Digital Lamang

7 ka Adlaw nga Pagpangandam sa Kinatibuk-ang Komperensiya

Ni Brittany Beattie

Mga Magasin sa Simbahan

Ang mga pagpangandam gihimo alang sa pakigpulong ni Hari Benjamin makapadasig sa atong kaugalingong mga sumbanan sa pagpangandam alang sa kinatibuk-ang komperensiya.

Dili ba makapahunahuna kana nga ang Mosiah 2 wala lang basta nagsugod diha ni Hari Benjamin nga naghatag og pakigpulong? Hinoon, sa unang walo ka bersikulo niana nga kapitulo nagpadayag og usa ka importanteng aspeto sa pakigpulong ni Hari Benjamin—sila nagpakita og tinuyo nga pagpangandam nga gihimo sa mga indibidwal, mga pamilya, ug mga lider nga maandam ang ilang mga kasingkasing sa pagdungog sa mga mensahe gikan sa propeta, si Hari Benjamin. Pipila ka mga ehemplo naglakip sa:

Usa ka pagdapit nga gihatag ngadto sa tanan aron sa pag-adto ug sa pagpaminaw (bersikulo 1).
Kini nga imbitasyon gibuhat agi og tubag ngadto sa instruksiyon gikan sa usa ka propeta (tan-awa sa Mosiah 1:10).
Ang mga indibidwal ug mga pamilya miandam ug mihalad og usa ka espesyal nga sakripisyo (bersikulo 3).
Sila mihatag og mga pasalamat alang sa tanang gibuhat sa Dios alang kanila (bersikulo 4).
Mibiyahe sila ngadto sa templo ug nakakita og tagsa-tagsang luna alang sa ilang mga pamilya (bersikulo 5).
Ilang gitukod ilang mga tolda paatubang sa templo aron magpabilin sila didto ug maminaw sa propeta (bersikulo 6).
Mipadala sila og sinulat nga mga mensahe sa mga pagtulon-an aron ang tanan makadawat sa mga gipamulong (bersikulo 8).

Ganahan ko niini nga ehemplo sa pag-andam sa pagpaminaw sa Dios! Tingali kining mga bersikulo mahitungod sa pagpangandam gilakip diha sa Basahon ni Mormon aron sa pagdasig kanato nga motuyo sa pagpangandam alang sa kinatibuk-ang komperensiya o alang sa bisan unsang mga mensahe gikan sa mga propeta sa Dios sa tibuok tuig.

Sa milabay nga pipila ka tuig, naningkamot ko nga motuyo sa pagpangandam usa ka semana sa dili pa ang kinatibuk-ang komperensiya, ug kini nakapahimo sa akong kasinatian sa komperensiya nga mas makahuluganon sa daghang maanindot nga paagi! Kon ganahan mo nga mosulay og pito ka adlaw sa tinuyo nga pagpangandam sa kinatibuk-ang komperensiya, ania ang pipila ka mga ideya base sa mga bersikulo gikan sa Mosiah 2.

7 ka Adlaw sa Pagpangandam alang sa Kinatibuk-ang Komperensiya—Usa ka Sundanan gikan sa Mosiah 2:1–8

Mosiah 2	7 ka Adlaw nga Pagpangandam sa Kinatibuk-ang Komperensiya
1. Dapita ang tanan sa pag-adto ug pagpaminaw sa (bersikulo 1).	1. Dapita ang uban sa pagtan-aw sa kinatibuk-ang komperensiya.
2. Mobuhat sa instruksiyon sa propeta (Mosiah 1:10).	2. Mobuhat sa bag-ong mga pagdapit gikan sa mga propeta.
3. Mohalad og usa ka sakripisyo ug sinunog nga halad (bersikulo 3).	3. Pag-ampo mahitungod sa butang nga mahimo nimong isakripisyo aron mas maayong makadawat sa pulong sa Dios.
4. Magpasalamat sa tanang nabuhat sa Dios (bersikulo 4).	4. Magpasalamat kon sa unsang paagi ang imong kinabuhi napanalanginan pinaagi sa mga pagtulun-an gikan sa nangagi nga mga kinatibuk-ang komperensiya.
5. Mobiyahe ngadto sa templo ug mangita og mga luna alang sa ilang mga pamilya (bersikulo 5).	5. Maghimo og usa ka sagrado nga luna alang sa pagpaminaw sa kinatibuk-ang komperensiya.
6. Magtukod sa ilang mga tolda paatubang sa propeta, magpabilin ug maminaw (bersikulo 6).	6. Timbang-timbanga kon unsa ka maayo ang pagbaling sa imong kasingkasing ngadto sa mga propeta, ug sa pagpangandam nga “magpabilin … ug maminaw.”
7. Mopadala og mga sinulat nga mga mensahe (bersikulo 8).	7. Mag-andam og usa ka plano alang sa umaabot nga pagtuon sa komperensiya.

