1 Pea ko e ngaahi ʻaho kotoa ʻo ʻĪnoké ko e taʻu ʻe fāngeau tolungofulu.

2 Pea naʻe hoko ʻo pehē ko Mētusela, ko e foha ʻo ʻĪnoké, naʻe ʻikai ʻave ia, koeʻuhí ke lava ʻo fakahoko ʻa e ngaahi fuakava ʻa e ʻEikí, ʻa ia naʻá ne fai kia ʻĪnoké; he naʻá ne fuakava moʻoni mo ʻĪnoke ʻe tupu ʻa Noa ʻi he fua ʻo hono manavá.

3 Pea naʻe hoko ʻo pehē, naʻe kikiteʻi ʻe Mētusela ʻo pehē ʻe tupu mei hono manavá ʻa e ngaahi puleʻanga kotoa pē ʻo e māmaní (ʻo fou ʻia Noa), pea naʻá ne toʻo kiate ia ʻa e nāunaú.

4 Pea naʻe hoko mai ha fuʻu honge ʻi he fonuá, pea naʻe fakamalaʻiaʻi ʻe he ʻEikí ʻa e fonuá ʻaki ha malaʻia lahi, pea naʻe mate ʻa e tokolahi ʻo hono kakaí.

5 Pea naʻe hoko ʻo pehē, naʻe moʻui ʻa Mētusela ʻi he taʻu ʻe teau valungofulu mā fitu, peá ne fakatupu ʻa Lēmeki;

6 Pea naʻe moʻui ʻa Mētusela hili ʻene fakatupu ʻa Lēmekí, ʻi he taʻu ʻe fitungeau valungofulu mā ua, peá ne fakatupu ʻa e ngaahi foha mo e ngaahi ʻofefine;

7 Pea ko e ngaahi ʻaho kotoa ʻo Mētuselá ko e taʻu ʻe hivangeau onongofulu mā hiva, peá ne pekia.

8 Pea naʻe moʻui ʻa Lēmeki ʻi he taʻu ʻe teau valungofulu mā ua, peá ne fakatupu ha foha,

9 Pea naʻá ne ui ʻa hono hingoá ko Noa, ʻo pehē: ʻE fakafiemālieʻi ʻa kitautolu ʻe he fohá ni ʻi heʻetau ngāué mo e ongosia ʻa hotau nimá, koeʻuhí ko e kelekele ʻa ia kuo fakamalaʻiaʻi ʻe he ʻEikí.

10 Pea naʻe moʻui ʻa Lēmeki hili ʻene fakatupu ʻa Noá, ʻi he taʻu ʻe nimangeau hivangofulu mā nima, peá ne fakatupu ʻa e ngaahi foha mo e ngaahi ʻofefine;

11 Pea ko e ngaahi ʻaho kotoa ʻo Lēmekí ko e taʻu ʻe fitungeau fitungofulu mā fitu, peá ne pekia.

12 Pea naʻe taʻu ʻe fāngeau mā nimangofulu ʻa e motuʻa ʻo Noá, peá ne fakatupu ʻa Sēfeti; pea ʻi he taʻu ʻe fāngofulu mā ua mei ai naʻá ne fakatupu ʻa Semi ʻiate ia ko e faʻē ʻa Sēfetí, pea ʻi hono taʻu nimangeaú naʻá ne fakatupu ʻa Hami.

13 Pea naʻe fakaongo ʻa Noa mo hono ngaahi fohá ki he ʻEikí, mo nau tokanga, pea naʻe ui ʻa kinautolu ko e ngaahi foha ʻo e ʻOtuá.

14 Pea ʻi he kamata ʻa e kau tangatá ni ke fakatokolahi ʻi he funga ʻo e māmaní, pea fanauʻi kiate kinautolu ʻa e ngaahi ʻofefine, naʻe vakai ʻe he ngaahi foha ʻo e tangatá ʻoku hoihoifua ʻa e ngaahi ʻofefine ko iá, pea nau maʻu ʻa kinautolu ko honau ngaahi uaifi, ʻo fakatatau ki honau lotó.

15 Pea folofola ʻa e ʻEikí kia Noa: Kuo fakatau atu ʻa kinautolu ʻe he ngaahi ʻofefine ʻo ho ngaahi fohá; he vakai kuo tupu ʻa ʻeku ʻitá ki he ngaahi foha ʻo e tangatá, he ʻoku ʻikai te nau fie tokanga ki hoku leʻó.

16 Pea naʻe hoko ʻo pehē naʻe kikite ʻa Noa, peá ne akonaki ʻaki ʻa e ngaahi meʻa ʻa e ʻOtuá, ʻio ʻo hangē ko ia naʻe ʻi he kamataʻangá.

17 Pea folofola ʻa e ʻEikí kia Noa: ʻE ʻikai fāinga maʻu ai pē ʻa hoku Laumālié mo e tangatá, he te ne ʻilo ʻe mate ʻa e kakano kotoa pē; ka ko hono ngaahi ʻahó ko e taʻu ʻe teau mā uofulu; pea kapau ʻe ʻikai fakatomala ʻa e tangatá, te u fekau atu ʻa e ngaahi lōmakí kiate kinautolu.

