Digital Lamang
3 Ka Baroganan alang sa Pagpalig-on sa Panaghiusa sa Inyong Ward o Branch
Ang Manluluwas nagsugo kanato sa pagpakighiusa sa usag usa, apan unsa may dagway niana kon buhaton?
Natan-aw ba nimo ang palibot sa imong ward o branch ug nakabantay og nagkadaiyang mga talento, kaagi, ug mga interes? Si Elder D. Todd Christofferson sa Korum sa Napulog Duha ka Apostoles mipasabot nga ang mga kongregasyon diha sa Ang Simbahan ni Jesukristo sa mga Santos sa Ulahing mga Adlaw lahi base sa hiyograpiya. Miingon siya: “Kita dili mopili og kongregasyon base kon kinsa ang atong ganahan o gustong ikauban. Ang mga ward gipili alang kanato … , ug kita magkat-on sa pagkauban, pagserbisyo, ug paghigugma sa mga tawo nga tingali lahi gayod og kaagi, mga ganahan, ug mga opinyon.” Kini nga mga kalahian kasagaran makapahimo kanato nga mas lig-on.
Ang Manluluwas nagsugo kanato sa “paghiusa” (Doktrina ug mga Pakigsaad 38:27), bisan paman sa tanan natong mga kalahian. Busa unsa may dagway sa “paghiusa” diha sa atong mga ward ug mga branch? Adunay tulo ka mga baroganan aron makatabang kanato ngadto sa pagbuhat sa mas dakong panaghiusa.
Mahimong Usa uban ni Kristo pinaagi sa mga Pakigsaad
Human ang nabanhaw nga Manluluwas mipakita ngadto sa mga Nephita, sila nabuhi sa kalinaw ug panag-uyon sulod sa 200 ka tuig. Ug walay krimen, ang katawhan naghimo og mga milagro, ug “wala nay mas malipayon pa nga katawhan” (4 Nephi 1:16). Sa unsang paagi makab-ot ni bisan kinsa ang usa ka katilingbanon nga panag-uyon? Ang mga kasulatan nag-ingon nga “walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan” (4 Nephi 1:15).
Kon kamo nanglimbasog alang sa dugang nga panaghiusa uban niadtong anaa sa inyong palibot, usa ka talagsaong dapit aron makasugod mao ang pinaagi sa pagtimbang-timbang sa inyong relasyon sa Dios. Si Elder Quentin L. Cook sa Korum sa Napulog Duha ka Apostoles mitambag: “Nagkahiusa kita pinaagi sa atong gugma ug pagtuo kang Jesukristo ug isip mga anak sa mahigugmaong Langitnong Amahan. Ang sukaranang kinaiya sa tinuod nga pagkasakop mao ang pagkausa ngadto ni Kristo.”
Unsaon nato sa pagbaton og pagkahiusa uban sa Dios? Si Elder David A. Bednar sa Korum sa Napulog Duha ka Apostoles miingon, “Nasumpay kita pag-ayo sa Manluluwas samtang sa takos nagdawat sa atong mga ordinansa ug mosulod ngadto sa mga pakigsaad, matinud-anong mohinumdom ug mopasidungog niadtong sagradong mga pasalig, ug mohimo sa labing maayo sa pagpuyo sumala sa mga obligasyon nga atong gidawat.” Ang paghimo ug pagtuman sa mga pakigsaad mao ang usa sa unang mga lakang sa pagkahimong usa uban sa Dios ug sa atong mga silingan.
Motutok diha sa Mahangtoron nga Pagkatawo
Sa Basahon ni Mormon, lain-laing mga grupo sa katawhan ang giila pinaagi sa lain-laing mga ngalan, lakip sa mga Nephita, mga Lamanita, mga Zoramita, mga Ishmilita, mga Ammonita, ug uban pa. Apan, human sa pagpangalagad sa nabanhaw nga Manluluwas ngadto sa katawhan, wala nay “matang sa mga -ita; apan nagkahiusa sila, ang mga anak ni Kristo” (4 Nephi 1:17).
