Digital Lamang
Kahupay sa Pagpakigkauban sa Dios
Gikan sa “Our Covenant Relationship with God: A Wellspring of Relief [Atong Relasyon sa Pakigsaad sa Dios: Usa ka Tinubdan sa Kahupay],” nga gihatag ngadto sa mga estudyante sa Brigham Young University sa Provo, Utah, USA, niadtong Oktubre 24, 2023.
Matag usa kaninyo adunay kahigayon nga makigkauban sa inyong Langitnong Amahan ug sa Manluluwas diha sa halawom ug gamhanan nga mga paagi pinaagi sa inyong relasyon sa pakigsaad.
Adunay kahupay sa pagpakigkauban sa Dios. Wala kita mag-inusara.
Matag usa kaninyo adunay kahigayon nga makigkauban sa inyong Langitnong Amahan ug sa Manluluwas diha sa halawom ug gamhanan nga mga paagi pinaagi sa inyong relasyon sa pakigsaad. Adunay hilabihang kahupay sa pagkahibalo nga kamo wala gayod mag-inusara sa inyong mga kasubo, sa inyong mga hagit, sa inyong mga desisyon, sa inyong mga kawalay kasegurohan, o sa inyong mga kahuyang. Ang Dios, ang Amahan sa atong mga espiritu, nahigugma kaninyo. Ug pinaagi sa Iyang Hinigugmang Anak, si Jesukristo, ug sa Iyang maulaong sakripisyo, ang tanang panalangin nga gitinguha sa Amahan alang kaninyo anaa niini nga relasyon sa pakigsaad.
Kon atong madawat ang mga ordinansa ug mga pakigsaad sa bunyag ug kompirmasyon ug diha sa Iyang balaan nga balay, kita wala pa mahuman sa pagkat-on mahitungod sa mga pakigsaad ug sa gahom sa pagkapari. Kita wala pa mahuman sa pagkat-on mahitungod sa Ginoo ug sa Iyang mga paagi. Kita wala pa mahuman sa pagkat-on mahitungod kon kinsa gayod kita.
Ang pagdawat sa mga ordinansa ug mga pakigsaad sa ebanghelyo sa Manluluwas mao lang ang sinugdanan. Kini dili usa ka aytem sa transaksyon diha sa usa ka tsekanan nga listahan apan ang sinugdanan sa usa ka matahom nga bugkos sa pakigsaad. Si Presidente Russell M. Nelson mitudlo, “Ang dalan sa pakigsaad mahitungod gayod sa atong relasyon uban sa Dios.” Paminawa ang mga pulong sa propeta samtang iyang gihulagway kini nga relasyon sa pakigsaad ug kon sa unsang paagi ang Dios nagtinguha sa pagpanalangin kaninyo:
“Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. Diha sa Hebreo nga pinulongan, kana nga masaaron nga gugma gitawag og hesed (חֶסֶד). …
“Tungod kay ang Dios adunay hesed alang niadtong nagbaton og pakigsaad uban Kaniya, Siya mohigugma kanila. Siya mopadayon sa pakigtambayayong kanila ug motanyag kanila og mga oportunidad sa pag-usab. Siya mopasaylo kanila kon sila maghinulsol. Ug kon mahisalaag man sila, Siya motabang kanila nga makatultol og balik ngadto Kaniya.
“Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maloloy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato.”
Mabati ba ninyo ang gugma sa Dios alang kaninyo niini nga mga pulong? Isip usa ka sister nga wala pa maminyo, kining mahigugmaon ug maluluy-on nga relasyon sa pakigsaad ngadto sa akong Amahan sa Langit ug sa Manluluwas adunay gamhanan nga dapit sa akong kinabuhi ug nagpabilin sukad pa sa una nga mao ang akong labing dako nga tinubdan sa kahupay ug kalinaw. Kini nagdala kanako og dili matukib nga kahupay, balaan nga kalipay, ug usa ka halawom, malahutayon nga kasegurohan nga ako gihigugma isip Iyang anak nga babaye ug nga ako nahisakop sa Iyang mahangtoron nga pamilya. Ako nasayod nga Siya nakaila kanako ug hingpit nga nakasabot kanako.
Bisan unsa pa ang kahimtang sa atong kaminyoon o kaagi, ang Ginoo nagtinguha nga makigkauban kita Kaniya sa gamhanan nga paagi—aron “magkahiusa” (3 Nephi 19:23) ngadto Kaniya sa “tanan [nato] nga buhaton” (Alma 37:37). Wala nato kinahanglana nga mosagubang niining kinabuhia nga nag-inusara, ug wala kini gilaoman nga maoy mahitabo kanato. Makapili kita sa pagkaplag og kahupayan sa pagpakigkauban sa Ginoo pinaagi sa atong mga pakigsaad.
Sa Abril 2023 nga kinatibuk-ang komperensiya, si Presidente Camille Johnson miingon: “Mga kaigsoonan, dili ko kini mahimo nga mag-inusara, ug wala kinahanglana nga mag-inusara ko, ug dili gayod ako. Ang pagpili nga mabugkos ngadto sa akong Manluluwas, si Jesukristo, pinaagi sa mga pakigsaad nga akong gihimo uban sa Dios, ‘May kalig-on ako sa pagsagubang sa tanan tungod sa gahom nga gihatag kanako ni Kristo’ [Mga Taga-Filipos 4:13].”
“Si Jesukristo mao ang sentro sa [atong mga] pakigsaad.” Pinaagi lamang Kaniya ug sa Iyang sakripisyo nga kita makahimo og mga pakigsaad ngadto sa Dios. Ang tanan nga mga butang nahimong posible sa dihang ang Manluluwas nakabuntog sa imposible. Siya “usa ka Dios sa mga milagro,” usa ka Dios sa gugma (Mormon 9:11; tan-awa usab sa mga bersikulo 11–21). Ug ang akong gugma magpadayon sa paglambo alang Kaniya sa matag adlaw.
Kon mabati nato ang Iyang gugma ug baslan kana nga gugma pinaagi sa pagpili Kaniya sa matag adlaw, ang ebanghelyo mahimong dili kaayo mahitungod sa mga tsekanan nga kahon ug mas mahitungod na sa gugma ug tinguha. Kini magtugot og tinuod nga mga gamot sa ebanghelyo nga motubo sa matag usa kanato, magdala kanato og malungtaron nga pagpabaskog ug hingpit nga kalipay. Kining “masaaron nga gugma” motabang kanato nga molahutay kon ang katungdanan o tsekanan nga mga lista dili paigo.
Ang tanan nga mga panalangin sa maluluy-on nga Pag-ula ni Jesukristo gisaad pinaagi sa inyong relasyon sa pakigsaad sa Dios. Tugoti Siya sa Iyang mga tinguha sa pagpanalangin kaninyo! Pagpundar diha niana nga relasyon, paningkamot sa pagtuman sa inyong mga pakigsaad, paninguha sa paghinulsol kanunay, paggahin og panahon sa Ginoo, pagkat-on Kaniya, higugmaa Siya sa inyong tibuok nga kasingkasing. Wala nay laing mas dako nga tinguha ug walay laing mas makatagbaw o makahuloganon kaysa “moila kanimo nga mao ang bugtong matuod nga Dios ug kang Jesukristo nga imong gipadala” (Juan 17:3).