Ayaw Biyai ang Manluluwas
Ni Elder Kevin W. Pearson
Sa Seventy
Gikan sa usa ka debosyonal nga pakigpulong, “The Lens of Truth [Ang Panglantaw sa Kamatuoran],” nga gihatag didto sa Brigham Young University–Idaho, niadtong Marso 7, 2017.
Nagpuyo kita sa usa ka gubot nga panahon. Pero ang pangutana dili kon sa unsang paagi nga ang Simbahan makalahutay; hinoon, kon unsaon ninyo ug nako nga makalahutay?
Mga paghulagway pinaagi ni J. Beth Jepson
Pipila ka tuig na ang milabay, nakighimamat ko og higala alang sa paniudto. Wala namo makita ang usag usa sulod sa daghang katuigan. Panahon sa akong high school ug unang mga adlaw sa kolehiyo, usa siya sa akong pinakasuod nga higala. Usa siya sa pinakalig-on ug pinakamasaligon nga batan-ong lalaki nga akong nailhan.
Dungan mi nga mitambong og seminary, dungan nga nagdula og sports, dungan nga mieskwela sa unibersidad, dungan nga nangandam alang sa misyon, ug mibiya alang sa misyon pipila ka bulan lang ang gintang. Human sa among misyon, naminyo siya og puno sa talento ug talagsaong babaye gikan sa akong stake.
Sa paglabay sa katuigan, lain-lain na ang dagan sa among kinabuhi. Namalhin mi sa lain-laing mga siyudad ug sa katapusan wala nay balita sa usag usa. Nahinumdom pa gihapon ko kon unsa ang akong pagkakurat nga madungog nga siya ug ang iyang asawa mibiya sa Simbahan. Sa tanan niadtong akong nailhan sa akong pagkabatan-on, siya ang katapusan nga akong mahunahunaan nga mobiya sa Simbahan.
Atol sa paniudto among gihinumduman ang panaghigalaay nga importante kaayo namong duha. Nagkinataw-anay mi sa pipila ka kasinatan sa kayabag sa batan-on pa mi. Naghisgot mi mahitungod sa among mga pamilya ug misulay sa pagpaambit sa usag usa kon unsay nahitabo sa among kinabuhi.
Sa katapusan, nangutana ko sa klaro nga pangutana: “Tim, unsa may nahitabo? Grabe kaayo ang imong pagkakabig ug pagsalig! Nganong mibiya man ka sa Simbahan? Unsay nakaingon nga wala na man nimo tumana ang imong mga pakigsaad sa templo? Gibiyaan ba usab nimo ang Manluluwas? Misaad kita sa usag usa nga magmatinuoron ug magmatinud-anon kita hangtud sa katapusan sa atong kinabuhi!”
“Kevin,” mitubag siya, “Lahi na karon ang akong tan-aw sa mga butang. Ang akong panglantaw bahin sa Simbahan ug sa mga pagtulun-an niini nausab. Wala ko masuko sa Simbahan—wala na lang ko magkinahanglan niini.”
Sa pagtapos namo sa among panag-istoryahanay, gipahayag nako ang akong gugma ug pasalamat alang sa panaghigalaay nga gihatagan gihapon nako og bili. Dayon, uban sa lawom nga pagbati, akong gipahayag ang akong pagpamatuod: “Tim, nasayud ko nga kining mga butanga tinuod. Ug nasayud ka usab nga tinuod kini. Kanunay kang nasayud niini. Nawala lang nimo ang kaklaro nga diha nimo kaniadto. Apan maangkon nimo og usab ang kahayag ug panabut bahin sa Espiritu Santo nga diha nimo kaniadto. Palihug balik.”
Nagginaksanay mi samtang nanamilit, ug mihunghong siya, “Nakadayeg ko sa imong kombiksyon ug tinguha. Pero nganong sigurado man kaayo ka?”
Sa akong paglakaw palayo, namalandong ko og maayo sa mga pagpili nga among gihimo ug sa epekto niini sa among kinabuhi ug sa kinabuhi sa among mga anak ug mga apo.
Akong minahal nga batan-ong mga higala, palihug ayaw tuguti ang nahitabo sa akong higala nga si Tim nga mahitabo kaninyo. Ingon ba kamo ka lig-on, ka dili matarug, ug nakabig sama sa inyong nahunahunaan sa inyong kaugalingon? Kon makasugat kamo sa dili malikayan ug gikinahanglang mga hagit sa kinabuhi, asa man kamo modangup alang sa kalinaw ug panabut? Kon ang inyong kinabuhi nagmagul-anon, mag-ampo ba gihapon kamo sama sa naandan ug magpadayon?1
Samtang ang mga pagtamay bahin sa Simbahan, sa kasaysayan niini, sa mga lider niini, ug sa mga pagtulun-an niini magkakusog, asa man mo mobarug? Samtang ang mga gituohan ug mga gipangbuhat sa nagkaanam kadautan nga kalibutan mosukwahi sa mga baruganan sa gipahiuli nga ebanghelyo, unsa may inyong buhaton?
