin amay man sia sing madamo nga mga anak nga lalaki kag mga anak nga babayi. Kag nagtukod sia sang isa ka siyudad, kag gintawag niya ang ngalan sang siyudad pareho sa ngalan sang iya anak nga si Enoc.

43 Kag kay Enoc natawo si Irad, kag iban pa nga mga anak nga lalaki kag mga anak nga babayi. Kag si Irad nangin amay ni Mahujael kag iban pa nga mga anak nga lalaki kag mga anak nga babayi. Kag si Mahujael nangin amay ni Metusela kag iban pa nga mga anak nga lalaki kag mga anak nga babayi. Kag si Metusela nangin amay ni Lamec.

44 Kag si Lamec nagpangasawa sing duha; ang ngalan sang isa si Ada kag ang ngalan sang isa si Zilla.

45 Kag nagbun-ag si Ada kay Jabal; amay sia sang mga nagapuyo sa mga tolda, kag mga manugbantay sila sang kahayupan; kag ang ngalan sang iya utod nga lalaki amo si Jubal nga amay sang tanan nga nagagamit sang arpa kag plawta.

46 Kag si Zilla, nagbun-ag man sia kay Tubal Cain, isa ka manunudlo sang tanan nga manugbuhat sa saway kag salsalon. Kag ang utod nga babayi ni Tubal Cain gintawag nga Naama.

47 Kag nagsiling si Lamec sa iya mga asawa nga sanday Ada kag Zilla: Pamati sa akon tingug, kamo nga mga asawa ni Lamec, dungga ang akon ginahambal; kay nakapatay ako sang tawo sa pagpilas sa akon, kag pamatan-on nga lalaki sa pagsakit sa akon.

48 Kon si Cain itimalus sing makapito, sa pagkamatuod si Lamec makasitenta kag pito;

49 Kay nagsulod si Lamec sa isa ka kasugtanan kay Satanas, suno sa paagi ni Cain, sa diin nangin Agalon Mahan sia, agalon sinang dako nga sekreto nga ginpasumpaan kay Cain ni Satanas; kag si Irad, ang anak nga lalaki ni Enoc, nga nakahibalo sang ila sekreto, nagsugod sa pagpanugid sini sa mga anak nga lalaki ni Adan;

50 Gani si Lamec, bangod kay akig, nagpatay sa iya, indi pareho sa kay Cain sa iya utod nga si Abel agud mag-agom sing daug, kundi nga ginpatay niya sia bangod sang sinumpaan.

51 Kay, halin sa mga adlaw ni Cain, nagluntad ang sekreto nga pagkunsabo, kag ang ila mga buhat yara sa kadulom, kag kilala nila ang tagsa ka tawo nga ila kaupod.

52 Gani ginsumpa sang Ginuo si Lamec, kag ang iya panimalay, kag tanan sila nga nakighisugot kay Satanas; kay wala sila nagtuman sang mga kasugoan sang Dios, kag naakig ang Dios kag wala sia nagbulig sa ila, kag ang ila mga buhat mga kangil-aran kag nagsugod sa paglapta sa mga anak nga lalaki sang katawhan. Kag sa tunga ini sang mga anak nga lalaki sang katawhan.

53 Kag sa tunga sang mga anak nga babayi sang katawhan, wala ginhambalan ining mga butang bangod nga si Lamec nagsugid sang sekreto sa iya mga asawa kag nagrebelde sila sa iya kag ginpanugid ang mga ini sa gwa, kag wala sing kaluoy;

54 Gani si Lamec ginkaugtan kag ginsikway kag wala nagsimpon sa mga anak nga lalaki sang katawhan, kay basi mapatay sia.

55 Kag sa amo nga paagi nagsugod sa paglapta ang mga buhat sang kadulom sa tunga sang tanan nga anak nga lalaki sang katawhan.

56 Kag ginsumpa sang Dios ang duta sing masakit nga sumpa, kag naakig sa mga malain, upod sa tanan nga anak nga lalaki sang katawhan nga iya gintuga;

57 Kay indi sila magpamati sa iya tingug, ukon magpati sa iya Bugtong nga Anak, nga iya ginpahayag nga magaabot sa kasagsagan sang panahon, nga ginhanda antes pa sa pagtuga sang kalibutan.

58 Kag gani nagsugod nga iwali ang Ebanghelyo halin sa ginsuguran, nga ginpahayag sang balaan nga mga anghel nga ginpadala halin sa presensya sang Dios, kag paagi sa iya kaugalingon nga tingug, kag paagi sa dulot sang Balaan nga Espiritu.

59 Kag gani ginpalig-on ang tanan nga butang kay Adan, paagi sa balaan nga ordinansa, kag ginwali ang Ebanghelyo, kag ginpagwa ang isa ka mando nga magapabilin ini sa kalibutan tubtob sa katapusan sini; kag gani nangin amo sini. Amen.