1 Kag si Adan nagpamati sa tingug sang Dios, kag nagpanawag sa iya mga anak nga lalaki nga maghinulsol.

2 Kag lubos nga ginkilala liwat ni Adan ang iya asawa, kag nagbun-ag sia sang anak nga lalaki kag gintawag ang iya ngalan nga Set. Kag ginhimaya ni Adan ang ngalan sang Dios; kay siling niya: Ginhatagan ako sang Dios sang isa pa ka anak, sa lugar ni Abel nga ginpatay ni Cain.

3 Kag ang Dios nagpahayag sang iya kaugalingon kay Set, kag wala sia nagrebelde, kundi naghalad sang nagakaigo nga sakripisyo, pareho sa iya utod nga si Abel. Kag sa iya man natawo ang isa ka anak nga lalaki, kag gintawag ang iya ngalan nga Enos.

4 Kag dayon nagsugod ining mga tawo sa pagtawag sa ngalan sang Ginuo, kag ang Ginuo nagpakamaayo sa ila;

5 Kag isa ka libro sang handumanan ang ginsulat sa lengguahe ni Adan, kay ginhatag ini sa tanan nga nagpanawag sa Dios agud makasulat paagi sa espiritu sang inspirasyon;

6 Kag paagi sa ila ang ila mga anak natudloan sa pagbasa kag pagsulat, nga may lengguahe nga putli kag matinlo.

7 Karon ining amo man nga Pagkapari, nga halin sa ginsuguran, mangin sa katapusan man sang kalibutan.

8 Karon ining propesiya ginhambal ni Adan, samtang natandog sia sang Balaan nga Espiritu, kag isa ka lista sang kaliwatan ang ginsulat parte sa mga anak sang Dios. Kag ini amo ang libro sang kaliwatan ni Adan nga nagasiling: Sa adlaw nga gintuga sang Dios ang tawo, kaangay sa Dios ginhimo niya sia;

9 Sa dagway sang iya kaugalingon nga lawas, lalaki kag babayi, ginhimo niya sila, kag ginpakamaayo sila, kag gintawag ang ila ngalan Adan, sa adlaw nga gintuga sila kag nangin buhi nga mga kalag sa duta nga palatungan sang tiil sang Dios.

10 Kag si Adan nagkabuhi sing isa ka gatos kag treynta ka tuig, kag nangin amay sang isa ka anak nga lalaki nga kaangay sa iya, pareho sa iya dagway, kag gintawag ang iya ngalan Set.

11 Kag ang mga adlaw ni Adan, pagkatapos nga nangin amay sia ni Set, walo ka gatos ka tuig, kag nangin amay sia sang madamo nga anak nga lalaki kag anak nga babayi;

12 Kag ang kabug-osan sang mga adlaw nga nagkabuhi si Adan siyam ka gatos kag treynta ka tuig, kag napatay sia.

13 Si Set nagkabuhi sing isa ka gatos kag lima ka tuig, kag nangin amay ni Enos, kag nagpropesiya sia sa tanan niya nga adlaw, kag nagtudlo sa iya anak nga si Enos sa mga dalanon sang Dios; gani si Enos nagpropesiya man.

14 Kag si Set nagkabuhi pagkatapos nga nangin amay sia ni Enos, sing walo ka gatos kag pito ka tuig, kag nangin amay sing madamo nga anak nga lalaki kag anak nga babayi.

15 Kag ang mga anak sang tawo nangin tama kadamo sa bug-os nga ibabaw sang duta. Kag sa sinang mga adlaw si Satanas may dako nga gahum sa mga tawo, kag nagsingkal sa ila mga tagipusuon; kag sumugod sa sina nga tion natabo ang mga pag-ilinaway kag pagpaagay sang dugo; kag ang kamot sang tawo naalsa batok sa iya kaugalingon nga utod, sa pagdapat sang kamatayon, bangod sang sekreto nga mga buhat, nga nagatinguha sa pag-angkon sang gahum.

