ບົດທີ 8
(ເດືອນກຸມພາ 1831)
ເມທູເຊລາທຳນາຍ—ໂນອາ ແລະ ພວກລູກຊາຍຂອງເພິ່ນສັ່ງສອນພຣະກິດຕິຄຸນ—ຄວາມຊົ່ວຮ້າຍອັນໃຫຍ່ຫລວງແຜ່ຂະຫຍາຍອອກໄປ—ການເອີ້ນໃຫ້ກັບໃຈຖືກເມີນເສີຍ—ພຣະເຈົ້າອອກຄຳສັ່ງໃຫ້ຄວາມພິນາດມາສູ່ເນື້ອໜັງທັງປວງໂດຍນ້ຳຖ້ວມ.
1 ແລະ ວັນເວລາທັງໝົດຂອງເອນົກຄືສີ່ຮ້ອຍສາມສິບປີ.
2 ແລະ ເຫດການໄດ້ບັງເກີດຂຶ້ນຄື ເມທູເຊລາ, ລູກຊາຍຂອງເອນົກ, ບໍ່ໄດ້ຖືກຮັບໄປ, ວ່າພັນທະສັນຍາ ຂອງພຣະຜູ້ເປັນເຈົ້າຈະສຳເລັດຄົບຖ້ວນ, ຊຶ່ງພຣະອົງໄດ້ເຮັດໄວ້ກັບເອນົກ; ເພາະວ່າພຣະອົງໄດ້ເຮັດພັນທະສັນຍາກັບເອນົກຢ່າງແທ້ຈິງວ່າ ໂນອາຈະມາຈາກຜົນແອວຂອງເພິ່ນ.
3 ແລະ ເຫດການໄດ້ບັງເກີດຂຶ້ນຄື ເມທູເຊລາໄດ້ທຳນາຍວ່າ ຈາກຜົນແອວຂອງລາວອານາຈັກຂອງແຜ່ນດິນໂລກ (ຜ່ານທາງໂນອາ) ຈະເກີດຂຶ້ນ, ແລະ ລາວຮັບຄຳຍ້ອງຍໍສັນລະເສີນໄວ້ກັບຕົນເອງ.
4 ແລະ ຄວາມອຶດຢາກອັນໃຫຍ່ຫລວງໄດ້ເກີດຂຶ້ນໃນແຜ່ນດິນ, ແລະ ພຣະຜູ້ເປັນເຈົ້າໄດ້ສາບແຊ່ງແຜ່ນດິນໂລກດ້ວຍການສາບແຊ່ງຢ່າງສາຫັດ, ແລະ ຜູ້ອາໄສຢູ່ໃນນັ້ນຕາຍໄປຢ່າງຫລວງຫລາຍ.
5 ແລະ ເຫດການໄດ້ບັງເກີດຂຶ້ນຄື ເມທູເຊລາມີອາຍຸໄດ້ໜຶ່ງຮ້ອຍແປດສິບເຈັດປີ, ແລະ ໄດ້ລູກຊາຍຊື່ລາເມັກ;
6 ແລະ ເມທູເຊລາໄດ້ມີຊີວິດຢູ່, ຫລັງຈາກລາວໄດ້ລາເມັກ, ເຈັດຮ້ອຍແປດສິບສອງປີ, ແລະ ໄດ້ມີລູກຊາຍ ແລະ ລູກສາວອີກຫລາຍຄົນ;
7 ແລະ ວັນເວລາທັງໝົດຂອງເມທູເຊລາຄືເກົ້າຮ້ອຍຫົກສິບເກົ້າປີ, ແລະ ລາວໄດ້ຕາຍໄປ.
8 ແລະ ລາເມັກມີອາຍຸໄດ້ໜຶ່ງຮ້ອຍແປດສິບສອງປີ, ແລະ ໄດ້ມີລູກຊາຍຄົນໜຶ່ງ,
9 ແລະ ລາວເອີ້ນຊື່ຂອງລາວວ່າ ໂນອາ, ໂດຍກ່າວວ່າ: ລູກຄົນນີ້ຈະປອບໂຍນພວກເຮົາກ່ຽວກັບວຽກງານຂອງພວກເຂົາ ແລະ ຄວາມລຳບາກຂອງມືຂອງພວກເຮົາ, ເນື່ອງດ້ວຍພື້ນດິນຊຶ່ງພຣະຜູ້ເປັນເຈົ້າໄດ້ ສາບແຊ່ງ.