Adlaw 1: Dapita ang uban sa pagtan-aw sa kinatibuk-ang komperensiya. Mahimo kang magdapit sa uban tinagsa-tagsa o magpadala og imbitasyon ngadto sa tanan nimong mga higala sa social media. Paghimo og laing mga paagi nga ikaw makapakigbahin og usa ka pagdapit diha sa imong komunidad! Tingali makahimo ka og makalingaw nga pagdapit alang sa imong pamilya o mga kauban sa kwarto sa panimalay aron pagmatuod sa espesyal nga kalihokan ug mga panalingin sa pagkat-on gikan sa mga propeta ug sa mga lider sa Simbahan.

Adlaw 2: Mobuhat sa bag-ong mga pagdapit gikan sa mga propeta. Kita makapakita sa Langitnong Amahan nga kita andam sa pagdawat og instruksiyon ug mobuhat niini pinaagi sa paglihok sa mga pagtulon-an nga atoa nang nadawat. Hunahunaa ang pagbasa ang tibuok nga mga pakigpulong gikan sa mga propeta ug mga apostol ug buhata ang mga pagdapit nga ilang gihatag.

Adlaw 3: Pag-ampo mahitungod sa butang nga imong masakripisyo aron mas maayong makadawat sa pulong sa Dios. Hunahunaa kon unsa ang mga sakripisyo nga tingali imong mahimo niining semanaha aron ipakita sa Langitnong Amahan nga ikaw andam na nga maminaw og dugang gikan Kaniya. Pananglitan, dinasig sa duha ka kanhi nga mga pagdapit gikan ni Presidente Russell M. Nelson sa pagpahigayon og pagpuasa sa social media, akong nakita nga dako og ikatabang ang pagsakripisyo sa social media (gawas lang sa pagpakigbahin mahitungod sa kinatibuk-ang komperensiya) ug bisan ang ubang media nga dili sa Simbahan nga modala ngadto sa kinatibuk-ang komperensiya. Kini makatabang sa pagpatin-aw sa atong hunahuna nga mas motutok bahin ni Jesukristo ug sa Iyang pulong. Matag usa kanato makaampo alang sa pagdasig aron makahibalo kon unsa nga sakripisyo ang labing maayo nga makatabang kanato sa indibidwal aron makapangandam.

Adlaw 4: Pagpasalamat kon sa unsang paagi ang inyong kinabuhi napanalanginan pinaagi sa mga pagtulon-an gikan sa kanhi kinatibuk-ang mga komperensiya. Hunahunaa kon sa unsang paagi ang imong kinabuhi napanalanginan sa imong pagbuhat sa mga pagtulon-an sa nangagi nga kinatibuk-ang komperensiya. Ipadayag ang mga pasalamat ngadto sa Langitnong Amahan alang niadtong mga pagtulon-an ug mga panalangin. Mahimo pa gani nimong isulat ang imong mga hunahuna diha sa imong journal o ipakigbahin ang imong mga kasinatian ngadto sa mga minahal.

