Kitoohkawapstssin

Niistoonnaan nitsitaoʼtotamaʼpsspinaan kitaotoomatohpinnaan ki amoksi naatsikopotsiitapiyiiksi Aʼpistotokiw ototohkaʼtaniksi noo Tsisais Kaaist Otsitawatsimoyihkahpi Ki Itaomaiʼtakiitsi Sakoyiksistsikoistsi. Iksstoonatoʼtotamaʼpiiw annohk iʼtsinapsskowahpi miksi ihkiimsstsinaiksi mahksstaamitaʼpinnaʼkiʼsaaw atowaʼpistotowahpiaaw otatowanissowaayi otakiʼtomanistaopssaaw. Amohkai Aʼpistotokiw otokakksstsimaan. Iksstoonatsitapoʼtotamaʼpiiw miksi okoʼsiksi mahkotsstamssapowawahkanaaw annik otsitapaksipaitapiyihpiaaw issoohtsik.

Noo kanaitapiiw kottakinnooniksi kinnoon ki kiksisstsinnoon Aʼpistotokiw ki oppitaam taka ihtsistapitapiwaʼsoʼp ma Aʼpistotokiw ki mi oppitaam. Itotoisapaʼpistotokiw manitsinaʼpiaaw. Amohkayi nohkohtatoyisanookiw Aʼpistotokiw. Matakohkanaiʼtomanistsinaoʼp akohkanayookitsinaoʼp. Ma ninaaw ki ma akiiw otssawomaipokawaʼssaaw ikkamaakiyis kiaʼa kaminayis annayi akanistsipokawaʼsiiw ki annayi akanistsipaitapiiw. Matakohkottsisawaiʼpoʼtohsiwatsiksi ki annayi akanistohkaʼpssiiw.

Sawomaipokawaʼsoʼsin istsinoaʼ ki ikawatoyimmaw Aʼpistotokiw. Ma Aʼpistotokiw kinnoon itanistsitsihtaaw miksi okoʼsiksi, kottakinnooniksi, mahkohkohkoistoomssaiksi ki mahkoohksistapokoʼssaiksi anni nitokoʼsimmiihpi. Aʼpistotokiw itokakkohtomoyiiw noo matapi. Itanistsiwaiksi kitakohkottohkoistoomihpoaaw kitakohkottohkokoʼsspoaaw, istapakaitapiyihpoaaw. Ki moyi otokakksstsimaan itanistsiwaiksi kitakitsipokawaʼsspoaaw noo tsaahko. Ma ninaaw ki ma akiiw aʼtowaʼpistotowahkiaaw akitsipsstatowaʼpistotowayaaw Aʼpistotokiw okoowayi. Kamohtssapowawahkainowainiki moohkitsikakohtomoohpoaayi kitakohkottsskohpokaʼpaitapimowa Aʼpistotokiw ki kitsitapiimoaiksi. Ki annimai moksi okoʼsiksi ottakkiowawaiksi sotamaahsiʼtsimiaaw mi otokakksstsimaan.

Otsisttsitsaokakksstsimaan ma Aʼpistotokiw itanistsiw miksi kitsitoomahksittohkaahsinnooniksi mi Adam ki mi Eve annohk kitakomatapipokaamihpowaaw sootamitaʼpinnaʼkik kitahkssokaʼpatowaʼpsstototssoway. Kitakitsipsstatowaʼpistototsspowaaw nokoowayi. Ki annohk sootaminnaʼkik kitaakaipokaamssoway kitakohtsistapakaitapiyihpowaaw noo tsaahko. Annohk amohk nitokakksstsimaan ikkamohtssapoinowainiki anniayi akonimm Aʼpistotokiw ki ikkamohkoipittsikatoominowainiki matakokakioʼsatoomatsiksay.

Mohk pookaamssin ihtoʼtsstsiw Aʼpistotokiw. Aaniw ahksstamitaʼpinnaʼkiʼs ahksstamssokawattatoʼsi mohk niipaitapiyssin, nitaʼpoʼtotamaʼpiiw. Ikatsimmaʼpiiw kiaʼa ikatowaʼpiiw. Tsska mohk niipaitapiyssin nitaʼpoʼtotamaʼpiw mohk otokakksstsimaan.

