Kaokan Bwaninin Ana Euangkerio Iesu Kristo

Ti katanoata ma te nano ni koaua bwa e tangiriia Natina te Atua n taabo nako n te aonaaba. E a tia te Atua te Tama n anganiira te bungiaki ae mimitong, te maiu ae akea kabotauana, ao ana anga karea ae akea tiana Natina ae Tangiraki, Iesu Kristo. Man mwaakan te Tama, e a tia ni mangauti Iesu ao ni karekea te tokanikai iaon te mate. Bon Ngaia ara Tia Kamaiu, ara Banna ni Katooto, ao te Tia Kabooi Maiura.

Uabubua te ririki n nako, ni moaningabongin te tiburing n 1820, te kairake ae Iotebwa Timiti, e ukoria ni kan ataia bwa enga te ekaretia ae na iria, e nakon te buakonikai n tataro irarikin mweengana i New York, USA. Iai ana titiraki ni kaineti ma kamaiuan tamneina ao ni kakoaua bwa te Atua e na bon kairia.

Ma te nanorinano, ti katanoata bwa ni kaekaan ana tataro, te Atua te Tama ao Natina, Iesu Kristo, a kaoti nakon Iotebwa ao ni moana “kaokan bwaai ni kabane” (Mwakuri 3:21) n aron are e a kaman taekinaki n te Baibara. N te mii ni burabeti aei, e reiakinna bwa imwiin mateia moan Abotoro, Ana Ekaretia Kristo n te Nu Tetemanti e bua man te aonaaba. E na riki Iotebwa bwa te bwai ni mwakuri ni kaokana.

Ti taekinna ni kaotia bwa iaan ana kairiiri te Tama ao Natina, taan uarongorongo mai karawa a roko n reireina Iotebwa ao ni manga katea ana Ekaretia Iesu Kristo. Ioane te tia Bwabetito are e a tia ni manga kautaki e kaoka te kariaia ni bwabetito man te kateboaki inanon te ran ibukin kabwaraan buure. Teniman mai ibuakoia moan Abotoro ake tengaun ma uoman—Betero, Iakobo, ao Ioane—a kaoka te mwakuri n abotoro ao kiing n te kariaia n te nakoanibonga. A roko naba tabeman, n raonaki ma Eria, are e kaoka te kariaiakaki bwa utu a na ikotaki n akea tokina n te reitaki n te maiu are akea tokina are e riaon te mate.

Ti kakoaua riki bwa Iotebwa Timiti e anganaki te bwaintangira ao mwaakan te Atua n raira te rekooti are ngkoa: Ana Boki Moomon—Kakoauan Taekan Iesu Kristo. Inanon baan te koroboki ae tabu aei iai rongorongon ana mwakuri Iesu Kristo ibuakoia aomata n iteran te Aonaaba are i Maeao imwiin Mangautina. E reirei bukin te maiu aei ao e kabwarabwarai ana reirei Kristo, are e kakawaki nakon te kantaninga anne. Ngkai te boki ae tabu ae reitaki ma te Baibara, Ana Boki Moomon e kakoaua bwa aomata ni kabane bon naati mwaane ao aine iroun Tamara are i Karawa ae tatangira, ao iai Ana babaire mai ieta ibukin maiura, ao bwa Natina, Iesu Kristo, e taetae n te bong aei n aron boong ake rimoa.

Ti katanoata bwa Ana Ekaretia Iesu Kristo ibukiia Aika Itiaki ni Boong aika Kaitira, are e kateaki n Eberi 6, 1830, bon Ana Ekaretia Kristo are n te Nu Tetemanti ae kaokaki. E boboto te Ekaretia aei iaon maiun atibun te maninganinga ae kororaoi, Iesu Kristo, ao Ana Mwakuri ni Kamaiu ae akea tokina ma Mangautina. E a tia Iesu Kristo ni manga weteia Abotoro ao e a tia n anganiia te kariaia n te nakoanibonga. E kaoira ni kabane bwa ti na Nakoina ao n nakon Ana Ekaretia, ni karekea te Tamnei ae Raoiroi, otenanti ni kamaiu, ao ni karekea te kimwareirei ae teimatoa.

E a nako ngkai uabubua te ririki mai imwiin te tai ngke Kaokan Bwaai e moan kaokaki iroun te Atua te Tama ao Natina ae Tangiraki, Iesu Kristo. Mirion ni kabuta te aonaaba a tia ni butimwaea te atatai ni baika a riki aikai ake a kaman taetae ni burabetiaki.

Ti kukurei ni katanoata bwa Kaokan Bwaai ake a tia n taekinaki n te berita ae a bon waaki nako rinanon kaotioti aika teimatoa. E aki kona te aonaaba ni manga titebo, ngkai te Atua e na “boti bwaai ni kabane i nanoni Kristo” (I-Ebeto 1:10).

Ma te karinerine ao te kakaitau, ngaira aika Ana Abotoro ti kaoi ngkami bwa kam na ataia—n aron ae ti ataia—bwa e kaukaki karawa. Ti kamatoa bwa te Atua e kaota Ana kantaninga ibukiia Natina mwaane ao aine aika tangiraki bwa a na ataia. Ti kakoaua bwa naake a tataromwaaka ni kamatebwaia rongorongon Kaokan Bwaai ao ni karaoia ma te onimaki a na kakabwaiaaki ni karekei oin aia koaua bwa bon mai iroun te Atua ao te kantaninga iai bwa e na katauraoa te aonaaba ibukin manga Kauaokin ara Uea ao ara Tia Kamaiu, Iesu Kristo.