Krais Ieiaso

Kadehde En Wahnpoaron Akan

Mwomwohdiso En Sises Krais En Souleng En Imwin Rahn Akan

Ni atail katamanda ipwdien Sises Krais sounpar riekid samwalahro, kitail kin kihda atail kadehde en mehlel en sapwellime Ieias lap oh manaman lap duwen sapwellime meirong en tomw kesempwalo. Sohte emen me ahnekier soangen lipwalipw loal ong koaros me mourehr oh me pahn ipwidi pohn sampa.

Iei ih me Siohwa Lapalap en Kadehde Mering, Mesaia en Kadehde Kapw. Sang ni kaweid en Semeo, iei Ih me sounkapikipik en sampah. “E ketin kapikadahr mehkoaros; oh ma sohte Ih sohte mehkot me wiawidahr en mie” (Sohn 1:3). Mendahte sohte dipe, E ketin pepdaislahr pwehn kapwaiahda pwunglahn mehkoaros. E “ketselier oh wiadahr me mwahu” (Wiewia kan 10:38), ahpw aramas akan sohte pwungki. Sapwellime rongamwahuo iei rohng en meleileioh nsenamwahu. E ketin pekier koaros en idawehn sapwellime karasaras. E ketin aluhier nan ahl akan en Palistain, kamwahwiala me soumwahu kan, wiahiong me maskun kan en kilangada wasa, oh kamourada me melahr akan. E ketin padahkihong kitailehr padahk mehlel akan duwen mour soutuk, mehlel en atail mour mwohn mouret, kahrepen atail mour pohn sampah, oh dahme sapwellimen Koht aramas koaros en kak wiahla nan mour kohkohdo.

E ketin wiadahr kamadipw sarawi en wia mehn ketemen en sapwellime meirongen tomw me e ketin wiahier. E ketin poaridier oh dipkidahr kadipadip likamw akan, alehdier kalokolok pwehn kainsenamwahuiala ineng en pwihn en aramas lingerer pah kan, alehdier kalokolok, oh kamatala ni lohpwu en Kalpweri. E ketikidahr sapwellime ieiaso pwehn tomwkihla dipen aramas koaros. Sapwellime tomwo iei kisakis ehu me wia weliepen koaros me pahn mour pohn sampah.

Se kadehde ni wahu me sapwellime ieiaso me keieu kesempwal ong nan poadoapoad en aramas koaros, sohte tepida nan Bedleem de keimwsakala pohn kalpweri. Iei ih me mesenih en Sahmo, ihte Iehros en Koht ketin wiadahr ni war, iei Ih me Soundoar en Sampah.

E ketin iasadahsangehr nan sousouo pwehn wiahla tepin aramas me iasadasang irail me melahr akan” (I Korint 15:20). Nin duwen Ih Kauno a ketin iasadahr,E ketin pwarekehr irail akan me e kin ketin poakepoake nan mour. E pil ketin padahkongehr “ekei sampwellime sihpw akan” (Sohn 10:16) nan Amerika ni keilahn aio. Nan sampah kapw wet, Sises oh Seme ketin pwarongehr pwutak Joseph Smith, ni tepin irair en unseklahn ansou kan” me inoupe mie wereilahr (Episos 1:10).

Me pid Krais Ieiaso, Soukohp Joseph ntingihdier: Sapwellime (pwoarenmas) akan duwehte mpwul en kisiniei; piten tapwi pwetepwet duwehte sno; sihlangio linganla dauli marain en ketipin; oh kapitie duehte pwilipwil en pillap akan, iei ihme kapitien Siohwa, mahmahsanih:

“Ngehi me tapi oh imwi; ngehi me momourehr, ngehi me kamakamalahr; ngehi iei amwail sounsawas rehn Sahmo” (D&C 110:3–4).

Me pid Sises Krais, Soukohpo pil kalohkier: “Oh met, mwurin kadehde tohto me kohdahr duwen ih, met iei ih kadehdeo, keimseklahn kadede koaros, me se kadehdehkier duwen ih: Me e ketin ieias!”

“Pwe se kilangehr ih, iei ih me ketiket palimaun en Koht; oh se rongehr kapitieo wie kadkadehde me iei ih me sapwellimen Sahm Ieiroso –

“Sang Ih, oh ong Ih, oh duen Ih, sampah kan nin duen irail met oh arail kepikipikdahr, oh towehkan me wia Sapwellimen Koht pwutak oh serepein.” (D&C 76:22–24).

Se kalohki ni ngoang me sapwellime priesthoodo oh sapwellime Mwomwohdiso kapwurupwurodohngehr sampah—“me kakaudahr pohn poahson en … wahnpoaron akan oh soukohp akan, Sises Krais me pein wia takain pwukekeimwo” (Episos 2:20).

Se kadehde me ehu rahn E pahn ketin sapahldohng sampah. “Oh lingan en Koht pahn sansalada, oh aramas koaros pahn kilang” (Aiseia 40:5). E pahn ketin kaunda nin duwen Nanmwariki en Nanmwariki kan oh ketin kakaun nin duwen Kaun en Kaun akan, oh aramas koaros pahn kelepwikihdi oh lokaia koaros pahn kadehde ni wahu mwohn sihlahngi. Emen emen kitail pahn pahkadeikada reh nin duwen atail doadoahngkan oh ineng nan mohngiongitail kan.”

Se wia kadehde, nin duwen Sapwellime wahnpoaron dehde kan me pilipildahr, me Sises iei Krais Ieias iei Iehros en Koht me pahn ieias soutuk. Iei ih Nanmwarki Lapalap Immanuel, me rahnwet ketiket palimaun en Sahm. Iei ihme maraino, mour, oh koapwoaroapwoar en sampah. Sapwellime ahlo iei ahl me kolahng peren nan mouret oh mour soutuk en nan sampah me pahn kohdo. Kalahngan en kohieng Koht pwehki kisakis en sapwellime pwutako, me sohte mehkot me kak rasohng.