Adlaw 5: Paghimo og usa ka sagrado nga dapit alang sa pagpaminaw sa kinatibuk-ang komperensiya. Mahimong maminaw ka sa kinatibuk-ang komperensiya diha sa meetinghouse, sa imong panimalay, sa hilom nga parke, o sa imong trabahoan, tan-awa kon aduna bay paagi sa pag-andam niana nga luna isip usa ka “balay sa pagkat-on” (Doktrina ug mga Pakigsaad 109:8). Ikonsiderar ang yano nga mga paagi nga ikaw makahimo, sama sa gitudlo ni Presidente Nelson kalabot sa Igpapahulay, “usba ang imong panimalay [o ubang mga dapit] ngadto sa usa ka sentro sa pagkat-on sa ebanghelyo” alang sa kinatibuk-ang komperensiya, sama sa pagpanglimpyo o gani temporaryong pagtangtang sa potensiyal nga mga makabalda.

Adlaw 6: Timbang-timbanga kon giunsa pagbaling sa imong kasingkasing ngadto sa mga propeta, ug mangandam sa “pagpabilin … ug maminaw.” Kon maghunahuna ko sa mga tawo nga nagtukod sa ilang mga tolda paatubang sa propeta, napahinumdoman ko sa pagtimbang-timbang kon unsa ko ka tarong nga nag-atubang sa mga propeta. Kita makakonsiderar sa pagrebyo sa “Ayaw Pagsimba ug Laing Dios Gawas Kanako” gikan ni Presidente Nelson ug “Hain Ka Nag-atubang?” gikan ni Elder Lynn G. Robbins, emeritus General Authority Seventy. Sila nangutana og maanindot nga mga pangutana mahitungod kon unsa ka tarong kita nga nag-atubang ngadto sa Dios ug sa Iyang mga propeta. Sa pagbuhat sa ingon, atong mabuksan ang atong mga kasingkasing sa paghinulsol ug aron mas maandam sa pagsunod sa mga sugo sa Dios diha sa umaabot nga kinatibuk-ang komperensiya.

Ganahan usab ko kon giunsa sa pagpangandam sa mga katawhan ni Hari Benjamin aron “magpabilin … ug maminaw” nga dili na kinahanglan mobiya sa ilang mga tolda sa dihang siya namulong. Niadtong batan-on pa ko, usahay akong hunahunaon ang musika sa kinatibuk-ang komperensiya isip usa ka maayong panahon sa pagpahulay, apan karon ako nakaamgo nga ang musika usa usab ka importante nga bahin sa mga pagtulon-an sa komperensiya. Maningkamot ko sa pagpangandam og mas maayo sa pagkat-on gikan niana nga bahin sa kinatibuk-ang komperensiya aron ako “magpabilin” sa tibuok duha ka oras sa matag sesyon. Kana tingali lisod para sa mga bata o sa espesyal nga mga kahimtang, apan kita tingali maghunahuna kon adunay bay bisan unsang butang nga atong maandam (sama sa timo-timo o mga kalihokan alang sa mga bata o gani pagsiguro nga kita mangatulog og sayo aron magpabilin nga alerto) aron makuhaan ang atong mga panginahanglan sa pagbiya atol sa sesyon ug hinoon “magpabilin … ug maminaw” sa (Mosiah 2:6) sama sa gibuhat sa katawhan ni Hari Benjamin.

Adlaw 7: Pag-andam og usa ka plano alang sa umaabot nga pagtuon sa komperensiya. Sama sa mga panahon ni Hari Benjamin, ang atong mga propeta karon gihimong magamit ang ilang mga pulong ngadto sa tanan pinaagi sa Liahona o Librarya sa Ebanghelyo nga app. Paghimo og usa ka plano karon aron sa pagtuon sa mga pulong sa mga propeta human sa komperensiya aron nga ikaw maandam na! Pananglitan, pagkat-on unsaon sa paghimo og plano sa pagtuon diha sa Ebanghelyo sa Librarya nga app, o pag-subscribe ngadto sa Liahona giprinta o sa digital nga mga format sa MagazineSubscriptions.ChurchofJesusChrist.org.

Mahimo usab nimong rebyohon ang artikulo diha sa “Atong Kinatibuk-ang Komperensiya nga Inadlaw nga Buluhaton ug Pagpakig-istorya” ni Elder David A. Bednar sa Korum sa Napulog Duha ka Apostoles alang sa daghang mga ideya kon sa unsang paagi kita mahimong andam sa pagbuhat sa mga pagtulon-an gikan sa mga propeta ug sa ubang mga lider sa Simbahan.