16 Ang kabug-osan sang mga adlaw ni Set siyam ka gatos kag dose ka tuig, kag napatay sia.

17 Kag si Enos nagkabuhi sing nobenta ka tuig kag natawo si Cainan. Kag si Enos kag ang nagkalabilin nga katawhan sang Dios naghalin sa duta, nga ginatawag Shulon, kag nagpuyo sa isa ka duta sang panaad, nga ginsunod sa ngalan sang iya anak, nga iya ginngalanan nga Cainan.

18 Kag si Enos nagkabuhi, pagkatapos nga nangin amay sia ni Cainan, sing walo ka gatos kag kinse ka tuig, kag nangin amay sing madamo nga anak nga lalaki kag anak nga babayi. Kag ang kabug-osan sang mga adlaw ni Enos siyam ka gatos kag lima ka tuig, kag napatay sia.

19 Kag si Cainan nagkabuhi sing sitenta ka tuig, kag nangin amay ni Mahalalel; kag si Cainan nagkabuhi pagkatapos nga natawo si Mahalalel sing walo ka gatos kag kwarenta ka tuig, kag nangin amay sang madamo nga anak nga lalaki kag anak nga babayi. Kag ang kabug-osan sang mga adlaw ni Cainan siyam ka gatos kag napulo ka tuig, kag napatay sia.

20 Kag si Mahalalel nagkabuhi sing sisenta’y-singko ka tuig, kag nangin amay ni Jared; kag si Mahalalel nagkabuhi pagkatapos nga natawo si Jared sing walo ka gatos kag treynta ka tuig kag nangin amay sang mga anak nga lalaki kag mga anak nga babayi. Kag ang kabug-osan sang mga adlaw ni Mahalalel, walo ka gatos kag nobenta’y-singko ka tuig, kag napatay sia.

21 Kag si Jared nagkabuhi sing isa ka gatos kag sisenta’y-dos ka tuig, kag nangin amay ni Enoc; kag si Jared nagkabuhi pagkatapos nga natawo si Enoc sing walo ka gatos ka tuig, kag nangin amay sang mga anak nga lalaki kag mga anak nga babayi. Kag gintudloan ni Jared si Enoc sa tanan nga dalanon sang Dios.

22 Kag ini ang lista sang kaliwatan sang mga anak ni Adan, nga anak sang Dios, kon kay sin-o ang Dios mismo, nagpakigsugilanon.

23 Kag mga manugwali sila sang pagkamatarong, kag nagbantala kag nagpropesiya, kag nagtawag sa tanan nga tawo sa bisan diin nga maghinulsol; kag ang pagtuo gintudlo sa mga anak sang tawo.

24 Kag natabo ini nga ang kabug-osan sang mga adlaw ni Jared siyam ka gatos kag sisenta’y-dos ka tuig, kag napatay sia.

25 Kag si Enoc nagkabuhi sing sisenta’y-singko ka tuig, kag nangin amay ni Metusela.

26 Kag natabo ini nga si Enoc nagpanglakaton sa duta, sa tunga sang katawhan; kag samtang nagapanglakaton sia, ang Espiritu sang Dios nagpanaog halin sa langit, kag nagpabilin sa iya.

27 Kag nakabati sia sang tingug halin sa langit nga nagasiling: Enoc, anak ko, magpropesiya sa sining katawhan, kag magsiling sa ila—Maghinulsol kay ini ang siling sang Ginuo: Akig ako sa sining katawhan, kag ang mabangis ko nga kaakig nagadabadaba batok sa ila; kay ang ila mga tagipusuon nangin matig-a, kag ang ila mga dulunggan indi makabati, kag ang ila mga mata indi makakita sa malayo;

28 Kag sa sining madamo nga henerasyon sumugod sang adlaw nga gintuga ko sila, nagtalang sila, kag ginpanghiwala ako, kag nagsalig sa ila kaugalingon nga kaalam sing patago; kag sa ila kaugalingon nga mga kangil-aran nagpadihot sila sang mga pagpamatay, kag wala nagtuman sang mga kasugoan nga ginhatag ko sa ila amay nga si Adan.

