Ũtũngĩo wa Wusũu wa Ũvoo Mũseo wa Yesũ Klĩsto

Kwa ũlũmu nĩtũũtavan’ya kana Ngai nĩwendete syana Syake mbaĩnĩ syonthe sya nthĩ. Ngai Asa nũtũnengete ũsyawa wa ũngai, thayũ ũte ngelekan’yo, na ũnene wa nthembo ya Mwana Wake Mwendwa, Yesũ Klĩsto.Kwa vinya wa Asa, Yesũ nĩwathayũũkie ĩngĩ na kwĩthĩwa na vinya ĩũlũ wa kĩkw’ũ. Nĩ Mũtangĩĩi waitũ, Ngelekan’yo yaitũ, na Mwovosya waitũ.

Myaka maana elĩ mĩvĩtu, kĩokonĩ kyanake kya ĩvinda ya mbua mwaka wa 1820, Joseph Smith e mũnini, aĩmantha kũmanya nĩ ĩkanisa yĩva ya kũlika, nĩwaendie kĩthekanĩ kũvoya vakuvĩ na mũsyĩ woo ũla waĩ ngalĩko ya ĩũlũ ya New York, nthĩnĩ wa Ngwatanĩo ya nthĩ sya Amelika. Aĩna makũlyo ĩũlũ wa ũtangĩĩo wa thayũ wake na ena mũĩkĩĩo kana Ngai nũkũmũtongoesya.

Kwa ũuu, nĩtũũweta kana nthĩnĩ wa ũsũngĩo wa mboya yake, Ngai Asa na Mwana Wake, Yesũ Klĩsto, nĩmamumĩlĩle Joseph na mambĩlĩlya “ũtũngĩo wa maũndũ onthe” (Meko 3:21) ota ũndũ kwaneenetwe Mbivilianĩ. Nthĩnĩ wa woni ũũ, nĩwamanyie kana kumana na kĩkw’ũ kya Atũmwa ma mbee, Ĩkanisa ya Klĩsto ya Ũtianĩo Mweũ nĩyaaie kũũ nthĩ. Joseph aendaa kwĩthĩwa e mũio nthĩnĩ wa kũyĩtũngĩa.

Twĩĩkĩĩthya kana ungu wa mwolooto wa Asa na Mwana, atũmwa ma ĩtunĩ nĩmookie kũmũmanyĩsya Joseph na kũũngamya Ĩkanisa ya Yesũ Klĩsto ĩngĩ. Yoana Mũvatisi e mũthayũũku nĩwatũngĩĩie ũtonyi wa kũvatisa kwa kũthikwa kĩw’ũnĩ kwondũ wa ũekeo wa naĩ. Atatũ ma ala Atũmwa ĩkũmi na elĩ ma mbee–Vetelo, Yakovo, na Yoana–nĩmatũngĩie ũtũme na mbungũo sya ũtonyi wa ũthembi. Angĩ nĩmookie, vamwe na Eliya, ũla watũngĩie ũtonyi wa kũkwatan’ya mĩsyĩ vamwe nthĩnĩ wa ngwatanĩo ya tene na tene ĩla ĩvĩtũkĩte kĩkw’ũ.

Ĩngĩ nĩtũũkũsĩĩa kana Joseph Smith nĩwanengiwe kĩnengo na vinya wa Ngai wa kũalyũla maandĩko ma tene: Ĩvuku ya Momoni–Ũkũsĩ Ũngĩ wa Yesũ Klĩsto. Mathangũ ma maandĩko aa matheu nĩvamwe na ũmanyĩsyo wa ũthũkũmi wa Yesũ Klĩsto mwene katĩ wa andũ ma nthĩ sya ũthũĩlonĩ wa syũa ĩvinda ĩkuvĩ ĩtina wa Kũthayũũka Kwake. Nĩmanyĩasya vata wa thayũ na nĩyĩmanyĩasya ũmanyĩsyo wa Klĩsto, ũla nĩw’o wa vata nthĩnĩ wa ũmanyĩsyo ũũ. Ta maandĩko matheu ngũsĩ ya Mbivilia, Ĩvuku ya Momoni nĩyĩkũsĩĩaa kana andũ onthe nĩ ana ma Asa wa Ĩtunĩ ũmendete, na kana Ethĩawa na walan’yo mũtheu kwondũ wa mathayũ maitũ, na kana Mwana Wake, Yesũ Klĩsto, nũneenaa ũmũnthĩ ota mĩthenya ya tene.

Nĩtũũweta kana Ĩkanisa ya Yesũ Klĩsto ya Atheu ma Mĩthenya ya Mũminũkĩlyo, nĩyambĩlĩlw’e matukũ 6, Mwei wa Kana 1830, nĩ Ĩkanisa ya Ũtianĩo Mweũ ya Klĩsto ĩtũngĩe. Ĩkanisa yĩĩ yakĩtwe thayũnĩ mũlũngalu wa ĩvia yayo ĩnene ya kĩkotonĩ,Yesũ Klĩsto, na ũnene wa Wĩw’anĩthyo Wake na ũw’o wa Ũthayũũkyo Wake. Yesũ Klĩsto ĩngĩ nĩwĩtĩte Atũmwa na nũmanengete ũtonyi wa ũthembi. Nũtũthoketye ithyonthe tũke Kwake na Ĩkanisanĩ Yake, kũkwata Veva Mũtheu, maũtw’ĩo ma ũtangĩĩo, na kũkwata ũtanu wa kwĩkala.

Myaka maana elĩ yu nĩmĩthelu kuma yĩla Ũtũngĩo wambĩlĩlw’e nĩ Ngai Asa na Mwana Wake Mwendwa, Yesũ Klĩsto. Mamilioni nthĩ yonthe nĩmetĩkĩlĩte ũmanyi wa maũndũ aa mathane.

Kwa ũtanu nĩtũũweta kana watho wa Ũtũngĩo nĩũendeee na mbee kwĩsĩla kũendeea kwa ũvuan’yo. Nthĩ ndikethĩwa ũu ĩngĩ, nũndũ Ngai “akatũngĩanĩa syĩndũ syonthe nthĩnĩ wa Klĩsto” (Aeveso 1:10).

Twĩna ũtaĩo na mũvea, ithyĩ ta Atũmwa Make twĩthokya kĩla ũmwe amanye–ta ũndũ twĩsĩ–kana matu yu nĩmavinguku. Nĩtũkũĩkĩĩthya kana Ngai nĩũendeee na kũmanyĩthya ana Make endwa wendi Wake. Nĩtũũkũsĩĩa kana ala kwĩsĩla mboyanĩ masomaa ũtũmane wa Ũtũngĩo na mayĩka ũu kwa mũĩkĩĩo makaathimwa kwa kũkwata ũkũsĩ woo ene wa ũtheu waw’o na vata waw’o kũmban’ya nthĩ kwa watho wa Kũka kwa Kelĩ kwa Mwĩaĩi na Mũtangĩĩi Waitũ, Yesũ Klĩsto.