Peneinei

Kiht, Presidensi Keieu oh Pwihn en Wahnpoaron Ehk-riemen en Mwomwohdiso en Sises Krais en Souleng en Imwin Rahn Akan, kalohngki me pwopwoud nanpwungen ohl emen oh lih emen koasoandihsang Koht oh me peneinei kesempwal ong sapwellimen Sounkapikipiko pilahn ong mour poatoapoat en Sapwellime serihkan.

Aramas koaros—ohl oh lih—kepikipikda ni mwohmw en Koht. Emenemen iei seri pwutak de serepein ngehn keneinei en pahpa nohno nanleng, oh, pwehki met, emenemen ahniki mwohmw sarawi oh mour en ehu rahn me koasoandi sarawi. Wia ohl de lih iei mwohmw kesempwal en ihs aramas emen oh ah pwukoa nan ah mour mwohn mour wet, mour pohn sampah, oh mour poatoapoat.

Nan mour mwohn mour wet, seri pwutak oh serepein ngehn kan kin patohwan oh pwongih Koht ni duwen Samarail Poatoapoat oh alehda Sapwellime pilahn me pahn elehieng Sapwellime serihkan en alehdi paliwar oh alehdi irair en mour pohn sampah pwehn keirda ong unsekla oh kedekedeo alehdi mour en ehu rahn me koasoandi sarawi ni duwen irail akan me sohsohki mour poatoapoat. Pilahn sarawi en peren kin kahrehieng ehupenehn nanpwungen peneinei en kak doulahte mwurin sousouo. Tiahk oh inou sarawi kan me mie ihte nan tehnpas sarawi kan kin kahrehieng emenemen aramas en kak pwurala rehn Koht oh kahrehieng peneinei kan en kak patpene kohkohlahte.

Kosonned keieu me Koht ketikihieng Adam oh Ihp doke ara kak en wia pahpa nohno ni duwen ohl oh lih pwopwoud. Se kalohngki me sapwellimen Koht kosonned ong Sapwellime serihkan en kaparaparla pwe kadaudokarail kan en kousoanla wasa koaros nin sampah wie manaman te. Se doula kalohngki me Koht ketkihda kosonned me manaman sarawi kan en wiahda mour pahn doadoahk ihte nanpwungen ohl oh lih, me kapwopwoud ni pwung en kosonned ni duwen ohl oh lih pwopwoud.

Se kalohngki me wiepe me mour en pohn sampah kin kepikipikda koasoandihsang powe. Se kamehlel kesempwalpen mour oh kesempwalpe nan sapwellimen Koht pilahn poatoapoat.

Ohl oh lih pwopwoud ahniki pwukoa kesempwal en poakohng oh apwalih emenemen oh neira serihkan. “Serihkan iei sohso sang Kauno” (Melkahka kan 127:3). Pahpa nohno kan ahniki pwukoa sarawi en apwaliada neira serihkan ni limpoak oh mour pwung, en apwaliala arail anahn akan me pid paliwar oh pali ngehn, oh en padahkihieng irail en poakohng oh papah emenemen, kapwaiada kosonned akan en Koht, oh en wia tohn wehi me kin kapwaiada kosonned akan en wehi wasa sohte lipilipil me re kousoan ie. Ohl oh lih pwopwoud kan—nohno kan oh pahpa kan—pahn pwukoahki mwohn Koht duwen arail apwaliala pwukoa pwukat.

Peneinei koasoandihsang Koht. Pwopwoud nanpwungen ohl oh lih kesempwal ong Sapwellime pilahn poatoapoat. Serihkan ahniki pwuhng en ipwidi nan selin pwopwoud, oh en epwelda rehn pahpa men oh nohno men me kin wauniki ara inou kan en pwopwoud ni loaloapwoat unsek. Peren nan mour en peneinei kin keieu kak pweida ni eh pahn poahsoankihda padahk kan en Kaun Sises Krais. Pwopwoud kan oh peneinei kan me kin pweida kin kokouda oh kin wie epwehpwel sang ni padahk kan en pwoson, kapakap, koluhla, mahk, waun, limpoak, tetehk mehteikan, doadoahk, oh kemwekid kemweit mwahu kan. Sang ni koasoandi sarawi, pahpa kan pahn kin kaunda arail peneinei kan ni limpoak oh mour pwung oh pwukoahki soahng kan me anahn ong mour oh en sinsile arail peneinei kan. Nohno kan pwukoahki keieu en apwalih keirdahn neirail serihkan. Nan pwukoa sarawi pwukat, pahpa kan oh nohno kan ahniki pwukoa en sewese emenemen ni duwen werek pahrek. Soumwahula, mehla, de irair teikan kak en kahrehieng aramas emen eh anahne wekidala ah pwukoa. Peneinei lap kan konehng en kihda utuht ni ansou me mie anahnepe.

Se keperki me emenemen aramas me kawehla inou kan en mour mwakelekel, me kin wiakawe ah pwoud de nah seri, de me sohte kapwaiada ah pwukoa kan ong ah peneinei pahn ehu rahn kadeingki mwohn Koht. Doulahte, se keperki me mwerpeseng en peneinei pahn wahdohng pohn emenemen aramas, kousapw kan, oh wehi kan mwekid suwed akan me kokohpda sang soukohp akan en kawao oh rahn wet.

Se poahngoangki towe kan en wehi oh tohndoadoahk en kopworment kan wasa koaros me nsenoh en utung irair pwuko me koasoandi en kolokol oh kakehlailih peneinei nin duwen eh wia pwihn poahsoan en wehi.