29 Gani, nagpasumpa sila sang ila mga kaugalingon sing butig kag paagi sa ila mga sumpa, nagdala sila sa ila mga kaugalingon sang kamatayon; kag isa ka impiyerno ang ginhanda ko para sa ila, kon indi sila maghinulsol;

30 Kag isa ini ka mando nga ginpagwa ko sa pagsugod sang kalibutan, halin sa akon kaugalingon nga baba, halin sa pagtuga sini, kag paagi sa mga baba sang akon mga alagad nga imo mga amay, ginmando ko ini, bisan pa nga ipalapnag ini sa kalibutan, tubtob sa mga punta sini.

31 Kag sang nabatian ni Enoc ining mga pulong, nagluhod kag nagduko sia sa duta, sa atubang sang Ginuo, kag naghambal sa Ginuo nga nagasiling: Ngaa bala nga nakaagom ako sing kahamuot sa imo panulok, kag bata lang ako, kag ang tanan nga tawo naugot sa akon; kay ako indi maayo maghambal; gani, ngaa ako ang imo alagad?

32 Kag ang Ginuo nagsiling kay Enoc: Maglakat kag himoa ang ginsugo ko sa imo, kag wala sang tawo nga mapilas sa imo. Buksi ang imo baba, kag mapuno ini, kag hatagan ko ikaw sang inughambal, kay ang tanan nga unod yara sa akon mga kamot, kag himuon ko ang kon ano ang nagakaigo para sa akon.

33 Hambala ining katawhan: Magpili kamo sini nga adlaw nga mag-alagad sa Ginuong Dios nga naghimo sa inyo.

34 Tan-awa ang akon Espiritu yara sa imo, gani ang tanan mo nga pulong akon pakamatarongon; kag ang mga bukid madula sa imo atubang, kag ang mga suba magaliso sa ila alagyan; kag magapabilin ka sa akon, kag ako sa imo; gani maglakat upod sa akon.

35 Kag ang Ginuo naghambal kay Enoc kag nagsiling sa iya: Haplasi ang imo mga mata sing daga, kag hinawi ang mga ini, kag makakita ka. Kag ginhimo niya.

36 Kag nakita niya ang mga espiritu nga gintuga sang Dios; kag nakita man niya ang mga butang nga indi makita sang tawhanon nga mata; kag sumugod sa sina nga tion, naglapnag ang balita sa duta: Isa ka manugpanan-aw ang ginbangon sang Ginuo para sa iya katawhan.

37 Kag natabo ini nga si Enoc naglibot sa duta, sa tunga sang katawhan, nga nagatindog sa mga bungyod kag matag-as nga mga lugar, kag nagawali sing may mabaskog nga tingug, nga nagasaksi batok sa ila mga binuhatan; kag ang tanan nga tawo nasaklaw tungod sa iya.

38 Kag naggwa sila sa pagpamati sa iya, sa matag-as nga mga lugar nga nagasiling sa mga manugbantay sang tolda: Pabilin kamo diri kag bantayi ang mga tolda, samtang makadto kami didto agud makita ang manugpanan-aw, kay nagapropesiya sia kag may di-kinaandan nga hitabo sa duta; may tawo nga buang nga nag-abot sa tunga naton.

39 Kag natabo ini nga sang nabatian nila sia, wala sing may nagdakop sa iya; kay hinadlokan ang tanan nga nakabati sa iya; kay naglakat sia upod sa Dios.

40 Kag may tawo nga nagpalapit sa iya nga ang ngalan si Mahija, kag nagsiling sa iya: Sugiri kami sing matuod kon sin-o ka bala kag kon diin ka naghalin?

41 Kag nagsiling sia sa ila: Naghalin ako sa duta sang Cainan, ang duta sang akon mga amay, isa ka duta sang pagkamatarong tubtob sini nga adlaw. Kag ang akon amay nagtudlo sa akon sa tanan nga dalanon sang Dios.

42 Kag natabo ini nga samtang nagapanglakaton ako halin sa duta sang Cainan, sa baybay nayon sa este, nakakita ako sang panan-awon; kag yari karon, ang mga langit nakita ko, kag ang Ginuo nakighambal sa akon kag naghatag sa akon sang kasugoan; gani, sa sining rason, agud matuman ang kasugoan, ginabantala ko ining mga pulong.