Kita kinahanglan gayod nga mag-amping sa dili paghingalan o panagbahin taliwala sa atong kaugalingon. Si Presidente Russell M. Nelson mitambag kanato nga dili kalimtan ang atong labing importante nga mga pagkatawo: “Wala ako nagsulti nga ang ubang mga titulo ug mga timailhan dili mahinungdanon. Ako nag-ingon lamang nga kinahanglang walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: ‘anak sa Dios,’ ‘anak sa pakigsaad,’ ug ‘disipulo ni Jesukristo.’”
Si Jesukristo nagpakita sa ehemplo sa pagbaliwala sa kalibotanong mga paghingalan o pagkabahin-bahin sa dihang Siya nagtudlo sa Samarianhon nga babaye diha sa tabay. Siya mipamatuod ngadto kaniya sa Iyang pagkabalaan, ug siya [ang babaye] nakahimo sa pagtudlo sa uban mahitungod Kaniya (tan-awa sa Juan 4:9–29). Samtang kita maningkamot sa pagtan-aw sa atong kaugalingon ug sa atong mga silingan isip mga anak sa Dios, ang tanan nga bahin sa samang pamilya, ang mga kalahian makahatag og dalan sa paghigugma ug paghiusa.
Hangupa ang Imong Talagsaon nga Tahas
Ang pagtandi sa atong kaugalingon ngadto sa uban makapahunong kanato sa pagkahimong usa uban kanila. Ang maayong balita alang kanatong tanan mao nga ang Dios naggamit sa tanang matang sa mga talento ug mga personalidad sa pagtukod sa Iyang gingharian.
Sa dihang si Pablo misulat ngadto sa mga Santos sa Corinto, siya mipahisama sa Simbahan ni Kristo ngadto sa usa ka lawas (tan-awa sa 1 Mga Taga-Corinto 12:12–17). Siya misulti kanila nga ang matag bahin sa lawas adunay mahinungdanong tahas alang sa lawas aron molihok sa tukma nga paagi, bisan og ang matag bahin talagsaon. Nangutana siya, “Kon ang tibuok lawas lonlon pa nga mata, asa na man ang pagdungog?” (1 Mga Taga-Corinto 12:17).
Sa samang paagi, matag usa kanato adunay usa ka importanteng tahas nga buhaton—usa nga lagmit mahimong lahi gikan sa atong mga silingan’. Si Elder Dieter F. Uchtdorf sa Korum sa Napulog Duha ka Apostoles miingon: “Tingali kamo mobati nga anaay uban nga mas angayan o may mas daghang kasinatian nga makahimo sa inyong mga calling ug mga buluhaton nga mas maayo pa kaninyo, apan ang Ginoo naghatag ninyo niini nga mga responsibilidad nga may hinungdan. Tingali may mga tawo ug mga kasingkasing nga kamo ang bugtong makakab-ot ug makatandog.” Kon kita mohangop ug motuman sa atong talagsaon nga mga tahas, sa atong mga ward, mga branch, ug mga pamilya mahimong magkahiusa ug molihok sama sa usa ka himsog nga lawas.
Usa ka Kumunidad sa Zion
Si Elder Gerrit W. Gong sa Korum sa Napulog Duha ka Apostoles nagtudlo: “Ang gipahiuli nga Simbahan sa Ginoo mamahimong usa ka dapit sa pagpatubo og usa ka Zion nga komunidad. Samtang kita magsimba, moserbisyo, mopahimulos, ug dungan nga magkat-on sa Iyang gugma, atong mapalig-on ang usag usa diha sa Iyang ebanghelyo.” Ang Ginoo mopanalangin kaninyo samtang kamo maningkamot sa pagtuman sa Iyang mga sugo ug mahimong usa diha Kaniya—ug kamo lagmit makakaplag nga kamo adunay mas daghang komon sa inyong mga miyembro sa ward ug branch kay sa inyong mahunahunaan!