1 Thiab tag nrho Enauj lub hnub nyoog muaj plaub puas thiab peb caug xyoo.

2 Thiab tau muaj tias Methuxelas, uas yog Enauj tus tub, tsis raug coj mus, xwv kom muaj raws li tus Tswv txoj kev khi lus, uas nws tau khi nrog Enauj; vim nws tau khi lus tiag tiag nrog Enauj tias Nau-as yuav ua nws ib tug tub ki.

3 Thiab tau muaj tias Methuxelas qhia tej yuav muaj los yav tom ntej tias los ntawm nws cov tub ki yuav muaj tag nrho tej nceeg vaj hauv ntiaj teb (los ntawm Nau-as los), thiab nws muab yeeb koob rau nws tus kheej.

4 Thiab tau muaj ib txoj kev tshaib nqhis loj heev los rau hauv thaj av, thiab tus Tswv foom ib txoj kev foom tsis zoo heev rau thaj av, thiab neeg coob leej nyob haud tau tuag.

5 Thiab tau muaj tias Methuxelas hnub nyoog muaj ib puas thiab yim caum xya xyoo, thiab muaj Lamej;

6 Thiab tom qab nws muaj Lamej, Methuxelas hnub nyoog muaj xya puas thiab yim caum ob xyoos, thiab muaj tub thiab muaj ntxhais;

7 Thiab tag nrho Methuxelas lub hnub nyoog muaj cuaj pua thiab rau caum cuaj xyoos, ces nws mam tuag.

8 Thiab Lamej hnub nyoog muaj ib puas thiab yim caum ob xyoos, thiab muaj ib tug tub,

9 Thiab nws hu nws tus tub ua Nau-as, hais tias: Tus tub no yuav nplij peb lub siab ntsig txog peb tej hauj lwm thiab dej num ntawm peb tes, vim yog thaj av uas tus Tswv tau foom tsis zoo rau.

10 Thiab tom qab nws muaj Nau-as, Lamej hnub nyoog muaj tsib puas thiab cuaj caum tsib xyoos, thiab muaj tub thiab muaj ntxhais;

11 Tag nrho Lamej lub hnub nyoog muaj xya pua thiab xya caum xya xyoo, ces nws mam tuag.

12 Thiab Nau-as muaj plaub puas thiab tsib caug xyoo, thiab muaj Yafej; thiab plaub caug ob xyoos tom qab ntawd nws muaj Xees los ntawm tus uas yog Yafej niam, thiab thaum nws muaj tsib puas xyoo ces nws muaj Has.

13 Thiab Nau-as thiab nws cov tub mloog tus Tswv lus, thiab cuab pob ntseg, ces Vajtswv hu lawv ua Vajtswv cov tub.

14 Thiab thaum cov txiv neej no pib huaj vam nyob rau hauv lub ntiaj teb, thiab tej ntxhais yug los rau lawv, tib neeg cov tub pom tias tej ntxhais ntawd zoo nkauj, ces lawv thiaj coj tej ntxhais ntawd mus ua poj niam, raws li lawv xaiv.

15 Thiab tus Tswv hais rau Nau-as tias: Koj cov tub tej ntxhais tau muab lawv tus kheej muag; vim saib seb kuv txoj kev chim siab tau npau tawm tsam tib neeg cov tub, vim lawv yuav tsis mloog kuv lub suab.

16 Thiab tau muaj tias Nau-as qhia tej yuav muaj los yav tom ntej, thiab qhia tej uas yog Vajtswv li, ib yam li thaum chiv keeb.

17 Thiab tus Tswv hais rau Nau-as tias: Kuv tus Ntsuj Plig yuav tsis tshoov neeg lub siab tas mus li, vim lawv yuav tsum paub hais tias txhua tus tus uas muaj cev nqaij daim tawv yuav tuag; txawm li ntawd los lawv tshuav ib puas nees nkaum xyoo; thiab yog hais tias neeg tsis hloov siab lees txim, kuv yuav xa dej nyab los rau lawv.

