Kraist Suc Moul

Ke kuht ahkfuhlwactye isuslah luhn Jisus Kraist yac tausin luo som lah ah, kuht usot ke pwacyeiyacn fahkwack ke luhlahlfongi lasr lah wacngihn sie oacna moul lal ac ke kuh yohk lal in iwaclah mwet uh. Wacngihn sie mwet suc muhta met ac ke pacl se inge oacna el.

El pa Jeova kuhlacna ke Wuhleacng Mahtuh, Messiah ke Wuhleacng Fuhsr. Ke kohkoh luhn Pahpah Tuhmwacl, El pa oraclah facluh. “Ma nuhkwewa oreklac sel; ac fin tiac el wacngihn ma nuhkwewa ma oreklac uh” (John 1:3). Ne wacngihn ma koluk lal, El pacptaislac in ahkpwacyei ma suwohswohs nuhkwewa. El “fuhfahsryucsr in orekma wo” (Orekma 10:38), ohinge srukhngacyuck el kac. Wosasuc lal sie mwe fahkwack in mihs ac engan. El kwacfe nohfohn in fahsr tukun srihkahsrak lal. El fuhfahsryucsr Palestine, ahkweyelah mwet mas, oruh mwet kuhn in liye, ac ahkmoulyeack mwet misac. El luti ma pwacye ke moul ma pahtpaht, ma pwacye ke moul in nguhn lasr met, srihpen moul lasr fin facluh ac kapkapwack luhn tuhlihk mogul ac tuhlihk muhtwacn nuhtin God ke moul se fahsruh uh.

El oraclah akwuck nuh ke kuhfa luhn Leum in mwe acsmakihn se nuh ke kuhsackuhnlah yohk lal. El sruh uh ac ahkoluhkyeyuck ke mwe looh stuuh, sruhuh ke sap luhn mwet lokoalok, ac wotlac lacn misac ke sahkseng fin acn Calvary. El sang moul lal in iwaclah ma koluk luhn mwet nuhkwewa. El sie mwe sang yohk in sang aholuhlos nuhkwewa suc ac fah muhta fin facluh.

Kuht ahkpwacyei lah moul Lal, pa yohk srihpac omet ke moul luhn mwet nuhkwewa, tuhsruhk moul lal tiac na muhtwacwacack ke isuslac lal Bethlehem ac tiac sahflah tukun misac lal Calvary. El pa fahko se met Nuhtin Pahpah, Wen Kuloh se fanna in ikoac, Mwet in molwelah luhn facluh.

El moulyak liki kulyuck uh ke “fahko se met lalos suh mutul” (1 Corinthians 15:20). Ke el Leum suc moulyak, El muhtwacta nuh yohrohlos suh el luhngse ke moul se inge. El oacyacpac luti nuh sin “kuhtwe pac sip nahtuhl” (John 10:16) fin acn Macrke met. Fin facluh mihsenge, El ac Pahpah Tuhmwacl sihkyang nuh sel tuhlihk mogul srihsrihk Joseph Smith, ahkkahlwemye sie olwelah kawihl ke “fohnlah luhn ma nuhkwewa ke we se inge” (Efesus 1:10).

Ke Kraist Suc Moul, Mwet Pahluh Joseph el suhmuhslah fahk muh muhtahl fihrihr oacna sie kahlwem luhn e; aunsifacl fasrfasr oacna sno; ngwetngwetwacl sahromrom oacna kahlwem luhn fat; ac puhsracl oacna kahsruhsr luhn acsr finne puhsren Jeova, el fahk,

Nga pa muhtwacwacack ac sahflah; Nga pa el suc moul, nga pa el suc acnwucki, nga ahohl kowos nuh sin Pahpah (liye O&W 110:3–4).

Kacl suc Mwet Pahluh oacyacpac ahkkahlwemye lah, tukun fahkwack ke luhlahlfongi pucspucs suc oreklac Kacl, pa inge fahkwack ke luhlahlfongi, ma sahflah se liki nuhkwewa, suc kuht kuh in fahk kacl: Lah el moul!

Tuh mwet fahluh liyacl, ke lacpo lacyot sin God ac kuht lohng puhsra se ahkkahlwemye lah el Wen Kuloh Se fanna Nuhtin Pahpah—

Tuh ke el, ac yohrohl, ac in el, facluh oreklac, ac tuh mwet fac fah tuhlihk mukul ac tuhlihk muhtwacn nuhtin God (liye O&W 76:22–24).

Kuht olwelah in fahk na pwacye lah pristut Lal ac Alu Lal sifil fohlohkihnyuckyak fin facluh— “muhsahiyuckyak ke pwelucng luhn . . . mwet sap ac mwet pahluh, Jisus Kraist sifacna pa muhtuhn yot in sroasrihk” (Efesus 2:20).

Kuht ahkpwacyeilah El ac sie lwen fohlohk nuh facluh. “Ac wolacna luhn Leum e fah fwacyuck, ac ikwac nuhkwewa fah tuhkweni liye” (Isaiah 40:5). El ac fah nuhnuhnkuh in kuh in Tohkohsrah luhn Tohkohsrah ac Leum luhn Leum, ac niyac nuhkwewa fah kotkot uh ac lohoh nuhkwewa fah sramsram in alu nuh sel. Kais sie sesr e fah tu nuhnuhnkweyuck sel in fal nuh ke orekma lasr ac kena luhn insiyacsr.

Kuht fahkwack ke luhlahlfongi, muh Mwet sap ahkkweyeyucklac se Lal—lah Jisus pa Kraist Suc Moul, Wen Kuloh Nuhtin God ke Nguhn. El pa Tohkohsra Immanuel, suc tu mihsenge ke lwacpo lwacyot sin Pahpah Tuhmwacl. El pa kahlwem, moul, ac finsrak luhn facluh. Inkacnek lal pa kol kuht nuh ke engan ke moul se inge ac moul ne tok ma pahtpaht ke facluh se tok uh. Kuloh nuh sin God ke mwe sang yohk se ke Wen kuloh nahtuhl suc wacngihn kihsrucngyacl.

Prestuhnsi Se Met

U Luhn Mwet Singucul Luo