Sucu

Kuht, Prestuhnsi Se Met ac Mwet in Kahsruh luhn Mwet Sap Singucul Luo ke Alu luhn Jisus Kraist luhn Mwet Luhlahlfongi ke Lwen-sahflah, ke fahkwack muhtahllacna lah macruht inmahsrlon sie mukul ac sie muhtwacn ma ahkkweyeyucklac sin God ac tuh sucu uh pa yohk srihpac ke plwacn luhn El suc orwaclah nuh ke moul nwe tok luhn tuhlihk Nahtuhl uh.

Mwet nuh kwewa—mukul ac muhtwacn—oreklac ke luhman God. Kais sie pa tuhlihk mukul nguhn ac tuhlihk muhtwacn nguhn wolacna nuhtin pahpah ac ninac inkuhsrao, ac, kais sie eis luhman God ac in kuh in oacna God. Sie mwet el kuh in oruh mukul se kuh muhtwacn se ma el eis ke moul se el muhta we met liki el tuhkuh nuh facluh ah, ac moul se inge ac moul nwe tok ma pahtpaht.

Ke moul se met liki moul se facluh inge, tuhlihk mukul nguhn ac tuhlihk muhtwacn nguhn uh elos etuh ac alu nuh sin God muh Pahpah ma Pahtpaht tuhmwaclos uh ac lwelah plwacn Lal suc ma sang tuhlihk Nahtuhl in eis mahno ac srah ac in puhlakihn ohiyac fin facluh in ahkwot nuh ke wolacna ac in eis akihlenyacn oreklac lalos uh ma som nuh ke moul ma pahtpaht. Plwacn luhn God nuh ke moul ma pahtpaht uh oruh sucu uh in kahlwem kac lah e fah sifilpac sikyak tukun kuht misac uh. Akwuck muhtahl ac olwelah uh kuh in orek ke tempuhl muhtahl uh ac oruh mwet se in kuh in fohlohk nuh yurin God ac nuh sin sucu uh in tuhkweni nwe tok.

Masap se met ma God el sang nuh sel Adam ac Eve pa in kuh in oruh sie mukul ac muhtwacn in oruh sie pahyuck. Kuht ahkkweyelah masap luhn God nuh sin tuhlihk Nahtuhl uh in puhseni ac nwacklah facluh uh srwackna fahsr. Kuht oacyacpac ahkkweye lah God el sapkihn lah kuh muhtahl in orwaclah tuhlihk uh enenuh in tuhkuh yurin mukul ac muhtwacn pahyuck se muhkwena.

Kuht ahkkweyelah lah moul se inge oreklac ke kohkoh luhn God. Kuht ahkpwacyei lah moul uh muhtahl ac yohk srihpac ke plwacn ke moul ma pahtpaht luhn God uh.

Mukul ac muhtwacn pahyuck oasr kunohkohn muhtahl lalos in luhngse ac karihngihn sie sin sie ac tuhlihk nahtuhlos. “Tuhlihk uh sie usru nuh sin Leum” (Sam 127:3). Oasr kunohkohn muhtahl se luhn pahpah ac ninac in tuhfahlah tuhlihk nahtuhlos ke luhngse ac suwohswohs, in sang enenuh lalos ke ip luhn mahno ac nguhn, ac in lotwelos in luhngse ac in kuhlwacnsapuh sie sin sie, in akihlen masap luhn God ac in karihngihn masap ke oacna sie acn elos muhta we. Mukul ac muhtwacn pahyuck—ninac ac pahpah—fah nuhnuhnkweyuck ye muhtuhn God ke tiac orwaclah laltahl ke ma inge.

Sucu uh ma ahkkweyeyucklac sin God. Pahyuck inmahsrlon sie mukul ac sie muhtwacn pa sie ip yohk srihpac ke plwacn nwe tok Lal. Tuhlihk uh oasr suwohs lalos in isuslac sin pahpah ac ninac ma pahyuck, ac in tuhfweyucklac sin pahpah se ac ninac se suc ahok kuhnlah ac ahkos moul luhn sie pahyuck. Engan ke moul in sucu kuh in wo fin sucu uh moulkihn luti luhn Leum Jisus Kraist. Pahyuck ac sucu wowo uh oreklac ac fahsrkihn ip yohk ke luhlahlfongi, pruhe, auliyak, nuhnak muhnahs, ahkfuhlwactye, luhngse, pahkomuhta, orekma, ac kain in mukwikwi wo sahyac pac. Ke plwacn luhn God, pahpah uh nuhnuhnkuh fin sucu laltahl ke luhngse ac suwohswohs ac in fosrngahkihn in sang enenuh luhn moul ac karihngihn sucu. Ninac el enenuh na in tuhfahlah tuhlihk nahtuhlos. Ke kunohkohn muhtahl inge, pahpah ac ninac enenuh in kahsruh sie sin sie in oacna sie. Suhkahpahs, misac, kuh kuhtwena ohiyac kuh in orwaclah eklac ke ma kunacn kais sie nuh ke karihngihnyacn sucu. Sucu lasr uh kuh in kahsruh pac ke pacl enenweyuck uh.

Sensenkackihnyuck nuh sesr lah sie mwet suc kuhnahoslah olwelah luhn tiac kosro, suc ahkkolukye nuh sin muhtwacn kiac kuh mukul tuhma kuh tuhlihk nahtuhlos, kuh suc tiac ahkfalye ma kunwacl nuh sin sucu fah sie lwen tu nuhnuhnkweyuck ye muhtuhn God. Oacyacpac, sensenkihnyuck nuh sesr lah fahsrwelihk luhn sucu uh e oruh kais sie, mura se, ac muhtuhn facl se in puhlakihn ohiyac koluk oacna fwackyuck sin mwet pahluh met ac mwet pahluh mihsenge uh.

Kuht pahng nuh sin mwet ma e fal nuh se ac mwet kol luhn kafucrmacn yen nuh kwewa in kwacfe in orekmakihn ma inge in sang karihngihn ac ahkkweye sucu in pa u se ma yohk e met ke acn se uh.