10 ແລະ ລາເມັກໄດ້ມີຊີວິດຢູ່, ຫລັງຈາກລາວໄດ້ໂນອາ, ຫ້າຮ້ອຍເກົ້າສິບຫ້າປີ, ແລະ ໄດ້ມີລູກຊາຍ ແລະ ລູກສາວອີກຫລາຍຄົນ;
11 ແລະ ວັນເວລາທັງໝົດຂອງລາເມັກຄືເຈັດຮ້ອຍເຈັດສິບເຈັດປີ, ແລະ ລາວໄດ້ຕາຍໄປ.
12 ແລະ ໂນອາມີອາຍຸໄດ້ສີ່ຮ້ອຍຫ້າສິບປີ, ແລະ ໄດ້ລູກຊື່ຢາເຟດ; ແລະ ສີ່ສິບສອງປີຈາກນັ້ນລາວໄດ້ລູກຊື່ ເຊມຈາກນາງຜູ້ເປັນແມ່ຂອງຢາເຟດ, ແລະ ເມື່ອລາວມີອາຍຸໄດ້ຫ້າຮ້ອຍປີ ລາວໄດ້ລູກຊື່ວ່າ ຮາມ.
13 ແລະ ໂນອາກັບພວກລູກຊາຍຂອງເພິ່ນໄດ້ ເຊື່ອຟັງພຣະຜູ້ເປັນເຈົ້າ, ແລະ ໄດ້ເອົາໃຈໃສ່, ແລະ ເຂົາເຈົ້າໄດ້ຖືກເອີ້ນວ່າ ບຸດຂອງພຣະເຈົ້າ.
14 ແລະ ເມື່ອຜູ້ຄົນເລີ່ມທະວີຫລາຍຂຶ້ນຢູ່ເທິງຜືນແຜ່ນດິນໂລກ, ແລະ ບັນດາລູກສາວໄດ້ເກີດກັບພວກເຂົາ, ພວກ ລູກຊາຍຂອງມະນຸດຈຶ່ງເຫັນວ່າບັນດາລູກສາວເຫລົ່ານັ້ນເປັນຄົນງົດງາມ, ແລະ ພວກເຂົາກໍໄດ້ເອົາພວກນາງມາເປັນເມຍ, ແມ່ນແຕ່ຕາມທີ່ພວກເຂົາຈະເລືອກ.
15 ແລະ ພຣະຜູ້ເປັນເຈົ້າໄດ້ກ່າວກັບໂນອາວ່າ: ບັນດາລູກສາວຂອງພວກລູກຊາຍຂອງເຈົ້າໄດ້ ຂາຍຕົນເອງ; ເພາະຈົ່ງເບິ່ງ ຄວາມຄຽດແຄ້ນຂອງເຮົາໄດ້ເກີດກັບພວກລູກຊາຍຂອງມະນຸດ, ເພາະວ່າພວກເຂົາບໍ່ໄດ້ເຊື່ອຟັງສຽງຂອງເຮົາ.
16 ແລະ ເຫດການໄດ້ບັງເກີດຂຶ້ນຄື ໂນອາໄດ້ທຳນາຍ, ແລະ ໄດ້ສິດສອນເລື່ອງຂອງພຣະເຈົ້າ, ແມ່ນແຕ່ໄດ້ເປັນມານັບແຕ່ຕອນຕົ້ນ.
17 ແລະ ພຣະຜູ້ເປັນເຈົ້າໄດ້ກ່າວກັບໂນອາວ່າ: ວິນຍານຂອງເຮົາຈະບໍ່ ພະຍາຍາມກັບມະນຸດຕະຫລອດໄປ, ເພາະເຂົາຮູ້ວ່າ ເນື້ອໜັງທັງປວງຈະຕາຍ; ແຕ່ວັນເວລາຂອງເຂົາຈະເປັນໜຶ່ງຮ້ອຍຊາວປີ; ແລະ ຖ້າຫາກມະນຸດບໍ່ກັບໃຈ, ແລ້ວເຮົາຈະສົ່ງ ນ້ຳຖ້ວມມາຍັງພວກເຂົາ.
