Khristu Lophilako

Bufakazi bebaPhostoli

Libandla laJesu Khristu Lalabangcwele Betinsuku Tekugcina

Njengoba sikhumbula kutalwa kwaJesu Khristu tinkhulungwane letimbili teminyaka leyengcile, setfula bufakazi betfu beliciniso ngemphilo Yakhe lengalinganiswa nangemandla Akhe langapheli ngemhlatjelo Wakhe lomkhulu lohlawulako. Kute lomunye loke waba nemtselela lojule kangaka kubo bonkhe labake baphila nalabasetawuphila emhlabeni.

Bekangu Jehova lomkhulu weliThestamente leLidzala, Mesiya waLelisha. Ngekusebentisa kuholwa nguBabe Wakhe, bekangu Mdali wemhlaba. “Konkhe kwadalwa ngaye; ngaphandle kwakhe kute lokwadalwa kuko konkhe lokudaliwe” (Johane 1:3). Noma bekangenasono, wabhajatiswa kufeza konkhe kulunga. Waya “kuyo yonkhe indzawo enta lokuhle” (Imisebenti yebaPhostoli 10:38), kodvwa bekatondzelwa loko. Livangeli Lakhe belingumlayeto wekuthula nentsandvo lenhle. Wancenga bonkhe kutsi balandzele sibonelo Sakhe. Wahamba emigwacweni yemaFilistiya, aphilisa labagulako, enta timphumphutse titfole kubona kwato, kanye nekuvusa labafile. Wafundzisa emaciniso angunaphakadze, emaciniso ngemphilo sisete umtimba lobhubhako, injongo yemphilo yetfu emhlabeni, nalangakhona kukwenta emadvodzana nemadvodzakati aNkulunkulu emphilweni letako.

Wamisa sidlo seNkhosi njengesikhumbuto semhlatjelo Wakhe lomkhulu lohlawulako. Waboshwa waphindze wabekwa emacala langemanga, walahlwa ngelicala kwenelisa sicuku sebantfu, futsi wagwetjelwa kufa esiphambanweni saseGolkotha. Wanikela ngemphilo Yakhe kuhlawulela tono tabo bonkhe bantfu. Kwakhe kwabasipho lesikhulu lesimelele bonkhe labatawuphila emhlabeni.

Ngesizotsa siyafakaza kutsi imphilo Yakhe, lebaluleke kakhulu emlandvweni webantfu bonkhe, ayitange icale eBhetlehema futsi ayephetselanga eGolkotha. Bekalitubulo leYise, iNdvodzana letelwe yodvwa ngekwenyama, umHlengi wemhlaba.

Wavuka ethuneni “waba titselo tekucala kulabo labatawuvuka kulabafile” (catsanisa 1 kubase-Khorinte 15:20). NjengeNkhosi leyavuka,wavakashela labo bekabatsandza emphilweni. Waphindze washumayela “letinye timvu” Takhe (Johane 10:16) tasemandvulo eMelika. Emhlabeni wanyalo, Yena naBabe Wakhe bavela emfaneni Joseph Smith, bacala setsembiso lebesetsenjiswe kudzala “seluhlelo lwekwengamela lekuphelela kwetikhatsi” (catsanisa Kubase-Efesu 1:10).

NgaKristu lophilako, umPholofethi Joseph wabhala: Emehlo Akhe bekafanana nelilangabi lemlilo; tinwele tenhloko Yakhe betimhlophe njengelichwa lelicwebile; buso Bakhe bebukhatimula ngetulu kwekukhanya kwelilanga; futsi livi Lakhe lalinjenge nhlokomo yemanti lamaningi, ngisho livi laJehova lisho kutsi:

Usicalo nesiphetfo; Unguye lophilako, Unguye lowabulawa; Ungummeli wetfu kuBabe (buka T neT 110:3–4).

UmPholofethi futsi wamemetela Ngaye kutsi: emva kwebufakazi lobuningi losebunikiwe ngaye, nabu bufakazi, ekugcineni kwako konkhe, umPholofethi labunikako Ngaye: Kutsi uyaphila!

Ngoba umPholofethi wambona, ngisho ngasesandleni sekudla saNkulunkulu; futsi umPholofetho weva livi lifakaza kutsi uyiNdvodzana letelwe yodvwa kuBabe—

Kutsi Ngaye, futsi ngendlela Yakhe, futsi nangemasu Akhe, imihlaba ikhona futsi yadalwa, nebantfu bayo bangemadvodzana nemadvodzakati latelwe kuNkulunkulu. (buka T neT 76:22–24).

Simemetela ngemagama ekuzotsa kutsi buPhristi Bakhe neLibandla Lakhe kubuyiselwe esimeni emhlabeni—“kwakhelwa etikwesisekelo … sebaPhostoli nebaPholofethi, Jesu Khristu lucobo ulitje lelisimise lendlu” (Kubase-Efesu 2:20).

Siyafakaza kutsi ngalelinye lemalanga utawubuya emhlabeni. “Futsi inkhatimulo yaSimakadze iyakwembulwa, nalolonkhe luntfu luyakuyibona” (Isaya 40:5). Utawubusa njengeNkhosi yemakhosi aphindze abuse njengeMbusi webabusi, futsi onkhe emadvolo ayawukhotsama futsi tonkhe tilimi tiyawukukhuluma tikhonte embiKwakhe. Ngamunye nangamunye wetfu siyawumela kwehlulelwa Nguye ngemisebenti yetfu nangetifiso tetinhlitiyo tetfu.

Setfula bufakazi, njengebaPhostoli Bakhe labagcotjwe ngalokufanele—kutsi Jesu nguKhristu lophilako, iNdvodzana yaNkulunkulu lengabhubhi. UyiNkhosi lenkhulu Imanyuweli, lome namuhla ngasesandleni sekudla saBabe Wakhe. Ukukhanya, uyimphilo, nelitsemba lalamhlabeni. Indlela Yakhe yindlela leholela ekujabuleni kulemphilo lena naleyo mphilo lengunaphakadze emhlabeni lotako. Nkulunkulu akabongwe ngesipho lesingalinganiswa lesiyiNdvodzana Yakhe levela kuye.