A Telungalek

Kemam, el First Presidency me a Chelchad er a Teruich me a Terung el Apostol er a Ikelesia er a Jesus Kristo er a Uriul-klebesei el Santo, loba cheledaol tekoi e ouchais el kmo a chebechiil er a delongelel a sechal me a redil a mechedaol er a Dios ea telungalek a sel kmal nga er a belngel e moktek er sel uldesuel a Ulemeob el kirel a diak a ulebengelel klengar el mo er a Rengelekel.

A rokui el chad —el sechal me a redil— a ulebeob el di uaia teletelel a Dios. A derstang er tir a mekreos el ngalek er a reng el sechal me a redil el ngelekel a chedam me a chedil er a babeluades, me a, leuaisei, e a derstang er tir a sebecherir el mo ngmai a chedaol teletelir ma blekerdelir. Sel klaodengei er a chad el kmo ng sechal malechub eng redil a klou a belkul el kirel a klengar ruchei er tial klengar, me a klengar er a beluulechad, me a klengar ruriul er tial beluulechad me a moktek er ngii.

Chelsel a klengar ruchei er a beluulechad, ea rengalek er a reng el sechal me a redil a milengull er a Dios el ngii a Diak a Ulebengelel el Chedam e kilengei er a Uldesuel el ngii a Rengelekel a mo nguu a bedengir er a tech e mo kiei er tial beluulechad el mesuub el merael el mo klikiid meng mo sebecherir el mo nguu a diak a ulebengelel el klengar. Tial uldasou el kirel a deureng a sobecheklii a deleuill er a telungalek meng melemolem e ruriul er a kodall. A chedaol ruoll me a telbiil el nga er a chelsel a templo a rullii meng mo sebechel a chad el lemuut el mo er a rengedel a Dios me a telungalek a lmuut el mo dmak el mo er a diak a ulebengelel.

A kot el llach el ngiluu a Dios el msang a Adam me a Eva a sel techall el mo er tir el sebecherir el mo oungalek el obekel. Aki ouchais el kmo sel llechul a Dios el mo er a Rengelekel el mo omdois e omekeek er a beluulechad a kmal dirk mesisiich. Aki melemolem el louchais el kmo a Dios a mla kmu el kmo sel chedaol klisiich el omeob er a rengalek a kirel di mekedmokl er a delongelel a sechal me a redil, el tir a mla moterekokl el kaubuch.

Aki ouchais el kmo sel uchul a blebelel a klengar tial beluulechad a kmal ulterekokl el chedaol. Aki smisichii el kmo a klengar a chedaol e kmal klou a belkul er sel diak a ulebengelel el uldesuel a Dios.

A robekel a kmal chedaol a ngerchelir el kirir el kaubeltik el reng e kaukerreu me a dirrek el mo er a rengelekir. “A rengalek a dikesel a Rubak” (Psalm 127:3). A rechedam me a rechedil a nga er ngii a chedaol el ngerchelir el omekeroul er a rengelekir loba beltik el reng me a llemalt, e mesterir a lousbech a bedengir er a tech me a bedengir er a reng, e mo olisechakl er tir el mo kaubeltik el reng e mo mesiou er a tang me a tang, e mo oltirakl a llechul a Dios, e mo oltirakl a llach er a beluu er a ike le kiei er ngii. A robekel ma—rechedil me a rechedam—a mo mukerkeriil er a medal a Dios el kirel a okedmeklel aika el ngerachel.

A Telungalek a mechedaol ra Dios. A chebechiil er a delongelel a sechal me a redil a klou a belkul er sel diak a ulebengelel Uldesuel. A rengalek a ngar er ngii a lemeltir el me mechell er a chelsel a chebechiil, e mukeroul er a chedam me a chedil el tir a mui el oltirakl aikel telbiil er a chelsel a chebechiil. A deureng er a chelsel a telungalek a sebechel mo er ngii alsekum a telungalek a ultuil er a osischeklel a Rubak el Jesus Kristo. A ungil chebechiil me a telungalek a sebechel mekedmokl e melemolem el ultuil er a osischakl er a klaumerang, nglunguuch, ouchel reng ra klengit, klausubes, omengull, beltik el reng, klechubechub, ureor, me a ungil e ngar er ngii a belkul el omilil me a omeruul. Me ngokiu chedaol kedmeklel, ea rechedam a bdelul a telungalek loba beltik el reng me a llemalt e ngerchelir el smiik e kudmokl aikel ousbech er a klechad me a ungil ulekerreu el mora telungalek. A kot el ngerchelir a rechedil a omekerreu e omekeroul er a rengelekir. Chelsel aikakid el chedaol el ngerachel, ea rechedam me a rechedil a kirir el kaukledem e kaingeseu el tabesul a ngerchelir. A lebor ngii a chelitechut, kodall, malechub eng kuk di ngodech el teletael, eng kirel kuk mo mengodech a teletelel aikal ngerachel. A re kauchad el chad a dirrek el kirir el kaingeseu.

Aki omeklatk er tirkel chad el tir a tomellii sel telbiil er a llach el kirel a delboes, el tir a melemall e omekringel e mengurusii e ra rebecherir me a rengelekir, malechub e te diak el ruul aike el ngerchelir er a telungalek a mo dechor e mo mukerkeriil er a medal a Dios er a ta er a klebesei. Osisiu, ea ki omeklatk el kmo a terudel a telungalek a mo uchul ea derstang el chad, me a hang, me a beluu a mo chuarm ra ringel me a kerior el ngii a mla medung er a rechuodel me a rebeches el profet.

Aki omekedong er a rokui el oungerachel el chad er a beluu me a remengeteklel a kabelment er a ngii dil ker me bo lolisiich aika el tekoi me a teletael el ngii a mla meketmokl el mo omecheliu e melisiich er a telungalek el ngii a kot el klou a ultutelel er a beluu.