18 ແລະ ໃນວັນເວລາເຫລົ່ານັ້ນ ໄດ້ມີ ຍັກຢູ່ເທິງແຜ່ນດິນໂລກ, ແລະ ພວກເຂົາໄດ້ຊອກຫາໂນອາເພື່ອຈະເອົາຊີວິດຂອງເພິ່ນ; ແຕ່ວ່າພຣະຜູ້ເປັນເຈົ້າໄດ້ຢູ່ກັບໂນອາ, ແລະ ອຳນາດຂອງພຣະຜູ້ເປັນເຈົ້າໄດ້ຢູ່ກັບເພິ່ນ.
19 ແລະ ພຣະຜູ້ເປັນເຈົ້າໄດ້ ແຕ່ງຕັ້ງ ໂນອາຕາມ ລະບຽບຂອງພຣະອົງເອງ, ແລະ ໄດ້ບັນຊາເພິ່ນໃຫ້ອອກໄປ ປະກາດພຣະກິດຕິຄຸນຂອງພຣະອົງແກ່ລູກຫລານມະນຸດ, ແມ່ນແຕ່ດັ່ງທີ່ໄດ້ຖືກມອບໃຫ້ແກ່ເອນົກ.
20 ແລະ ເຫດການໄດ້ບັງເກີດຂຶ້ນຄື ໂນອາໄດ້ເອີ້ນຫາລູກຫລານມະນຸດໃຫ້ ກັບໃຈ; ແຕ່ພວກເຂົາບໍ່ໄດ້ເຊື່ອຟັງຖ້ອຍຄຳຂອງເພິ່ນ;
21 ແລະ ພ້ອມນີ້, ຫລັງຈາກທີ່ພວກເຂົາໄດ້ຍິນເພິ່ນ, ພວກເຂົາໄດ້ມາຫາເພິ່ນ, ໂດຍກ່າວວ່າ: ຈົ່ງເບິ່ງ, ພວກເຮົາເປັນບຸດຂອງພຣະເຈົ້າ; ພວກເຮົາບໍ່ໄດ້ຮັບເອົາລູກສາວຂອງມະນຸດມາໃຫ້ຕົນເອງບໍ? ແລະ ພວກເຮົາບໍ່ໄດ້ ກິນ ແລະ ດື່ມ, ແລະ ແຕ່ງງານ ແລະ ຍົກໃຫ້ແຕ່ງງານກັນບໍ? ແລະ ເມຍຂອງພວກເຮົາໄດ້ຄອດລູກໃຫ້ພວກເຮົາ, ແລະ ຄົນເຫລົ່ານີ້ເປັນຄົນຍິ່ງໃຫຍ່, ຊຶ່ງເປັນເໝືອນຄົນໃນສະໄໝບູຮານ, ເປັນຄົນມີຊື່ສຽງແທ້ໆ. ແລະ ພວກເຂົາບໍ່ໄດ້ເຊື່ອຟັງຖ້ອຍຄຳຂອງໂນອາ.
22 ແລະ ພຣະເຈົ້າໄດ້ເຫັນວ່າ ຄວາມຊົ່ວຮ້າຍຂອງມະນຸດເລີ່ມຮ້າຍແຮງຫລາຍຂຶ້ນໃນແຜ່ນດິນໂລກ; ແລະ ທຸກຄົນໄດ້ຍົກຕົວຂຶ້ນໃນຄວາມຄິດຝັນຂອງ ຄວາມນຶກຄິດໃນໃຈຂອງຕົນ, ໂດຍມີແຕ່ຄວາມຊົ່ວຕະຫລອດເວລາ.