43 Kag si Enoc nagpadayon sa iya pagpamulong nga nagasiling: Ang Ginuo nga nakighambal sa akon, amo man ang Dios sang langit kag sia ang akon Dios, kag inyo Dios, kag kamo mga utod ko, kag ngaa bala kamo nagasalig sa inyo kaugalingon nga kaalam, kag ginapanghiwala ang Dios sang langit?

44 Ang mga langit iya ginhimo; ang duta iya palatungan sang tiil; kag ang pundasyon sini iya. Tan-awa, iya ini ginpahamtang, tuman kadamo nga tawo ang iya gindala sa ibabaw sini.

45 Kag ang kamatayon nag-abot sa aton mga amay; wala’y sapayan kilala naton sila, kag indi mapanghiwala, kag sa pagkamatuod ang una sa tanan aton kilala, bisan pa si Adan.

46 Kay isa ka libro sang handumanan ang aton ginsulat sa tunga naton, suno sa sulundan nga ginhatag paagi sa tudlo sang Dios; kag ginhatag ini sa aton kaugalingon nga lengguahe.

47 Kag samtang si Enoc nagabantala sang mga pulong sang Dios, ang mga tawo nagkurog, kag indi makaagwanta sang iya presensya.

48 Kag nagsiling sia sa ila: Bangod nga si Adan nahulog, buhi kita; kag bangod sa iya pagkahulog nag-abot ang kamatayon; kag nahimo kita nga mga umalambit sang kalisud kag kasubo.

49 Tan-awa si Satanas nakigsimpon sa mga anak sang tawo, kag nagatentar sa ila sa pagsimba sa iya; kag ang mga tawo nangin dutan-on, lawasnon, kag yawan-on, kag gintabog halin sa presensya sang Dios.

50 Apang ang Dios nagpahayag sa aton mga amay nga ang tanan nga tawo dapat maghinulsol.

51 Kag nagtawag sia sa aton amay nga si Adan paagi sa iya kaugalingon nga tingug nga nagasiling: Ako ang Dios; ginhimo ko ang kalibutan, kag ang mga tawo antes sila nangin unod.

52 Kag nagsiling man sia sa iya: Kon magbalik kamo sa akon, kag magpamati sa akon tingug, kag magpati, kag maghinulsol sang tanan ninyo nga mga kalapasan, kag magpabunyag, bisan pa sa tubig, sa ngalan sang akon Bugtong nga Anak, nga puno sang grasya kag kamatuoran, nga si Jesucristo, ang nagaisahanon nga ngalan nga ihatag sa idalom sang langit, nga paagi sini ang kaluwasan maangkon sang mga anak sang tawo, mabaton ninyo ang dulot sang Balaan nga Espiritu, kag magpangayo sang tanan nga butang sa iya ngalan, kag ang bisan ano nga inyo pangayuon, ihatag sa inyo.

53 Kag ang aton amay nga si Adan naghambal sa Ginuo, kag nagsiling: Ngaa bala ang mga tawo kinahanglan maghinulsol kag bunyagan sa tubig? Kag ang Ginuo nagsiling kay Adan: Tan-awa, ginpatawad ko na ikaw sang imo kalapasan sa Hardin sang Eden.

54 Sa sini naglapta ang balita sa katawhan, nga ang Anak sang Dios nagbayad-sala para sa una nga kabasulanan, sa diin ang mga sala sang mga ginikanan indi mahimo nga sabton sa mga ulo sang mga anak, kay matinlo sila halin pa sa pagtuga sang kalibutan.

55 Kag ang Ginuo naghambal kay Adan nga nagasiling: Bangod ang imo mga anak nabun-ag sa sala, sa amo man kon magdalagko sila, ang sala magatubo sa ila mga tagipusuon, kag matilawan nila ang mapait, agud makahibalo sila sa pagpakamahal sang maayo.

56 Kag ginhatag sa ila ang paghibalo sang maayo sa malain; gani sila hilway sa pagpili para sa ila mga kaugalingon, kag ginhatagan ko kamo sang isa pa ka layi kag kasugoan.

