1 Kag ang tanan nga adlaw ni Enoc apat ka gatos kag treynta ka tuig.

2 Kag natabo ini nga si Metusela, ang anak nga lalaki ni Enoc, wala gindala sa sabak sang Dios, agud nga matuman ang kasugtanan sang Ginuo nga ginhimo niya kay Enoc; kay sa pagkamatuod nakighisugot sia kay Enoc nga si Noe mangin bunga sang iya balikawang.

3 Kag natabo ini nga nagpropesiya si Metusela nga halin sa iya balikawang magahalin ang tanan nga ginharian sang duta (paagi kay Noe), kag ginhimaya niya ang iya kaugalingon.

4 Kag may nag-abot nga tuman nga tiggulutom sa duta, kag ginsumpa sang Ginuo ang duta sing masakit nga sumpa, kag madamo sa mga pumuluyo sini ang nagkalamatay.

5 Kag natabo ini nga nagkabuhi si Metusela sing isa ka gatos kag otsenta’y-siyete ka tuig, kag nangin amay sia ni Lamec;

6 Kag nagkabuhi si Metusela pagkatapos nga natawo si Lamec, sing pito ka gatos kag otsenta’y-dos ka tuig, kag nangin amay sia sang mga anak nga lalaki kag mga anak nga babayi;

7 Kag ang tanan nga adlaw ni Metusela siyam ka gatos kag sisenta’y-nuebe ka tuig, kag napatay sia.

8 Kag nagkabuhi si Lamec sing isa ka gatos kag otsenta’y-dos ka tuig, kag nangin amay sia sang isa ka anak nga lalaki,

9 Kag gintawag niya ang iya ngalan nga Noe, nga nagasiling: Ini nga anak magapaumpaw sa aton parte sa aton buluhaton kag pagpangabudlay sang aton mga kamot, bangod sang duta nga ginsumpa sang Ginuo.

10 Kag nagkabuhi si Lamec pagkatapos nga natawo si Noe, sing lima ka gatos kag nobenta’y-singko ka tuig, kag nangin amay sang mga anak nga lalaki kag mga anak nga babayi;

11 Kag ang tanan nga adlaw ni Lamec pito ka gatos kag sitenta’y-siyete ka tuig, kag napatay sia.

12 Kag si Noe apat ka gatos kag singkwenta ka tuig, kag nangin amay ni Jafet; kag kwarenta’y-dos ka tuig pagkatapos, nangin amay sia ni Sem paagi sa iya nga iloy ni Jafet, kag sang lima ka gatos sia ka tuig, nangin amay sia ni Ham.

13 Kag si Noe kag iya mga anak nga lalaki nagpamati sa Ginuo kag nagsunod sa iya, kag gintawag sila nga mga anak sang Dios.

14 Kag sang nagsugod ining mga tawo sa pagdamo sa ibabaw sang duta kag natawo ang mga anak nga babayi sa ila, nakita sang mga anak nga lalaki sang katawhan nga matahum inang mga anak nga babayi, kag ginpangasawa nila kon sin-o ang ila napilian.

15 Kag ang Ginuo nagsiling kay Noe: Ginbaligya sang mga anak nga babayi sang imo mga anak nga lalaki ang ila mga kaugalingon; kay tan-awa ang akon kaakig nagadabadaba batok sa mga anak sang katawhan, kay indi sila magpamati sa akon tingug.

16 Kag natabo ini nga nagpropesiya si Noe, kag nagpanudlo sang mga butang sang Dios bisan pa pareho sa ginsuguran.

17 Kag nagsiling ang Ginuo kay Noe: Ang akon Espiritu indi dalayon nga mag-impluwensya sa tawo, kay mahibaloan niya nga ang tanan nga unod mapatay; apang ang iya mga adlaw mangin isa ka gatos kag beynte ka tuig; kag kon indi maghinulsol ang mga tawo, ipadala ko ang mga baha sa ila.

18 Kag sa sadtong mga adlaw may mga higante sa duta, kag gintinguhaan nila si Noe nga kuhaon ang iya kabuhi; apang kaupod ni Noe ang Ginuo, kag ang gahum sang Ginuo yara sa iya.

19 Kag ang Ginuo nag-ordin kay Noe suno sa iya kaugalingon nga paagi sang pagkapari, kag ginsugo sia nga maglakat kag ipahayag ang iya Ebanghelyo sa mga anak sang katawhan, pareho nga ginmando ini kay Enoc.

20 Kag natabo ini nga nagpanawag si Noe sa mga anak sang katawhan nga dapat sila maghinulsol; apang wala sila nagpamati sa iya mga pulong;

21 Kag amo man, pagkatapos nga nabatian sia nila, nagpalapit sila sa iya nga nagasiling: Tan-awa, mga anak kami sang Dios; wala bala kami nagapangasawa sang mga anak sang katawhan? Kag wala bala kami nagakaon kag nagainom, kag nagapangasawa kag nagahatag sa pagpamana? Kag ang amon mga asawa nagabun-ag sa amon sang mga anak, kag gamhanan sila nga mga tawo, nga pareho sa mga tawo sang dumaan nga panahon, mga tawo sang kabantugan. Kag wala sila nagpamati sa mga pulong ni Noe.

22 Kag nakita sang Dios nga masyado na ang kalainan sang mga tawo sa duta; kag ang tagsa ka tawo naalsa sa imahinasyon sang mga hunahuna sang iya tagipusuon, nga malain lang gid sing dalayon.

23 Kag natabo ini nga nagpadayon si Noe sa iya pagwali sa katawhan nga nagasiling: Magpamati, kag magsunod sa akon mga pulong;

24 Magpati kag maghinulsol sang inyo mga sala kag magpabunyag sa ngalan ni Jesucristo, ang Anak sang Dios, pareho sang aton mga amay, kag mabaton ninyo ang Balaan nga Espiritu, agud nga ipahayag sa inyo ang tanan nga butang; kag kon indi ninyo paghimuon ini, pagalapawan kamo sang mga baha, apang wala sila nagpamati.

25 Kag nagpakalisud ini kay Noe, kag ang iya tagipusuon nagkasakit nga ginhimo sang Ginuo ang tawo sa duta kag nagkasubo sia sa tagipusuon.

26 Kag ang Ginuo nagsiling: Laglagon ko ang tawo nga akon gintuga, halin sa ibabaw sang duta, tawo man kag mga kasapatan, kag nagakamang nga mga tinuga, kag ang mga kapispisan sang kahanginan; kay nagapakalisud ini kay Noe nga gintuga ko sila, kag nga ginhimo ko sila; kag nagpanawag sia sa akon; kay gintinguhaan nila nga kuhaon ang iya kabuhi.

27 Kag gani nakaangkon si Noe sang kahamuot sa mga mata sang Ginuo; kay si Noe matarong nga tawo kag perpekto sa iya henerasyon; kag naglakat sia upod sa Dios, kag amo man ang iya tatlo ka anak nga lalaki nga sanday Sem, Ham, kag Jafet.

28 Kag malain ang duta sa panulok sang Dios kag napun-an ini sang kapintas.

29 Kag nagtulok ang Dios sa duta, kag tan-awa, malain ini, kay ang tanan nga unod naglakat sa dalanon sang kalainan sa duta.

30 Kag ang Dios nagsiling kay Noe: Ang katapusan sang tanan nga unod yara sa akon atubang, kay ang duta napuno sang kapintas, kag tan-awa, laglagon ko ang tanan nga unod halin sa ibabaw sang duta.