23 ແລະ ເຫດການໄດ້ບັງເກີດຂຶ້ນຄື ໂນອາໄດ້ ສັ່ງສອນຜູ້ຄົນຕໍ່ໄປ, ໂດຍກ່າວວ່າ: ຈົ່ງເຊື່ອຟັງ, ແລະ ເອົາໃຈໃສ່ຕໍ່ຖ້ອຍຄຳຂອງເຮົາ;
24 ຈົ່ງ ເຊື່ອ ແລະ ກັບໃຈຈາກບາບຂອງພວກເຈົ້າ ແລະ ຮັບ ບັບຕິສະມາໃນພຣະນາມຂອງພຣະເຢຊູຄຣິດ, ພຣະບຸດຂອງພຣະເຈົ້າ, ແມ່ນແຕ່ດັ່ງບັນພະບຸລຸດຂອງພວກເຮົາ, ແລະ ພວກເຈົ້າຈະໄດ້ຮັບພຣະວິນຍານບໍລິສຸດ, ເພື່ອວ່າທຸກສິ່ງທັງປວງຈະຖືກ ສະແດງໃຫ້ປະຈັກແກ່ພວກເຈົ້າ; ແລະ ຖ້າຫາກພວກເຈົ້າບໍ່ເຮັດເຊັ່ນນີ້, ນ້ຳຖ້ວມຈະມາຍັງພວກເຈົ້າ; ເຖິງຢ່າງໃດກໍຕາມ ພວກເຂົາບໍ່ໄດ້ເຊື່ອຟັງ.
25 ແລະ ເລື່ອງນີ້ໄດ້ເຮັດໃຫ້ໂນອາເສຍໃຈ, ແລະ ໃຈຂອງເພິ່ນເຈັບປວດທີ່ພຣະຜູ້ເປັນເຈົ້າໄດ້ສ້າງມະນຸດໄວ້ເທິງແຜ່ນດິນໂລກ, ແລະ ມັນເຮັດໃຫ້ເພິ່ນເສົ້າສະຫລົດໃຈ.
26 ແລະ ພຣະຜູ້ເປັນເຈົ້າໄດ້ກ່າວວ່າ: ເຮົາຈະ ທຳລາຍມະນຸດທີ່ເຮົາໄດ້ສ້າງຂຶ້ນມາ, ຈາກຜືນແຜ່ນດິນໂລກ, ທັງມະນຸດ ແລະ ສັດສາວາສິ່ງ, ແລະ ສັດເລືອຄານ, ແລະ ຝູງນົກໃນອາກາດ; ເພາະວ່າມັນໄດ້ເຮັດໃຫ້ໂນອາເສຍໃຈທີ່ເຮົາໄດ້ສ້າງມັນຂຶ້ນມາ, ແລະ ທີ່ເຮົາໄດ້ເຮັດມັນຂຶ້ນມາ; ແລະ ລາວໄດ້ເອີ້ນຫາເຮົາ; ເພາະວ່າພວກເຂົາໄດ້ພະຍາຍາມທີ່ຈະເອົາຊີວິດຂອງລາວ.
27 ແລະ ໂນອາໄດ້ພົບ ພຣະຄຸນໃນສາຍພຣະເນດຂອງພຣະຜູ້ເປັນເຈົ້າດັ່ງນັ້ນ; ເພາະວ່າໂນອາເປັນຄົນທ່ຽງທຳ, ແລະ ດີພ້ອມໃນລຸ້ນຂອງເພິ່ນ; ແລະ ເພິ່ນໄດ້ ເດີນໄປກັບພຣະເຈົ້າ, ດັ່ງທີ່ພວກລູກຊາຍຂອງເພິ່ນ, ເຊມ, ຮາມ, ແລະ ຢາເຟດ.
28 ແຜ່ນດິນໂລກໄດ້ ເສື່ອມໂຊມລົງຢູ່ຕໍ່ພຣະພັກຂອງພຣະເຈົ້າ, ແລະ ມັນເຕັມໄປດ້ວຍຄວາມຮຸນແຮງ.
29 ແລະ ພຣະເຈົ້າເບິ່ງ ແຜ່ນດິນໂລກ, ແລະ, ຈົ່ງເບິ່ງ, ມັນໄດ້ເສື່ອມໂຊມລົງ, ເພາະວ່າເນື້ອໜັງທັງປວງໄດ້ເສື່ອມໂຊມລົງເທິງແຜ່ນດິນໂລກ.
30 ແລະ ພຣະເຈົ້າໄດ້ກ່າວກັບໂນອາວ່າ: ທີ່ສຸດຂອງເນື້ອໜັງທັງປວງໄດ້ມາຢູ່ຕໍ່ໜ້າເຮົາ, ເພາະວ່າແຜ່ນດິນໂລກເຕັມໄປດ້ວຍຄວາມຮຸນແຮງ, ແລະ ຈົ່ງເບິ່ງ ເຮົາຈະ ທຳລາຍເນື້ອໜັງທັງປວງຈາກແຜ່ນດິນໂລກ.