“Buot Ba Usab Kamong Mobiya Kanako?”
Ang pipila sa labing epektibo nga mga hinagiban ni Satanas mao ang paglibog, paglingla, ug pagpaminus sa pagkasensitibo ngadto sa espiritwal nga butang. Ang matag usa mopaminus sa pagtuo, moali sa panabut, ug motuis sa panglantaw. Dungan kining maglangkob sa dakong hagit sa atong panahon. Gamiton kini ni Satanas dili lamang sa pagpaminus kang Joseph Smith, sa Basahon ni Mormon, sa doktrina sa Simbahan, ug sa mga lider sa Simbahan kondili sa pag-ataki usab sa Manluluwas ug sa plano sa Amahan. Nahitabo kini sukad pa sa una.
Kon ang dili malikayan nga kapintas sa mga tintasyon ug kalisdanan magkaduol sa Kategoriya 5 nga mga kahimtang sa espiritwal nga mga unos, mosalig pa ba gihapon mo sa Dios ug maghupot sa kamatuoran? Ang makapahinuklog nga pangutana sa Manluluwas ngadto sa Napulog Duha magamit gihapon karon:
“Buot ba usab kamong mobiya kanako?
“Si Simon Pedro mitubag kaniya, Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon.
“Ug kami nagatuo ug among nasinati nga ikaw mao kanang Kristo, ang Anak sa buhi nga Dios” (Juan 6:67–69).
Nahinumdom ko bahin sa mahinungdanong pamahayag ni Presidente Heber C. Kimball (1801–68), Unang Magtatambag sa Unang Kapangulohan. Ang mga Santos luwas nga miabut didto sa Salt Lake Valley ug medyo nalipay sa ilang kaugalingon. Kay nakabuntog ug nakalahutay og labihan ka daghan, medyo nagmapasigarbuhon sila ug nasobrahan sa pagsalig sa kaugalingon. Si Presidente Kimball namahayag:
“Sultihan ko kamo, nga daghan kaninyo ang makakita sa panahon nga makaangkon kamo sa tanang kalisud, pagsulay ug pagpanggukod nga inyong mabuntog, ug daghang oportunidad nga mapakita nga matinuoron kamo sa Dios ug sa iyang buhat. … Sa pagsagubang sa mga kalisdanan nga nagsingabut, gikinahanglan alang kaninyo nga makaangkon og kahibalo sa kamatuoran niini nga buhat alang sa inyong kaugalingon. … Kon wala pa ninyo maangkon ang pagpamatuod, pagpakabuhi nga matarung ug tawaga ang Ginoo ug ayaw og hunong hangtud nga maangkon ninyo kini. Kon dili ninyo kini buhaton dili kamo makasugakod.
“… Moabut ang panahon diin wala nay lalaki o babaye ang makahimo sa paglahutay sa hinulaman nga kahayag. Ang matag usa kinahanglan nga magiyahan pinaagi sa kahayag nga anaa sulod sa iyang kaugalingon. Kon wala kamo niini, unsaon man ninyo sa pagsugakod?”2
Nagpuyo kita sa usa ka gubot nga panahon. Pero ang pangutana dili kon sa unsang paagi nga ang Simbahan makalahutay; hinoon, kon unsaon ninyo ug nako nga makalahutay? “Ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo.”3 Kon kamo ug ako mouswag ba uban niini mao lamang ang wala mahibaloi.
Unsaon Paglahutay sa Espirituhanong Paagi
Mosugyot ko og unom ka mahinungdanong mga butang nga kinahanglang buhaton sa matag usa kanato aron makalahutay sa espirituhanong paagi.
1. Higugmaa ug sunda og una ang Dios. Ang paghigugma ug pagsunod sa Dios gikinahanglang mag-una sa paghigugma ug pagserbisyo sa uban. Ang pagkasunod-sunod importante. Si Nephi nagtudlo, “Kay ang Ginoong Dios naghatag og kahayag ngadto sa salabutan; kay siya namulong ngadto sa mga tawo sumala sa ilang pinulongan, ngadto sa ilang pagsabut” (2 Nephi 31:3). Ang Langitnong Amahan nahigugma kanato ug kanunayng andam nga mohatag kanato og panabut. Hinoon, kinahanglan gayud nato, nga unahon Siya diha sa atong kinabuhi.
2. Paghimo og personal nga pag-ampo. Ang pag-ampo gikinahanglan. Si Propeta Joseph Smith nagtudlo, “Ang labing maayong paagi nga maangkon ang kamatuoran ug kaalam dili ang pagpangita niini gikan sa mga libro [maapil unta niya ang “mga blog”], apan sa pagdangup ngadto sa Dios pinaagi sa pag-ampo, ug makaangkon og balaan nga panudlo.”4 Dili gayud maingon nga dili kamo takus nga mag-ampo! Kon ganahan mo og dugang nga mga tubag, pangutana og daghan. Kanunayng magtinguha ug mag-ampo alang sa impluwensiya sa Espiritu Santo (tan-awa sa Moroni 10:5). Mao kini ang kahayag nga gipadala sa Amahan nga makahatag og panabut.
