Ti Kaamaan

Dakami, ti Umuna a Panguluen ken ti Konseho dagiti Sangapulo-ket-dua nga Apostol ti Ti Simbaan ni Jesucristo dagiti Santo iti Ud-udina nga Aldaw, sipapasnekkami a mangiwaragawag a ti kallaysa iti nagbaetan ti maysa a lalaki ken maysa a babai ket inordenan ti Dios ken ti kaamaan ti sentro iti plano ti Namarsua para iti agnanayon a pagtungpalan dagiti annakna.

Amin a tattao—lalaki ken babai—ket naparsua a kalanglanga ti Dios. Tunggal maysa ket maipatpateg nga espiritu nga anak a lalaki wenno babai dagiti nailangitan a nagannak, ket, iti kasta, tunggal maysa ket addaan iti nadiosan a kababalin ken pagtungpalan. Ti sekso ket maysa a kangrunaan a talugading ken panggep ti tao sakbay ti yaayna iti daga, iti kaaddana iti daga, ken ti agnanayon.

Iti pagarian sakbay ti yaay iti daga, ammo ken nagdaydayaw iti Dios dagiti espiritu nga annak a lallaki ken babbai a kas Agnanayon nga Amada ken inawatda ti planona a pakagun-odan dagiti annakna iti nagtagilasag a bagida ken pakaaddaanda iti padas iti daga tapno dumur-as nga agturong iti pannakaan-anay ket iti kamaudiananna maragpatda ti nadiosan a pagtungpalanda a kas agtawid iti agnanayon a biag. Ti nadiosan a plano ti kinaragsak ti mangpabalin kadagiti relasion ti kaamaan tapno agtalinaed iti labes ti tanem. Dagiti sagrado nga ordinansa ken katulagan a magun-od kadagiti nasantuan a templo ti mangpabalin para kadagiti tao tapno makasubli iti sidong ti Dios ken para kadagiti kaamaan tapno agkaykaysa iti agnanayon.

Ti umuna a bilin nga inted ti Dios kada Adan ken Eva ket maipapan iti kabaelanda nga agbalin a nagannak kas agassawa. Ipakdaarmi a ti bilin ti Dios para kadagiti annakna nga agpaadu ken punnuenda ti daga ket sitatalinaed a bilin. Ipakdaarmi pay nga imbilin ti Dios a dagiti sagrado a pannakabalin ti panagparsua ket maaramat laeng iti nagbaetan ti lalaki ken babai, mayannurot iti linteg a nagkallaysa kas agassawa.

Ipakdaarmi a ti wagas a nakaparsuaan iti mortal a biag ket nadiosan a naisaad. Pasingkedanmi ti kinasagrado ti biag ken ti kinapategna iti agnanayon a plano ti Dios.

Addaan dagiti agassawa iti napasnek a pagrebbengan a mangipateg ken mangaywan iti tunggal maysa ken dagiti annakda. “Dagiti annak ti pagpatawid ni Jehova [Apo]” (Dagiti Salmo 127:3). Addaan dagiti nagannak iti sagrado a pagrebbengan a mangpatanor kadagiti annakda iti ayat ken kinalinteg, mangted kadakuada kadagiti pisikal ken naespirituan a kasapulanda, ken mangisuro kadakuada a mangipateg ken agserbi iti tunggal maysa, agtungpal kadagiti bilin ti Dios, ken agbalin a managtungpal iti linteg a makipagili sadino man ti pagnaedanda. Dagiti agassawa—inna ken amma—ti agsungbatto iti sango ti Dios para iti pannakatungpal dagitoy a pagrebbengan.

Inordenan ti Dios ti kaamaan. Ti kallaysa iti nagbaetan ti lalaki ken babai ket napateg unay iti agnanayon a planona. Karbengan dagiti ubbing ti mayanak kadagiti begkes ti matrimonio, ken tapno padakkelen ti maysa nga ama ken maysa nga ina a mangdayaw kadagiti kari ti kallaysa nga addaan iti naan-anay a kinapudno. Kaaduan a magun-od ti ragsak ti biag ti kaamaan no nabangon daytoy kadagiti pannursuro ni Apo Jesucristo. Naipasdek ken napagtalinaed dagiti naballigian a kallaysa ken kaamaan kadagiti pagbatayan ti pammati, kararag, panagbabawi, pammakawan, respeto, ayat, panangngaasi, aramid, ken makaay-ayo nga aramiden iti panagaliwaksay. Babaen ti nadiosan a plano, nasken a dagiti amma ti mangidaulo kadagiti kaamaanda iti ayat ken kinalinteg ken pagrebbenganda ti mangipaay kadagiti kasapulan ti biag ken pannakasaluad dagiti kaamaanda. Kangrunaan a pagrebbengan dagiti inna ti mangpadakkel kadagiti annakda. Kadagitoy sagrado a pagrebbengan, obligasion dagiti amma ken inna nga agtinnulong a kas agkadua nga addaan iti agpada a pagrebbengan. Ti pannakabaldado, pannakatay, wenno dadduma pay a kasasaad ket mabalin a mangpabalbaliw iti pagrebbengan ti tunggal maysa iti kaamaan. Nasken a tumulong dagiti kabagian ti kaamaan no kasapulan.

Iballaagmi a dagiti tao a mangsalungasing kadagiti katulagan ti kinadalus ti dayaw, dagiti mangabuso iti asawa wenno anak, wenno dagiti mapaay a mangaramid kadagiti pagrebbengan iti kaamaan, nga iti maysa nga aldaw agtakderdanto nga agsungbat iti sango ti Dios. Iballaagmi pay a ti pannakarakrak ti kaamaan ket mangisangbay kadagiti tao, komunidad, ken pagilian kadagiti didigra kas impadto dagiti nagkauna ken kabaruanan a propeta.

Awaganmi dagiti agrebbeng nga umili ken opisial ti gobierno iti tunggal disso nga itandudoda dagiti pagrukodan a naisangrat a mangpatalinaed ken mangpapigsa iti kaamaan a kas kangrunaan a yunit ti kagimongan.