Miksi ihkiimsstsinaiksi ihkotayaaw maahkaotoiʼtsikatahsaaw miksi okoʼsowaiksi, mahkawaiʼstamattsaahsawaiksi; mahkaikimmotsiyisaiksi, makaisspommotsiyisaiksi, ki mahkakomimmotsiyisaiksi. “Aʼpistotokiw ihpsksskopaoʼkiw okoʼsiksi” (Ninihkssin 127:3). Ki moyi sokaʼpiiw mahkaiʼstamattsaahsawaiksi Aʼpistotokiw otsisksstsimoʼtanistsi. Akaiʼstamattsiyaaw miksi okoʼsowaiksi mahkohtssapowawahkahsaiks Aʼpistotokiw otokakkstsimanistsi ki noo tsaahko stokakksstsimanistsi. Amoistssk sawaiʼstamattsasaaw miksi okoʼsowaiksi ostowaway aksskitapsstsiiw. Miksistsipahtsaʼpssiyaaw.

Kitoohkawapstssin ki miksi ihkiimsstsinaiksi nitaʼpitoʼtotamaʼpiw ma Aʼpistotokiw otokakksstsimaanists. Pokaiksi isopoyaʼpaitsitoomiaaw mahkssopoyaʼpoksistssaaw ki mahkssopoyaʼponssaaw. Miksi ainnaʼkimmiksi mahkssokawattatoʼsaaw mi atowaʼpistotowahpiaaw ki otatowanissoway, kitoohkawapstssin akohtaiʼtamaopiaaw ikkamohtaisapowawakasaaw Tsisais Kaaist nitaiʼstamattsotsiyihp. Amoistsskai aiʼstamattsotsspʼ: ahkaomaiʼtakioʼsin, ahkawatsimoiyihkaoʼssin, aatsimmihkaʼsin, ssaakiʼtakssin, ahkaotamimmotsiyoʼsin, ahkawakomimmotsiyoʼsin, ahksikimmapipitsiyoʼsin, ahkaiʼtomanitsikaʼkimaoʼsin, ki ahkaiʼtomanistsiʼtamohkanaʼpssoʼsi. Ma Aʼpistotokiw aaniw ma ninaaw matoʼtsitssksipoyiimi mi akiiy iksisttanistsipoʼtowayaaw kakitssikahkiw mi otakanitsistawatsimahpiaaw. Ma Aʼpistotokiw ihpipoʼtoyiw mi ninaay mahkaotomatoʼsay mi okoowayi ki mahkaohkoʼtsimaan. Ki mi akiiy ihpipoʼtoyiiw mahkaotoiʼtsikatoʼsay mi okoowayi ki miksi okoʼsowaiksi. Ki miksi otsistapiksoʼkowawaiksi mahksspoommoissaw ikkamapatsiyisaaw.

Annohk nitoʼtotoyinapsskowannaan amotssk annooksskimitssk otatowanissoway ki kataiinnaʼkohsiksi, ki amotssk apaiinanistotoiksi okoʼsowaiksi ki otohkiimaanowaiksi, ki maatohtssapoiyiksi ikakkohtomowahpiaaw. Annitsskoʼkiaaw aksinapanssatsiyaaw Aʼpistotokiw ki kimattsitsistapakkiyinapsskotsspoaaw. Amotssk nitsskai annokohpattsskimiaaw kitoohkawapstssin akohtawattsikimmatsistotoyiyaaw otsihkowanowawaiksi. Ki annoo kanaitapiw amoistssk niitsisskai iʼsskanaʼpiy aotoomaakiiksi, annohk ki nikh isskoohtsik, anistomiaaw akoʼtstsiyaaw.

Ki annohk nitohkanainihkatsimatannaan amotssk nohkayikaʼkimaiksi ki Itaoʼtotamaʼpssiksi ki amotssk Aʼpotomoyiksi noyi aokaksstsimaiksi, mahkohksiʼtomanitsikaʼkimaahsaaw mahkohkitomanistaisokaʼpis, mahkohkitomanistaisskonataʼpis kitoohkawapstssinnoon. Mahkohkitomanistayiipoyssi kitsihkawaninnooniksi.