3. “Pangita og kasayuran gani pinaagi sa pagtuon ug usab pinaagi sa hugot nga pagtuo” (D&P 109:7). Ang pagkat-on usa ka balaan nga katungdanan. Ang mga tinugyanan magtinguha nga makakat-on; ang mga butang maghulat nga gamiton. Ang bantugang mga lider mao ang bantugang mga tigkat-on. Ang Simbahan nagkinahanglan og bantugang mga lider—kababayen-an ug kalalakin-an nga nagtinguha og kahibalo, mas lawom nga panabut ug pagkakabig (tan-awa sa D&P 93:36). Nagkinahanglan kini og pasalig ug pagpahinungod. Dili kamo makakita og lawom nga mga kamatuoran pinaagi sa pagtan-aw sa wiki o pinaagi sa pagsiksik sa mga blog. Hinumdumi, ang pagtuo mapalig-on pinaagi sa pagpaminaw sa pagpamatuod niadtong dunay pagtuo, dili pinaagi sa pagpaminaw sa mga pagduha-duha niadtong nawad-an niini.
4. Siksika ang mga kasulatan, ilabi na ang Basahon ni Mormon—kada adlaw! Ang Basahon ni Mormon piho nga gisulat aron sa pagpanalipod ug sa pagpreserbar kanato samtang manglimbasug kita sa mga kahimtang sa atong panahon. Kalabut niini nga gahum, mipamatuod si Nephi bahin sa gunitanan nga puthaw, “Ug ako miingon ngadto kanila nga mao kadto ang pulong sa Dios; ug si kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga mga panâ sa kaaway makabuntog kanila ngadto sa pagkabuta, sa pagdala kanila sa kalaglagan” (1 Nephi 15:24). Kon mosugod kamo sa pagbati nga naglibug ug nawala, sugdi pagbalik sa unang pahina, ug isubsob ang inyong kaugalingon diha sa Basahon ni Mormon.
5. Pag-focus sa kinatibuk-ang panglantaw. Kabahin kamo sa dakong kalihokan dinhi sa yuta: ang pagpundok sa Israel ug pagpangandam alang sa Ikaduhang Pag-anhi ni Jesukristo. Ikaw dunay importante nga bahin nga pagabuhaton! Mianhi kamo sa yuta nga mapasaligon nga mahimong maisugon diha sa inyong pagpamatuod bahin sa Manluluwas. Mao kana ang inyong balaang pagkatawo. Pag-focus sa kinatibuk-ang panglantaw: Ang plano sa atong Langitnong Amahan sa kalipay. Kini ang panglantaw sa kamatuoran. Kini ang konteksto alang sa tanang pangutana, mga isyu, ug mga problema. “Kay ang Espiritu namulong sa kamatuoran ug dili mamakak. Busa, kini namulong sa mga butang ingon nga sila gayud mao, ug sa mga butang ingon nga sila gayud mahimo unya” (Jacob 4:13).
6. Labaw sa tanan, pagsalig diha ni Jesukristo. Siya gihapon “mao ang kahayag, ug ang kinabuhi sa kalibutan” (3 Nephi 11:11; tan-awa usab sa Juan 8:12). Kon mapalibutan ug mabug-atan kamo sa pagduha-duha, kalisdanan, ug tintasyon, salig Kaniya. Kon ang kinabuhi dili mao kon unsay inyong gilauman ug kadtong inyong gisaligan makapasagmuyo ug moluib kaninyo, padayon sa pagsalig sa hingpit diha Kaniya. Hinaut nga motubag kamo sama ni Nephi sa karaan sa sama kalisud nga panahon: “Bisan pa niana, ako nasayud kang kinsa ako mosalig. … O Ginoo, ako misalig kanimo, ug ako mosalig kanimo sa kahangturan” (2 Nephi 4:19, 34).
Bisan unsa pay inyong buhaton, ayaw biyai ang Manluluwas! Tungod sa Iyang Pag-ula, kita mga tinugyanan, gawasnon nga molihok ug dili pagaaghaton. Matag usa kanato mobarug sa atubangan sa Labawng Makagagahum nga Dios ug mohatag og subay sa kahayag ug kamatuoran nga atong gipili.
Mosaad ko kaninyo nga kon mosunod kamo niining mga baruganan ug magpabilin sa kamatuoran, ang inyong pagtuo dili gayud mapakyas. Hinaut nga ang Dios mopanalangin kaninyo kanunay sa pagpili nga motan-aw pinaagi sa panglantaw sa kamatuoran pinaagi sa gahum sa Espiritu Santo.