Famili

Mipela, ol Nambawan Presidensi na ol Kaunsel bilong ol Twelvepela Aposel bilong Sios bilong Jisas Krais bilong ol Seint long Las De i sanap wantaim na givim bikpela tokaut tru olsem marit namel long wanpela man na wanpela meri em God i blesim na famili em i stap namel insait long plen bilong Em husat i wokim olgeta samting long kamapim dispela laip oltaim na stap bilong ol pikinini bilong Em.

Olgeta lain—man na meri—God i mekim ol long piksa bilong Em. Wanwan i stap olsem spirit pikinini man o meri bilong papa na mama i stap long heven husat i laikim ol tumas na olsem wanwan inap gat rot bilong stap oltaim. Kamap bilong wanwan olsem man o meri em i impoten moa na i stap long laip bipo, na long laip nau, na aidentiti na wok bilong em oltaim oltaim.

Insait long primotol laip pastaim long yumi kam long ples graun, olgeta spirit pikinini man na meri i save long God na i lotuim Em olsem Papa bilong Oltaim Oltaim na i wanbel wantaim plen bilong Em we ol pikinini bilong Em bai kisim bodi na ekspiriens long ples graun na wok long kamap olsem gutpela moa na luksave olsem ol tu inap kamap olsem God. Dispela plen bilong hamamas i halivim famili long stap wantaim oltaim bihain long dai. Ol holi odinens na kavanen insait long ol holi temple i givim wei olsem wanwan man na meri inap go bek long ai bilong God na ol famili inap stap wantaim oltaim oltaim.

Nambawan komanmen God em i givim long Adam na Eve i bin stap olsem tupela bai kamap olsem man na meri na kamap papa na mama. Mipela i tokaut olsem em i komanmen bilong God long ol pikinini bilong Em long kamap planti na pulumapim ples graun i stap strong yet. Mipela i tokaut moa olsem God i tok strong olsem ol sekred pawa bilong kamapim pikinini i mas kamap tasol namel long man na meri husat i marit aninit long lo.

Mipela i tokaut olsem God i makim rot bilong kamapim laip. Mipela i tok strong olsem laip i holi na em i impoten long plen bilong God.

Man na meri bilong em i gat bikpela wok long lavim na lukautim tupela yet na ol pikinini bilong tupela. “Ol pikinini i kam long Bikpela” (Psalm 127:3). Ol papa na mama i gat sekred wok long lukautim ol pikinini bilong ol wantaim lav na stretpela pasin, long lukautim nid bilong bodi na spirit bilong ol, na long lainim ol long lavim wanpela narapela, bihainim ol komanmen bilong God, na bihainim lo bilong graun long wanem hap ol i stap. Ol man na meri bilong ol—ol mama na papa—ol bai sanap long kot bilong God na tokaut long olgeta wok bilong ol.

Famili em God i odenim. Marit namel long man na meri em i bikpela tumas long plen bilong oltaim oltaim. Ol pikinini i mas kamap insait long banis bilong marit, na bai kamap bikpela aninit long lukaut bilong papa na mama husat i onaim na stap tru long promis bilong marit bilong tupela. Hamamas insait long famili em inap kamap long ol tok bilong Bikpela Jisas Krais. Ol gutpela marit na ol gutpela famili bai kamap sapos ol i bihainim lo bilong feit, beten, pasin bilong tanim bel, fogiv, rispek, lav, sore, wok, na ol gutpela bung bilong hamamas. Long plan bilong God, ol papa i mas lukautim ol famili bilong ol wantaim lav na stretpela pasin na ol i mas givim samting bilong stap laip na lukautim ol famili bilong ol. Ol mama i gat wok long lukautim ol pikinini bilong ol. Insait long ol dispela holi wok, ol papa na ol mama i gat wok long halivim wanpela narapela olsem tupela i wankain long marit bilong ol. Bagarap long bodi, dai na ol narapela kain samting i nap halivim man long senisim sindaun bilong em. Ol narapela famili na kandere inap halivim sapos i gat nid.

Mipela i tokaut olsem ol wanwan man husat i burukim lo bilong klinpela pasin, husat i bagarapim man o meri bilong em o pikinini bilong em o husat i no mekim wok bilong em long lukautim famili olsem ol bai sanap long kot long ai bilong God. Moa yet, mipela i tok lukaut olsem buruk bilong famili bai bagarapim ol wanwan man o meri long komuniti na ol nesen na dispela em ol bikpela hevi ol profet bilong bipo na nau i tokaut pinis long en.

Mipela i singaut long olgeta sitisen husat i bihainim lo bilong graun na ol opisa bilong gavman long olgeta hap long promotim ol wei bilong lukautim na strongim ol famili olsem bikpela unit bilong sosaiti.