Ewe Niwinsefaniton ewe Unusochun ewe Kapas Allimen Jises Kraist

Aua ennetin pwarata pwe Kot mi tongei Noun semirit non ekkewe muu meinisin non fonufan. Kot ewe Sam a fen ngenikich ewe uputiw mi pin, ewe manau mi nap, me ewe asoren achasefan esemuch an Noun we Achengicheng, Jises Kraist. Iwe ren ewe manamanen ewe Sam, Jises a manausefan me akkufu mano. I ach Chon Amanau, ach Nenien Appiru, me ach Chon Angasano.

Ruepuku ier a no, non eu ningochun nesosoran ewe fansoun ira ra uwa non 1820, anuon Joseph Smith, a kutta an epwe sinei menni mwichefen epwe fiti, a feino nein ekkewe ira an epwe iotek arap ngeni imwan we non enefenin New York, USA. A wor an kapaseis usun amanauen ngunun me a apinukunuku pwe Kot epwe emweni i.

Non tipetekison, aua pwari pwe ponuwen an iotek, Kot ewe Sam me Noun we, Jises Kraist, ra pwa ngeni Joseph me poputani ewe fansoun “mettoch meinisin repwe sofo sefan” ( nengeni Foffor 3:21) usun mi osini me non ewe Paipen. Non ei nemasepwi, a kaeo pwe mwirin manon ekkewe akaewin Aposel, An Kraist we Mwichefen non ewe Testamen Sofo a poutuno seni fonufan. Joseph epwe anganga pwe epwe niwinsefan.

Aua apungano pwe fan emwenien ewe Sam me ewe Nau, chon kuno seni nang ra feito ar repwe euroura Joseph me forsefani ewe Mwichefenin Jises Kraist. John ewe Sou Papatais mi manausefan a eniwinato ewe mumuta ne papatais ren mono fan konik ren omusomusen tipis. Unumon me nein ekkewe akkaewin engon me ruemon Aposel—Peter, James, me John—ra eniwinato ewe wisen aposel me kiien mumutan pristut. Ekkoch ra pwan feito, mi pachenong Elijah, ewe a eniwinato ewe mumuta ne achufengeni famini feinfeino non nefin esemuch mi nap seni mano.

Aua sopweno ne pwarata pwe Joseph Smith a angei ewe niffang me manamanen Kot an epwe chiakuni ew uruon nom: ewe Puken Mormon— Pwan ew Kapasen Pwarata usun Jises Kraist. Peichen ei puk mi pin mi pachenong eu uruo pwisin an Jises Kraist angang nein aramas non ewe Notoun Fonufan mwirin chok An Manausefanita. A aitikich usun popun manau me awewei ewe nongonong mi ennet an Kraist, ewe ionapen ena popun. Ren eu chiechien pukfel ngeni ewe Paipen, ewe Puken Mormon a pwarata pwe aramas meinisin ir at me nengin noun Samach mi tong won Nang, pwe mi wor An kokkot mi pin fan iten manauach, pwe Noun we, Jises Kraist, a kapas ikenai usun pwan non ekkewe ranin nom.

Aua pwarata pwe Ewe Mwichefenin Jises Kraist ren Aramas mi Pin non Fansoun Soponon, minne a fisita non April 6, 1830, ina An Kraist we Mwichefen non ewe Testamen Sofo mi niwinsefan. Ei Mwichefen mi nukuchar non unusochun manauen foun nongonongun we, Jises Kraist, me non An Achasefan esemuch me wesewesen Manausefan. Jises Kraist a pwan kori sefani Aposel me ngenir mumutan pristut. A etiwa kich meinisin pwe sipwe feito Ren me An Mwichefen, ach sipwe angei ewe Ngun mi Fel, ekkewe angangepinen amanau, me angei pwapwa esemuch.

Ruepuku ier ra fen no seni ena fansoun ei Niwinsefanito a poputa me ren Kot ewe Sam me Noun we Achengicheng, Jises Kraist. Chommong minion non unusen fonufan ra fen etiwa eu sinenapen ekkei mettoch mi osini.

Aua pwapwa ne affata pwe ewe Niwinsefanito mi pwon mi soposopono ren soposoponon pwarata. Ewe fonufan esap chiwen ususun we, pun Kot epwe soposopono ne “ochufengeni forian kewe meinisin … fan nemenien” Kraist ( nengeni Ephesus 1:10).

Ren mennin me kinisou, am Noun Aposel aua tingor meinisin repwe sinei—usun am mi sinei—pwe ekkewe nang mi suk. Aua apungano pwe Kot a affata An mochen fan iten Noun achengicheng at me nengin. Aua pwarata pwe ekkewe repwe iotek me kaeo porousen ewe Niwinsefanito me angang fiti nuku repwe feioch ne angei ar pwisin sinei usun auchean we me popun we an epwe ammonata ewe fonufan ren ewe Aruwen Wareto an ach ewe Samon me Chon Amanau, Jises Kraist.