57 Gani, itudlo sa inyo mga anak nga ang tanan nga tawo sa bisan diin, kinahanglan maghinulsol, kay indi gani, indi gid sila makapanubli sang ginharian sang Dios, kay wala sang mahigko nga butang nga makapuyo didto ukon makapuyo sa iya presensya; kay, sa lengguahe ni Adan, Tawo sang Pagkabalaan ang iya ngalan kag ang ngalan sang iya Bugtong nga Anak amo ang Anak sang Tawo, bisan pa si Jesucristo, isa ka matarong nga Hukom, nga magakari sa kasagsagan sang panahon.

58 Gani ginahatag ko sa inyo ang isa ka kasugoan, nga itudlo ninyo ining mga butang sing hilway sa inyo mga anak, nga nagasiling:

59 Nga bangod sang paglapas nag-abot ang pagkahulog, nga nagdala sang kamatayon, kag bangod natawo kamo sa kalibutan paagi sa tubig, kag dugo, kag espiritu, nga ginhimo ko, kag gani halin sa yab-ok nangin buhi nga kalag, sa amo man kinahanglan nga kamo mabun-ag liwat sa ginharian sang langit, paagi sa tubig, kag sa Espiritu, kag matinloan paagi sa dugo, bisan pa ang dugo sang akon Bugtong nga Anak; agud nga matinloan kamo halin sa tanan nga sala, kag magkalipay sa mga pulong sang kabuhi nga wala’y katapusan sa sini nga kalibutan kag kabuhi nga wala’y katapusan sa kalibutan nga magaabot, bisan pa himaya nga wala’y untat;

60 Kay paagi sa tubig ginatuman ninyo ang kasugoan; paagi sa Espiritu ginapakamatarong kamo, kag paagi sa dugo ginapakabalaan kamo;

61 Gani, ginahatag ini agud magpabilin sa inyo; ang saksi sang langit; ang Manugpasulhay; ang mahidaeton nga mga butang sang himaya nga wala’y untat; ang kamatuoran sang tanan nga butang; inang nagapadasig sa tanan nga butang, nga nagahatag kabuhi sa tanan nga butang; inang nakahibalo sang tanan nga butang, kag may tanan nga gahum suno sa kaalam, kaluoy, kamatuoran, hustisya kag paghukom.

62 Kag karon, tan-awa, ginasiling ko sa inyo: Ini ang plano sang kaluwasan sa tanan nga tawo, paagi sa dugo sang akon Bugtong nga Anak, nga magakari sa kasagsagan sang panahon.

63 Kag karon, ang tanan nga butang may ila mga kaangay, kag ang tanan nga butang gintuga kag ginhimo agud magsaksi sa akon, mga butang nga dutan-on kag mga butang nga espirituhanon; mga butang sa kalangitan sa ibabaw, kag mga butang sa duta, kag mga butang sa dulonan sang duta, kag mga butang sa idalom sang duta, sa ibabaw kag sa idalom: ang tanan nga butang nagasaksi sa akon.

64 Kag natabo ini nga sang nakighambal ang Ginuo kay Adan nga aton amay, nga si Adan nagpangamuyo sa Ginuo, kag ginsabnit sia sang Espiritu sang Ginuo, kag gindala paidalom sa tubig, kag gintugmaw sa tubig, kag ginpabutwa halin sa tubig.

65 Kag sa amo nga paagi nabunyagan sia, kag ang Espiritu sang Dios nagpanaog sa iya, kag gani nabun-ag sia sa Espiritu, kag napadasig ang tawo nga nasulod.

66 Kag nakabati sia sang tingug halin sa langit nga nagasiling: Nabunyagan ka sa kalayo, kag sa Balaan nga Espiritu. Ini ang saksi sang Amay, kag sang Anak, sugod subong kag tubtob sa wala’y katapusan;

67 Kag ikaw miyembro suno sa paagi niya nga wala sing ginsuguran sang mga adlaw ukon katapusan sang mga tinuig, halin sa bug-os nga wala’y katapusan tubtob sa bug-os nga wala’y katapusan.

68 Tan-awa, nagaisa ka sa akon, anak ka sang Dios; kag sa amo, ang tanan mahimo mangin akon mga anak. Amen.