Fohlohkihnyuckyak ke Fohnlah luhn Wosasuc luhn Jisus Kraist

Kuht ohi in fahkwack lah God El luhngse tuhlihk Nahtuhl ke muhtuhnfacl nuhkwewa fin facluh. God Pahpah El use nuh sesr isuslac wolacna, moul ma wacngihn ma oacna, ac kihsac in iwaclah ma wacngihn sahflahiyac luhn Wen Kuloh Nahtuhl, Jisus Kraist. Ke kuh luhn Pahpah, Jisus El sifilpac moulyak ac eis kuhtanglah liki misac. El pa Mwet Lahngo lasr, Mwet Etahwi lasr, ac Mwet in Molwelah lasr.

Yac lofoko somlah ah, ke sie litutacng kahto ke spring 1820, Joseph Smith fuhsr, el suk in etuh lah piyac kac alu elan welah uh, el som nuh insack ah in pruhe sisken lohm sel ah an nuh acir fin acn New York, USA. Oasr kihsensiyuck lal ke molwelah luhn nguhnal ac luhlahlfongi lah God El ac kohlohl.

Ke puhsisacl, kuht fahkwack lah in topuk pruhe se lal ah, God Pahpah ac Wen Nahtuh, Jisus Kraist, Elos sikyang nuh sel Joseph ac ahkfahsrye “aksasuyeyuk ma nukewa” (Orekma 3:21) oacna ke tuh palyeiyuck ke Bible ah. Ke aruhruhma se inge, el lotwelah lah tukun misac luhn Mwet Sap emet ah, Alu ke Wuhlweacng Sasuc luhn Kraist tuhlac liki facluh. Joseph el orekmakihnyuck ke fohlohkihnyuckme la an.

Kuht ahkkweye lah ye kohkoh luhn Pahpah ac Wen, mwet utuck pweng inkuhsrao elos tuhkuh in lotwel Joseph ac sifilpac akiyac Alu luhn Jisus Kraist. John Pacptais suc sifilpac moulyak el tuh fohlohkohnwack wal in pacptais ke tili otyak ke kof nuh ke iyucklac luhn ma koluk. Tolu sin Mwet Sap singucul luo emet ah—Peter, James, ac John—elos fohlohkohnwack kunohkohn luhn mwet sap ac ki ke wal luhn pristut. Mwet sahyac tuhkuh pac, weluhlwacng Elijah, suc tuh fohlohkohnwack kuh in kapsriyac sucu an nuh sie ne tok ma pahtpaht ke inmahsrlo ma wacngihn sahflahiyac ma som ahluhkwelah misac.

Kuht tahfwelah in ahklohye lah tuh ituckyang nuh sel Joseph Smith mwe sang ac kuh luhn God in luhngaslah sie ma sihmlac mahtuh: Puk luhn Mormon—Siepac Wuhlweacng ke Jisus Kraist. Sra puk ke ma sihmlac muhtahl se inge pa sie sramsram ke luti luhn Jisus Kraist inmahsrlon mwet ke Lacfahl Rohtoh tiac paht tukun El Sifilpac Moulyak ah. Ma inge luti ke srihpac luhn moul uh ac ahkuhtweyac mwe luti luhn Kraist, suc yohk srihpac nuh ke srihpac se ingacn. Oacna sie ma suhmuhslah ma weacng Bible, Puk luhn Mormon uh fahkwack lah mwet nuhkwewa pa wen ac acn nuhtin Pahpah Luhng Inkuhsrao, lah oasr plwacn muhtahl Lal nuh ke moul lasr uh, ac lah Wen Nahtuh, Jisus Kraist, El sramsram misenge oacna ke pacl mahtuh met ah.

Kuht fahkwack lah Alu luhn Jisus Kraist luhn Mwet Luhlahlfongi ke Lwen-sahflah, tuh akwucki ke Eprel 6, 1830, pa Alu ke Wuhlweacng Sasuc luhn Kraist ma sifilpac fohlohkihnyuckyak. Alu se inge kawuhki ke moul suwohswohs luhn eot in sruhwasrihk, Jisus Kraist, ac ke Iwaclah ma pahtpaht ac Sifilpac Moulyak na pwacye. Jisus Kraist El sifilpac pahngon Mwet Sap ac sang nuh selos wal luhn pristut. El suli kuht nohfohn in tuhkuh nuh Yohrohl ac Alu Lal, in eis Nguhn Muhtahl, akwuck luhn molwelah, ac in eis engan ma wacngihn sahflahiyac.

Yac lofoko somlah inge ke Fohlohkihnyuckyak se ma tuh ahkfahsryeyuck sin God Pahpah ac Wen Kuloh Nahtuhl, Jisus Kraist. Million mwet fin facluh elos eis etwacack ke pacl palyeiyuck inge.

Kuht engan in sulkackihn lah Fohlohkihnyuckyak ma tuh uliyuck ah ahkwot na nuh met ke fahfahlacna luhn fwackyuck. Facluh ac fah tiac sifilpac oacna met ah, ke God El ac fah “eisani ma orekla nukewa nu sie … ke … Christ” (Ephesus 1:10).

Ke suhnak ac srui, kuht suc ekihn Mwet Sap Lal suli mwet nuhkwewa in etuh—oacna kuht etuh—lah inkuhsrao ikacklah. Kuht ahkpwacyeye lah God El oruh in etweyuck luhngse Lal nuh sin wen ac acn kuloh Nahtuhl. Kuht fahkwack lah elos suc pruhe lutlut ke pweng ke Fohlohkihnyuckyak ac mukwikwi ke luhlahlfongi ac fah ahkinsewowoyeyuck in eis mwe loh lalos sifacna ke muhtahliyac ac ke srihpac la in ahkolah facluh nuh ke uliyuck luhn Tuhkuh Ahkluo luhn Leum ac Mwet Lahngo lasr, Jisus Kraist.