Umndeni

Tsine, Bungameli bekuCala neMkhandlu webaPhostoli labaLishumi naKubili beLibandla laJesu Khristu Lalabangcwele Betinsuku Tekugcina, simemetela ngesizotsa kutsi umshado emkhatsini wendvodza nemfati umiswe nguNkulunkulu nekutsi umndeni ubaluleke kakhulu ngalokuphatselene nelisu leMdali laloko bantfwana Bakhe labadalelwe kona ingunaphakadze.

Bonkhe bantfu—lomdvuna nalomsikati—badalwe ngemfanekiso waNkulunkulu. Ngamunye uyindvodzana noma indvodzakati letsandzekako yemoya letalwa batali basezulwini, futsi, lawo madvodzana nemadvodzakati anebunjalo baNkulunkulu futsi bangaba njeNgaye. Bulili busimilo lesifunekako kumuntfu ngamunye emphilweni asete umtimba lobhubhako, sekanemtimba lobhubhako, kanye nelucobo lwakhe lwaphakadze kanjalo nenhloso yakhe.

Emphilweni kusete umtimba lobhubhako, emadvodzana nemadvodzakati emoya bekamati futsi amkhonta Nkulunkulu njengaBabe waPhakadze futsi emukela lisu lakhe ngalo bantfwana Bakhe labebangatfola umtimba wenyama futsi batfole kutibonela nekutivela ngekwabo emhlabeni kute bachubekele phambili bate bapheleliswe nya futsi ekugcineni bakwati loko labadalelwe kona ngekukaNkulunkulu njenge tindlalifa tekuphila lokuphakadze. Lisu laNkulunkulu lenjabulo livumela budlelwane bemndeni buchubeke emuva kwekufa. Imisimeto netivumelwano letingcwele letitfolakala emathempelini langcwele tenta kutsi umuntfu ngamunye akwati kubuyela ebukhoneni baNkulunkulu futsi nekutsi imindeni ihlanganiswe ingunaphakadze.

Umtsetfo wekucala Nkulunkulu lawunika Adamu naEva uhlangene nalokungenteka kute babe batali njengendvodza nemfati. Siyamemetela kutsi umtsetfo waNkulunkulu webantfwana Bakhe kutsi bandze bagcwalise umhlaba usemile nanyalo. Siyamemetela futsi kutsi Nkulunkulu uyale kutsi emandla langcwele ekwenta bantfwana kufanele asetjentiswe kuphela emkhatsini walosilisa newesifazane, labashade ngalokusemtsetfweni njengendvodza nemfati.

Siyamemetela kutsi indlela imphilo yemtimba lobhubhako ledalwe ngayo imiswe nguNkulunkulu. Siyacinisekisa kutsi imphilo ingcwele futsi nekutsi lobo bungcwele bubalulekile ngalokuphatselene nelisu laphakadze laNkulunkulu.

Indvodza nemfati banemtfwalo longcwele wekutsandzana futsi banakekelane kanjalo nebantfwababo. “Bantfwana balifa leliphuma eNkhosini” (Tihlabelelo 127:3). Batali banemsebenti lekufanele bawente longcwele wekukhulisa bantfwana babo ngelutsandvo nangekulunga, wekubanika tidzingo tabo tenyama netemoya, futsi netekubafundzisa kutsandzana nekusitana, bagcine imitsetfo yaNkulunkulu, futsi nekutsi bahloniphe timiso telive labo noma ngukuphi lapho bahlala khona. Emadvodza nebafati—bomake nabobabe—kuyodzingeka batiphendvulele embikwa Nkulunkulu mayelana nekugcina leto tibopho.

Umndeni umiswe nguNkulunkulu. Umshado emkhatsini wesilisa newesifazane ubaluleke kakhulu ngalokuphatselene nelisu Lakhe laphakadze. Bantfwana banelilungelo lekutalwa emshadweni, nekutsi bakhuliswe ngubabe namake lohlonipha tifungo temshado ngekwetsembeka lokuphelele. Injabulo emphilweni yemndeni kunekwenteka izuzeke uma isekeleke etimfundzisweni teNkhosi Jesu Khristu. Imishado nemindeni lenemphumelelo imiswe futsi igcinwe ngetimfundziso tekukholwa, umthandazo, kuphendvuka, kucolelana, kuhloniphana, lutsandvo, sihawu, kusebenta, kanjalo netindlela letinhle tekutijabulisa. Ngeluhlelo lwaNkulunkulu, bobabe kufanele bengamele imindeni yabo ngelutsandvo nangekulunga futsi banemtfwalo wekondla imindeni yabo ngetidzingo temphilo nekuyivikela. Bomake banemtfwalo lomkhulu wekukhulisa bantfwana. Kulemitfwalo lengcwele, bobabe nabomake banesibopho sekutsi basitane njengalabatsandzanako labalinganako. Kukhubateka, kufa, noma letinye timo tingadzinga kube nelushintjo kulomunye mayelana nalemitfwalo. Letinye tihlobo temndeni nato kufanele telekelele uma kunesidzingo.

Siyecwayisa kutsi labo labaphula letivumelwano tebumsulwa, labaphatsa kabi labo labatsandzana nabo noma bantfwana, noma labahlulekako kufeza imitfwalo lecondzene nemndeni ngalelinye lilanga kuyofanele batiphendvulele embikwa Nkulunkulu. Kwengeta, siyecwayisa kutsi kuhlakateka kwemndeni kutoletsa lusizi lolwabikwa bapholofethi basemandvulo nebanyalo kumuntfu ngamunye nangamunye, emiphakatsini, nasetiveni.

Sincusa tonkhe takhamuti letifanele nebaphatsi tikhundla kuhulumende ndzawo tonkhe kutsi bakhutsate leyo metamo lekuhloswe ngayo kutsi kugcinwe futsi kuciniswe umndeni njengencenye lebalulekile yesive.