Ti Sibibiag a Cristo

Ti Pammaneknek dagiti Apostol

Ti Simbaan ni Jesucristo dagiti Santo iti Ud-udina nga Aldaw

Bayat ti panangrambaktayo iti pannakayanak ni Jesucristo dua ribu a tawenen ti napalabas, idiayami ti pammaneknekmi maipapan iti kinapudno ti awan kapadana a biagna ken ti awan patinggana a kinatarnaw ken bileg ti naindaklan a pangsubbot a sakripisiona. Awan ti sabali pay a naun-uneg a pangaring iti amin a nagbiag ken agbiagto pay laeng iti rabaw ti daga.

Isu ti Naindaklan a Jehova iti Daan a Tulag, ti Mesias iti Baro a Tulag. Babaen ti panangiturong ti Amana, Isu ti namarsua ti daga. “Dagiti isu amin napaaddada gapu kenkuana, ket no isu awan, awan ti napaadda kadagiti adda” (Juan 1:3). Nupay awan basolna, Isu ket nabuniagan tapno matungpal ti amin a kinalinteg. Isu ket “namagpagna a nagar-aramid iti naimbag” (Dagiti Aramid 10:38), ngem nauyaw isuna gapu iti daytoy. Ti ebangheliona ket maysa a mensahe ti talna ken pagimbagan. Sipapasnek a kiniddawna iti amin a sumurot iti pagwadanna. Nagna Isuna kadagiti kalsada ti Palestina, nangagas kadagiti masakit, nangted panagkita kadagiti bulsek, ken nangpagungar kadagiti natay. Insurona dagiti kinapudno ti agnanayon, ti kinapudno ti kaaddatayo iti biag sakbay daytoy a biag, ti panggep ti biagtayo iti daga, ken ti potensial para kadagiti lallaki ken babbai nga annak ti Dios iti umay a biag.

Inrugina ti ordinansa ti sakramento kas panglaglagip iti naindaklan a pangsubbot a sakripisiona. Isu ket natiliw ken nakedngan gapu kadagiti inuulbod a pammabasol, nakedngan tapno mangparagsak iti maysa a bunggoy dagiti mangriribuk, ken nakedngan a matay iti krus iti Kalbario. Intedna ti biagna tapno subbotenna ti basbasol ti amin a sangkataw-an. Ti sagutna ket maysa a naindaklan a sagut nga agpaay iti amin nga agbiagto iti rabaw ti daga.

Sipapasnekkami a mangipaneknek a ti biagna, nga isu ti kangrunaan iti amin a pakasaritaan ti tao, a nagbiag ni Cristo sakbay ti naindagaan a pannakayanakna iti Betlehem ket nagtultuloy a nagbiag kalpasan ti naindagaan a pannakatayna iti Kalbario. Isu ti Inauna ti Ama, ti Bugbugtong nga Anak iti lasag, ti Mannubbot ti lubong.

Nagungar manipud iti tanem tapno “isu ti umuna a bunga kadagiti matmaturog” (1 Taga-Corinto 15:20). Kas Nagungar nga Apo, simmarungkar Isuna kadagiti impategna iti biag. Nagserbi pay Isuna kadagiti sabsabali a karnero[na]” (Juan 10:16) iti nagkauna nga America. Iti moderno a lubong, nagpakita Isu ken ti Amana iti ubing a ni Joseph Smith, a nangirugi iti nabayagen a naikari a “dispensasion ti pannakatungpal dagiti panawen” (Taga-Efeso 1:10).

Maipanggep iti Sibibiag a Cristo, insurat ni Propeta Joseph: “Kasla dumardarang nga apuy dagiti matana; puraw ti buokna a kas iti puro a niebe; naranraniag ti rupana ngem iti init; ket ti timekna kas iti anasaas ti dakkel a danum, a kas iti timek ni Jehova, a nagkuna:

“Siak ti umuna ken maudi; siak ti nagbiag, siak ti napapatay; siak ti mangibabaet kadakayo iti Ama” (DkK 110:3–4).

Maipanggep Kenkuana impakdaar pay ti Propeta: “Ket ita, kalpasan ti adu a pammaneknek a naipaay kenkuana, daytoy ti pammaneknek, a maudi iti amin, nga ipaaymi kenkuana: A sibibiag!

“Ta nakitami, uray ti makanawan ti Dios; ket nangngegmi ti timek a mangpaneknek nga isu ti Bugbugtong ti Ama—

“A babaen kenkuana, ken gapu kenkuana, ken kenkuana, mabukel ken nabukel dagiti lubong, ket nagbalin nga annak a lallaki ken babbai ti Dios dagiti agindeg kadagitoy” (DkK 76:22–24).

Ipakdaarmi kadagiti balikas a maited a sipapasnek ken sipupudno a naisublin iti daga ti kinasaserdotena ken ti Simbaanna—“a nabangon iti rabaw ti simiento dagiti apostol ken mammadto, ket ni Cristo Jesus met laeng ti bato a nangnangruna ti iking” (Taga-Efeso 2:20).

Paneknekanmi nga Isu ket agsublinto iti daga iti maysa nga aldaw. “Ken ti dayag ni Jehova maiparangarangto, ken amin a lasag isu ti makitadanto amin” (Isaias 40:5). Agturayto Isuna kas Ari dagiti Ari ken agturayto a kas Apo dagiti Appo, ken agparintumengto amin a tumeng ket amin a dila agipudnonto kas pagdayaw iti sangona. Tunggal maysa kadatayo ket agtakderto tapno ukomennatayo a maibatay kadagiti aramidtayo ken dagiti tarigagay ti puspusotayo.

Iburaymi ti pammaneknekmi, kas siuumno a naordenan nga Apostol—a ni Jesus ti Sibibiag a Cristo, ti imortal nga Anak ti Dios. Isu ti naindaklan nga Ari Emmanuel, a nagtakder ita nga aldaw iti makanawan nga ima ti Amana. Isu ti silaw, ti biag, ken ti namnama ti lubong. Ti dalanna isu ti dana nga agturong iti kinaragsak iti daytoy a biag ken agnanayon a biag iti lubong nga umay. Agyamantayo iti Dios gapu iti sagut ti nadiosan nga Anakna, a ti sagutna awan ti kapada wenno kayariganna.