18 Nyob rau lub sij hawm ntawd muaj cov neeg loj loj nyob hauv lub ntiaj teb, thiab lawv tau nrhiav txo Nau-as txoj sia; tiam sis tus Tswv tau nrog Nau-as, thiab tus Tswv lub hwj chim nrog nws.

19 Thiab tus Tswv tsa Nau-as raws li tus Tswv tus txheej txheem, thiab tau txib nws kom nws cia li mus thiab tshaj tawm tus Tswv txoj Moo Zoo rau noob neej, ib yam li tau muab rau Enauj.

20 Thiab tau muaj tias Nau-as hais rau noob neej kom lawv yuav tsum hloov siab lees txim; tiam sis lawv tsis mloog nws tej lus;

21 Thiab, tom qab uas lawv tau hnov nws, lawv los rau nws, hais tias: Saib seb, peb yog Vajtswv cov tub; es peb tsis tau coj tib neeg tej ntxhais los ua poj niam los? Thiab peb tsis noj tsis haus, thiab tsis sib yuav thiab tsis muab neeg sib yuav los? Thiab peb cov poj niam yug me nyuam rau peb, thiab lawv yog neeg muaj zog, uas zoo li cov neeg thaum ub, cov neeg muaj suab muaj npe. Thiab lawv tsis mloog Nau-as tej lus.

22 Thiab Vajtswv pom tias neeg txoj kev phem muaj ntau heev nyob hauv lub ntiaj teb; thiab txhua tus neeg tau khav txiv txog tej zeem muag ntawm tej kev xav nyob hauv nws lub siab, uas tsuas yog phem tas mus li.

23 Thiab tau muaj tias Nau-as qhia mus ntxiv rau cov neeg, hais tias: Cia li mloog, thiab cuab pob ntseg rau kuv tej lus;

24 Cia li ntseeg thiab hloov siab lees txim rau nej tej kev txhaum thiab ua kev cai raus dej los ntawm Yexus Khetos lub npe, Vajtswv Leej Tub, ib yam li peb cov yawg koob, ces nej yuav tau txais tus Vaj Ntsuj Plig Dawb Huv, thiaj yuav qhia txhua yam los rau nej; thiab yog hais tias nej tsis ua li no, dej nyab yuav los rau nej; txawm li ntawd los lawv yeej tsis mloog.

25 Thiab ua rau Nau-as tu siab, thiab nws lub siab mob mob vim tus Tswv tau tsim neeg nyob hauv lub ntiaj teb no, thiab ua rau nws nyuaj siab heev.

26 Thiab tus Tswv hais tias: Kuv yuav ua kom cov neeg uas kuv tau tsim no puas tsuaj hauv lub ntiaj teb no mus, tag nrho tib neeg thiab tej tsiaj, thiab tej tsiaj nkag, thiab tej noog saum nruab ntug; vim ua rau Nau-as tu siab uas kuv tau tsim lawv, thiab kuv ua lawv; thiab Nau-as tau thov kuv; vim lawv tau nrhiav nws tua pov tseg.

27 Thiab Nau-as nrhiav tau tus Tswv txoj kev ntseeg nws siab; vim Nau-as yog ib tug neeg ncaj ncees, thiab ib tug zoo tag nrho ntawm nws tiam neeg; thiab nws mus kev nrog Vajtswv, thiab nws peb tug tub, Xees, Has, thiab Yafej, ua ib yam thiab.

28 Vajtswv pom tias lub ntiaj teb liam sij lawm, thiab lub ntiaj teb muaj puv nkaus kev ua tsiv ua nruj.

29 Thiab Vajtswv ntsia lub ntiaj teb, thiab, saib seb, lub ntiaj teb liam tas lawm, vim txhua tus uas muaj cev nqaij daim tawv raug liam nyob hauv lub ntiaj teb.

30 Ces Vajtswv hais rau Nau-as tias: Lub sij hawm kawg ntawm txhua tus neeg twb los txog kuv lawm, vim lub ntiaj teb muaj puv nkaus kev ua tsiv ua nruj, thiab saib seb kuv yuav ua kom txhua tus neeg puas tsuaj tag hauv ntiaj teb no.