Ang Imong Bili Dili Kondisyonal
Bisan unsa pay isulti sa kalibutan, ang Langitnong Amahan nakahibalo sa imong tinuod nga bili.
Kita mahangturong mga binuhat nga dunay langitnong ginikanan. Apan kanunay kitang giataki sa kalibutanong mga impluwensya nga makapahikalimot nato kinsa kita. Unsaon nato sa pagkahibalo unsa ang atong tinuod nga bili? Ania ang pipila ka punto nga hinumduman.
-
Ang imong bili dili matino sa mga impluwensya sa gawas.
Bisan kon puol nang paminawon, kinsa ka sa sulod mao gayud ang labing importante. Si Satanas gusto nga ikaw motuo nga ang imong bili gikan sa mga butang sa gawas sama sa pisikal nga lawas, salabutan, mga talento, kahimsog, kalampusan, ug pagkainila. Apan “ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing” (1 Samuel 16:7). Ang Langitnong Amahan nakahibalo sa imong tinuod nga bili tungod kay nakasabut Siya sa imong mga tinguha ug mga kinaiya sa imong espiritu.
-
Ang imong lawas maanindot—bisan og kini wala mahisubay sa mga sumbanan sa kalibutan.
Hagit sa kadaghanan kanato nga mobati og nindot sa atong panagway. Apan salig nga ang imong lawas maanindot, bisan unsa pay hitsura niini. Lalaki o babaye, kamo gibuhat subay sa dagway sa Dios (tan-awa sa Genesis 1:27). Ang Langitnong Amahan usa ka bantugan nga Artist sa kalibutan—ug kamo mao ang iyang labing nindot nga buhat sa art! Ang imong lawas usa ka milagro—malumo ug kusgan ug madanihon ug hamili sa samang higayon. Adunay daghan nga makapahimuot sa porma ug sa mahimo niini kon ikaw makat-on sa pagtan-aw nga kini usa ka talagsaong gasa.
-
Kon ikaw mosunod sa Manluluwas, ang kaanindot sa imong espiritu modan-ag.
Si Jesukristo Mismo “walay katahum” diha sa mga mata sa mga tawo (tan-awa sa Isaias 53:2). Apan sa unsang paagi nga ang Manluluwas dili matahum? Ang Iyang katahum nagagikan sa Iyang kaayo ug kaputli. Ug mao usab ang inyoha! Ang tinuod nga mga disipulo ni Kristo adunay kamadanihon nga walay labut sa ilang panagway. Sa dihang kamo “[m]akadawat [ba] sa iyang hitsura diha sa inyong mga panagway” (Alma 5:14), kamo magdala sa kahayag nga modan-ag gikan sa sulod ngadto sa gawas. Ug kon ang uban makakita sa inyong kahayag, mas madanihon kamo ngadto kanila. Labaw sa tanan, ang paglakaw nga matarung sa atubangan sa Dios makahatag kaninyo og dakong pagsalig.
-
Ikaw adunay mahangturong bili sa imong pagka-ikaw.
Si Korihor ang anti-Kristo mitudlo nga “ang matag tawo makasinati niini nga kinabuhi sumala sa panglihok sa tawo” (Alma 30:17). Sa laing mga pulong, ang paagi sa imong pagdumala sa imong kaugalingon nagtino sa imong bili—butang kini nga kinahanglan nga imong maangkon o maprobahan. Apan kana dili tinuod! Bisan og kita kinahanglan kanunay maningkamot sa pagpalambo sa atong kaugalingon, “ang bili sa mga kalag mahinungdanon sa panan-aw sa Dios” (D&P 18:10) bisan unsa pa. Bisan kon ikaw makahimo og mga sayop, ang imong bili wala mokunhod. Sama sa gitudlo ni Sister Joy D. Jones, Kinatibuk-ang Presidente sa Primary, “ Kon makasala ta, dili kaayo ta takus, apan dili gyud nga wala na tay bili!” (“Bili nga dili Masukod,” Liahona, Nob. 2017, 14).
Bisan og sa kagaran wala nimo kini kahatagi og pagtagad, ikaw adunay hiyas sa pagkabalaan. Anaa kini bisan og ikaw mobati nga dili takus. Ug ang Dios makakita niini—kanunay. Kon imong amumahan kana nga hiyas, Siya makahimo pa og mas daghan kanimo kay sa imong gituohan nga posible.