18 Pea ʻi he ngaahi ʻaho ko iá naʻe ʻi ai ʻa e kakai lalahi ʻi he māmaní, pea nau kumi kia Noa ke toʻo ʻene moʻuí; ka naʻe ʻia Noa ʻa e ʻEikí, pea naʻe ʻiate ia ʻa e mālohi ʻo e ʻEikí.

19 Pea naʻe fakanofo ʻe he ʻEikí ʻa Noa ʻo fakatatau ki hono lakanga ʻoʻoná, peá ne fekau kiate ia ke ne ʻalu atu ʻo fakahā ʻene Ongoongoleleí ki he fānau ʻa e tangatá, ʻio ʻo fakatatau ki he meʻa naʻe tuku kia ʻĪnoké.

20 Pea naʻe hoko ʻo pehē naʻe ui atu ʻa Noa ki he fānau ʻa e tangatá ke nau fakatomala; ka naʻe ʻikai te nau tokanga ki heʻene ngaahi leá;

21 Pea ko e tahá foki, hili ʻenau fanongo kiate iá, naʻa nau haʻu ki hono ʻaó ʻo pehē ange: Vakai, ko e ngaahi foha ʻo e ʻOtua ʻa kimautolu; ʻikai koā kuo mau maʻu kiate kimautolu ʻa e ngaahi ʻofefine ʻo e tangatá? Pea ʻikai koā ʻoku mau kai mo inu, mo mali mo foaki ke mali? Pea ʻoku fāʻeleʻi kiate kimautolu ʻe homau ngaahi uaifí ʻa e fānau pea ko e kau tangata kaukaua ʻa kinautolu, ʻa ia ʻoku nau tatau mo e kau tangata ʻi muʻá, ko e kau tangata ongoongoa lahi. Pea naʻe ʻikai te nau tokanga ki he ngaahi lea ʻa Noá.

22 Pea naʻe ʻafioʻi ʻe he ʻOtuá kuo hoko ʻo fuʻu hulu ʻi he māmaní ʻa e fai angahala ʻa e kakaí; pea kuo hīkisia ʻa e tangata kotoa pē ʻi he filioʻi ʻo e ngaahi mahalo ʻo hono lotó, ʻa ia ko e kovi ia maʻu ai pē.

23 Pea naʻe hoko ʻo pehē naʻe fai atu ʻe Noa ʻa ʻene malanga ki he kakaí, ʻo pehē: Tokanga mai, pea talangofua ki heʻeku ngaahi leá;

24 Mou tui pea fakatomala mei hoʻomou ngaahi angahalá, pea papitaiso ʻi he huafa ʻo Sīsū Kalaisí, ko e ʻAlo ʻo e ʻOtuá, ʻo hangē foki ko ʻetau ngaahi tamaí, pea te mou maʻu ʻa e Laumālie Māʻoniʻoní, koeʻuhí ke fakahā kiate kimoutolu ʻa e ngaahi meʻa kotoa pē; pea kapau ʻe ʻikai te mou fai ʻeni, ʻe hoko mai ʻa e ngaahi lōmaki kiate kimoutolu, ka neongo iá naʻe ʻikai te nau tokanga.

25 Pea naʻe fakatomala ʻa Noa, pea naʻe mamahi ʻa hono lotó koeʻuhí ko e fakatupu ʻe he ʻEikí ʻa e tangatá ʻi he māmaní, pea naʻe fakamamahiʻi ʻa hono lotó.

26 Pea folofola ʻa e ʻEikí: Te u fakaʻauha ʻa e tangata ʻa ia kuó u fakatupú, mei he funga ʻo e māmaní, ʻa e tangatá mo e fanga manú fakatouʻosi, pea mo e fanga manu totoló, mo e fanga manupuna ʻo e ʻataá; he naʻe fakatomala ʻa Noa ʻi heʻeku fakatupu ʻa kinautolú, pea mo ʻeku ngaohi ʻa kinautolú; pea kuó ne ui kiate au; he kuo nau kumi ki heʻene moʻuí.

27 Pea ko ia naʻe maʻu ʻe Noa ʻa e ʻofa ʻi he ʻao ʻo e ʻEikí, he ko e tangata angatonu ʻa Noa, mo haohaoa ʻi hono toʻu tangatá; pea naʻá ne ʻaʻeva mo e ʻOtuá, ʻo hangē foki ko hono ngaahi foha ʻe toko tolú, ʻa Semi, Hami, mo Sēfetí.

28 Naʻe fakalielia ʻa e māmaní ʻi he ʻao ʻo e ʻOtuá, pea naʻe fonu ia ʻi he fai fakamālohi.

29 Pea naʻe ʻafio ʻa e ʻOtuá ki he māmaní, pea vakai, kuo fakalielia ia, he kuo hanga ʻe he kakano kotoa pē ʻo ngaohi ke fakalielia ʻa hono halá ʻi he māmaní.

30 Pea folofola ʻa e ʻOtuá kia Noa: Kuo ʻi hoku ʻaó ʻa e ngataʻanga ʻo e kakano kotoa pē, he kuo fonu ʻa e māmani ʻi he fakamālohi, pea vakai, te u fakaʻauha ʻa e kakano kotoa pē mei he funga ʻo e māmaní.