“Suia Lo’u Auala ia Maua se Molimau,” Liahona, Iulai 2023.
Autalavou Matutua
Suia Lo’u Auala ia Maua se Molimau
Mo le taimi muamua sa i ai sa’u fatu faigofie o le faatuatua e moni.
Sa ou ola ae i le Ekalesia—sa ou alu i gaoioiga, ma sa ou auai i tatalo faaleaiga ma le suesueina o tusitusiga paia. Ae e lei i ai lava sa’u molimau. Ou te lei iloa pe ou te talitonu i le Atua po o Lona Alo. Sa ou le iloa pe moni le Tusi a Mamona.
Sa ou manao i se molimau, ae sa ou lagona le le fiafia ina ua uma ona ou tatalo i le tele o taimi e aunoa ma se lagona e pei na ou mauaina se tali. Sa amata ona ou mafaufau, “Afai e moni le Atua, aisea o le a Ia le faaali mai ai ia te au? Aisea na Ia faatagaina ai a’u ou te saofai iinei ma mafaufau?”
O le toe tepa i tua, e mafai ona ou vaai manino ai pe aisea na ou le maua ai se tali: Sa ou lei faia moni lava se taumafaiga. Ou te faitauina a’u tusitusiga paia mo le lima minute e faatasi i le vaiaso ma faamoemoe mo ni aafiaga faafaaaliga ona sa ou fesili i ai.
Ou te lei malamalama o le faatuatua o se mataupu faavae o le faatinoga.
O Se Fatu o le Faatuatua
O soo se tasi e tilotilo mai fafo o le a valaauina au e “toaga” i le Ekalesia, ae ou te lei iloa lava pe moni le Ekalesia. Ae sa ou fia iloa.
O lea sa ou filifili ai e auauna atu i se misiona. Sa ou manatu sese o le avea ai ma se faifeautalai, o le a otometi lava ona ou maua tali mai le Atua. Ou te lei tuuina lava se taumafaiga tele i le tatalo po o le suesue, ae e lei umi ae i ai sou tofiga.
I le amataga o la’u misiona, sa ou tauivi ai ina ia lagona le Agaga a o aoaoina faamasani i luga o le initoneti i le taimi o le faama’i oti pipisi ona o la’u taumafaiga faaafaafa loto. Ona ou oo atu ai lea i le nofoaga autu e aoao ai faifeautalai. Ma o lo’u taimi iina sa i ai se aafiaga sili ona faaleagaga o lo’u olaga. O le taimi muamua lea sa i ai ia te a’u se fatu faigofie o le faatuatua ua moni.
Faia o se Suiga
Na iu lava ina faigata le ulufale atu i le misiona. Sa ou lagona le pei o le molimau laitiiti na ou maua ua leiloa.
I se tasi aso sa ou tagi ai, ona oso mai lea o se manatuaga i lo’u mafaufau. Sa masani ona fesili mai lo’u tama ia te a’u pe na a mai lo’u aso i le aoga, ma ou te fai atu lava i taimi uma e le manaia. Ma e na te faapea mai, “Ia, ona e te faia ia lē manaia. Afai e te manao i le aoga ia fiafia, faia ia fiafia.” Sa ou iloaina e ono mafai ona ou faia ia aoga le tele o lo’u taimi i la’u misiona e ala i le aoaoina ma le tuputupu ae po le faia ia ou faanoanoa.
O lea sa ou tatalo ai ma le faamaoni sili atu nai lo se isi lava taimi e ta’u atu i le Tama Faalelagi o le a ou taumafai ma suia o’u uiga faaalia. Ina ua mavae lena, sa uunaia au e tuu i ai se taumafaiga fou. Sa amata ona ou suesue moni ma tatalo ma mafaufau loloto, ma i le aluga o taimi na toe foi mai ai sea molimau itiiti—ma faaauau pea ona tuputupu ae. Sa faaitiitia lou le fiafia, ma sa amata ona ou maua le olioli i le talalelei.
O Le Mea Tatou Te Tuuina Atu o Le Mea Tatou te Maua
Pe a e le fiafia i lagona e pei e le o tuputupu ae lou faatuatua, atonu e te mafaufau pe o i ai le Atua iina ma pe popole mai o Ia. Ae ua ou aoaoina o loo faatasi pea o Ia ma i tatou ma o le a fesoasoani ia i tatou e faamalosia lo tatou faatuatua ma le molimau pe afai tatou te tauaveina le tiutetauave ma tuu i ai taumafaiga (tagai i le Moronae 10:4).
Na saunoa mai Elder Robert D. Hales (1932–2017) o le Korama a Aposetolo e Toasefululua, “E ui e foliga mai e leai se mamanu tonu e maua ai e i tatou taitoatasi se molimau, ae e foliga mai e i ai se mamanu e iloatino ai.”1 O lena mamanu e aofia ai le i ai o se manao faamaoni ia iloa le upumoni, tatalo, naunau e auauna atu i le mea ua valaauina ai i tatou, taumafai ia usiusitai, suesue i tusitusiga paia ma faaaoga i o tatou olaga, ma le i ai o se uiga faaalia o le lotomaualalo.
O le a ou le faamalosia lava lo’u faatuatua e aunoa ma le suia o o’u uiga faaalia, mulimuli i lenei mamanu, ma tuu atu lo’u loto atoa e fesootai ma le Tama Faalelagi ma Iesu Keriso. Ina ua ou faia na suiga, sa amata ona ou maua tali ma talitonu i upumoni.
Na saunoa talu ai nei Sister Rebecca L. Craven, Fesoasoani Lua i le Au Peresitene Aoao o Tamaitai Talavou: “O le avea ai ma soo o Iesu Keriso e aofia ai le tele o isi mea nai lo le na ona le faamoemoe po o le talitonu. … E moomia ai lo tatou faia o se mea.”2 Ua ou aoaoina mo au lava ia e moni lenei mea: o le mea ou te tuuina i totonu o le talalelei o le mea lea ou te maua mai ai.
Mo tagata e matamata i ai, o le maualuga o lo’u toaga i le Ekalesia atonu e foliga tutusa lava e pei ona i ai i taimi uma. Ae ua ou suia la’u tautinoga i le talalelei i lo’u loto. O le ala lena na i ai le eseesega.
E alala le tusitala i Uosigitone, ISA.