Christ Ɔtseasefo No

Mber a yeridzi Jesus Christ N’awoo mfe apem ebien a wɔabɛsen kɔ ho fa dze rekaa No no, yɛma hɛn dasegye wɔ N’abrabɔ a onnyi kãbea na No werdam afɔrbɔ kɛse no tum a ɔmmbɔadze ho dɛ, ɔyɛ nokwar. Obiara nnyaa nhyɛdo nwanwa wɔ hɔn a wɔatsena ase nyina na hɔn a wɔbɛtsena ase nyina wɔ asaase do, kã No nko.

Ɔno nye Jehovah Kokroko no wɔ Ahyɛmu Dadaw no mu, Messiah no wɔ Fofor no mu. N’Egya N’akwankyerɛ mu no, Ɔno na ɔyɛɛ asaase bɔfo. “Wɔnam no do yɛɛ adze nyina; na woennkwetsi no annyɛ biribiara a wɔyɛe” (John 1:3). Kaansa Ɔannyɛ bɔn, naaso wonumaa No ama Ɔaahyɛ tsenenee nyina mã. Ɔno “okyinii yɛɛ yie” (Ndwuma 10:38), naaso wobuu no enyimtsia wɔ ho. Nna N’asɛmpa yɛ asomdwee na nsiesie nsɛm. Ɔtotɔe serɛɛ obiara dɛ ondzi Ne fasusu do. Ɔbɔɔ anamɔn wɔ Palestine atsɛmpɔn no do, saa yarba, maa enyifurafo hun adze na Onyaan ewufo no. Ɔkyerɛkyerɛɛ mfesantsen nokwar ho nsɛm, hɛn ɔnnkyebo asetsena ansaana yɛreba asaase do no ho nokwar, hɛn abrabɔ wɔ asaase do no botae, na mbrɛ Nyame ne mbabanyin na mbabaa hɔn ndaamba mpontu bɛyɛ wɔ abrabɔ a ɔreba no mu.

Ɔhyɛɛ sacrament no ase dɛ nkaa wɔ No werdam afɔrbɔ kɛse no ho. Wɔkyeer no na wɔdze dasekrum buu no fɔ dze dwedwee dɔm tutuw hɔn akoma na wobuu no okumfor wɔ Nyitsirdo mbeamudua do. Ɔdze No nkwa mae dze bɔɔ werdam maa adasa nyina hɔn bɔn. Ɔyɛɛ nsiananmu akyɛdze kɛse maa hɔn a wɔbɛtsena asaase do nyina.

Yɛgye dase enyidzi mu dɛ N’abrabɔ, a adasa nyina abakɔsɛm gyina do no, annhyɛ ase wɔ Bethlehem, eso oennwie wɔ Nyitsirdo do. Ɔno nye Egya N’Abakan, Ɔba Kortonoo a Wɔwoo No honam mu no, Wiadze Pomfo no.

Ɔsoɛree fii owumaa mu “bɛyɛɛ hɔn a wɔadeda mu eduaba kan. ” (1 Corinthfo 15:20). Dɛ Ewuradze a Ɔasoɛr no, Ɔkɛseraa hɔn a Ɔdɔɔ hɔn wɔ Ne ɔnnkyebo abrabɔ mu no. Ɔkɔsoom No “nguan bi so” (John 10:16) wɔ tsetse America man mu. Hɛn ndɛ wiadze mu no, Ɔno na N’Egya puee Joseph Smith do, a ɔdze “efisiesie mber pa amayɛ” a wɔabɔ ho anohoba dada no bɔbɔɔ adze (Ephesusfo 1:10).

Nkɔnhyɛnyi Joseph kyerɛɛw wɔ Christ Ɔtseasefo no ho dɛ: “N’enyiwa tse dɛ ogyaframee; tsinhwi a ɔwɔ ne tsir do no yɛ fitaa tse dɛ esukwankyɛba mapa; n’enyim hyerɛnee kyɛɛn ewia ne hyerɛn; na ne ndze tse dɛ esu akɛse a ɔrepem, Jehovah ne ndze mpo, rese dɛ:

“Emi nye ɔkandzifo nye okyidzifo no; emi nye nyia ɔtse ase no, emi nye nyia wokum no no; emi nye hom dzimafo wɔ Egya no nkyɛn” (N&A 110:3–4).

Nkɔnhyɛnyi no paa mu kãa No ho asɛm so dɛ: “Na afei, dasegye pii a wɔdze ama wɔ no ho no, iyi nye dasegye a odzi ekyir koraa, yɛgye dase wɔ no ho dɛ: Ɔtse ase!

“Osiandɛ yehun no, dɛ ɔwɔ Nyame n’abanyimfa; na yɛtsee ndze a ɔregye dase dɛ ɔno nye Egya ne Ba a Wɔwoo no Kortoo no—

“Na wɔnam no do, na wɔnam no mu, na ɔnoara so na ɔbɔɔ wiadze, na hɔn a wɔtse do nyina wɔwoo hɔn Nyame ne mbabanyin na mbabaa” (N&A 76:22–24).

Yɛpaa mu kã wɔ enyidzi nsɛm mu dɛ N’asɔfodzi na N’Asɔr a wɔaasan no ananmu wɔ asaase do—“wɔdze … esi asomafo nye nkɔnhyɛfo no fapem do, a Christ Jesus nankasa nye kutuwdo-bo tsitsir” (Ephesusfo 2:20).

Yɛgye dase dɛ da bi Ɔbɛsan aba asaase do. “Na wɔbɛda Ewuradze n’enyimnyam edzi, na adasa nyina abɔ mu ehu” (Isaiah 40:5). Ɔbɔhwɛ asaase do dɛ Ahemfo Hen na Oedzi hen dɛ Ewuranom Ewuradze, na anankroma nyina bɔkotow na tɛkyerɛma nyina bɛkasa ayɛyi mu wɔ N’enyim. Hɛn mu kor biara begyina N’enyim ma Oebu hɛn atsen dɛ mbrɛ hɛn ndwuma na hɛn akoma n’apɛdze tse.

Yɛgye dase, dɛ N’Asomafo a wɔahyɛ hɛn asɔfo wɔ kwan a ɔtsen mu no—dɛ Jesus nye Christ Ɔtseasefo no, Nyame Ne bɛkyebo Ba no. Ɔno nye Ɔhen kɛse Immanuel no, a ndɛ Ogyina N’Egya N’abanyimfa. Ɔno nye kan no, nkwa no, na wiadze enyidado no. No kwan nye anamɔn kwan a ɔtsen kɔ enyigye wɔ abrabɔ yi mu na onnyiewiei nkwa wɔ wiadze a ɔreba no mu. Yɛda Nyame ase wɔ Ne Ba krɔnkrɔn akyɛdze a onnyi kãbea no ntsi.

President a Odzi Kan na N’apamfo

Abaguafo Duebien No