Digital Lamang: Mga Young Adult
Sa Unsang Paagi ang Akong mga Pakigsaad Nakaangkon og Mas Lawom nga Kahulogan human Namatay ang Akong Papa
Sa dihang mitaliwan ang akong papa, wala ko makahibalo kon unsaon nga makasugakod ang akong pamilya. Apan ang mga panalangin sa ebanghelyo ni Jesukristo mitabang kanako nga makakaplag og paglaom ug kaklaro.
Nagdako sa Thailand, usahay mibati ko nga ingon og lahi ko isip usa ka Kristiyano. Apan bisan og lahi ang akong tinuohan kaysa kadaghanan sa mga tawo sa akong palibot, wala gayod ko mibati nga naulaw o gustong moundang sa ebanghelyo ni Jesukristo. Kanunay nakong gihigugma ang mga kamatuoran nga gitudlo niini kanako, ug gibuhat nako ang akong labing maayo sa pagsunod niini.
Apan miigo ang trahedya sa akong pamilya. Ug sa unang higayon sa akong kinabuhi, gikinahanglan gayod nako nga mopili, mopalambo, ug mohupot sa hugot nga pagtuo diha sa usa sa mga sukaranan sa ebanghelyo—ang plano sa Dios sa kaluwasan.
Ang Panginahanglan sa Pagpalig-on og Balik sa Akong Pagtuo
Niadtong 2014, ang akong pamilya ug ako naselyo didto sa Hong Kong Temple. Dugay na kaayo kong nagpaabot alang niini nga adlaw ug mahinamon kaayo. Apan wala madugay human nga kami nakasinati niining matahom nga ordinansa, ang akong amahan wala damha nga mitaliwan.
Ako naigo sa grabi, hilabihan nga kaguol. Wala ko mahibalo kon unsaon sa akong pamilya ug nako sa pagsugakod sa pagkawala sa akong papa. Kini mabati nga daw usa ka tibuok nga bahin kanamo ang nawala. Unsaon man namo sa paglahutay sa kinabuhi nga wala siya?
Niining mangitngit nga panahon, samtang midangop ko sa Langitnong Amahan ug kang Jesukristo alang sa kahupay, nakat-on ko kon unsaon sa pagpalawom sa akong pagpamatuod sa plano sa kaluwasan ug sa mahangtoron nga mga pamilya.
Kanunay akong gitudloan ug nagtuo nga ang mga pamilya mamahimong magkauban sa kahangtoran. Apan ang pag-atubang og lisod nga pagkawala nakauyog gayod niini nga bahin sa akong pagpamatuod. Gusto ug gikinahanglan nako nga masayod nga makita nako pag-usab ang akong papa ugma damlag. Nagsugod ko sa tinguha nga magkat-on og dugang mahitungod sa doktrina sa mahangtoron nga mga pamilya.
Si Presidente Henry B. Eyring, Ikaduhang Magtatambag sa Unang Kapangulohan, bag-ohay lang nga mitudlo:
“Pinaagi kini sa mga pakigsaad sa pagselyo diha sa templo nga atong madawat ang kasegurohan sa mahigugmaong mga koneksyon sa pamilya nga magpadayon human sa kamatayon ug molungtad sa kahangtoran. …
“Ang mga pagsulay, mga hagit, ug mga kasakit seguradong moabot natong tanan. … Apan, kon motambong kita sa templo ug mohinumdom sa atong mga pakigsaad, makaandam kita sa pagdawat og personal nga paggiya gikan sa Ginoo.”
Ug tinuod kini! Sa dihang naglisod gayod ko sa pagbati sa gugma sa Langitnong Amahan ug ni Jesukristo sa akong kinabuhi human namatay ang akong papa, ang pagtuon niining makahupay nga pakigsaad ug panalangin mitabang kanako nga makakita pag-usab sa gagmay nga mga timaan sa Ilang gugma ug kahayag.
Ang Atong mga Pakigsaad Nagbugkos Kanato ngadto Kaniya ug sa Usag Usa
Ang among pagselyo diha sa templo gani nahimong mas makahuloganon kanako human nga ang akong papa mitaliwan. Ug akong naamgohan nga ang tanang pakigsaad nga gidapit sa Langitnong Amahan nga atong himoon ug tumanon mga matahom nga mga pribiliheyo alang kanato.
Ang mga pakigsaad dili lang yano nga mga saad—kini mao ang importante nga butang sa pagtabang kanato sa pagdapit sa gahom sa Manluluwas sa atong mga kinabuhi. Kini motugot kanato sa pagpadayon sa paglihok ug paglaom, bisan pa man sa kasagmuyo ug mga hagit sa kinabuhi. Tungod sa mas dako nga akses nga aduna ako sa makaayo nga gahom ni Jesukristo, ako makalahutay hangtod sa kataposan uban sa hingpit nga kalipay, nasayod nga makita nako pag-usab ang akong papa.
Sama sa gisaad ni Presidente Eyring, “‘Bisan unsa pa ang mahitabo, maayo ra ang tanan tungod sa mga pakigsaad sa templo.’”
Mapasalamaton kaayo ko alang sa ebanghelyo ni Jesukristo ug sa padayon nga paglaom ug kalinaw nga gidala niini, ilabi na kon nagkinahanglan ko og kalinaw atol sa mga panahon sa kawalay kasegurohan ug pagtaliwan. Mibati gihapon ko og kaguol, apan ang akong mga pakigsaad nagpainit sa akong kasingkasing ug mitabang kanako nga magpadayon uban ang paglaom.
Giawhag ko kamo sa pagpamalandong sa kamahinungdanon sa mga pakigsaad nga inyong gihimo ug sa unsang paagi Kini nagkonektar kaninyo ngadto sa Langitnong Amahan ug kang Jesukristo sa matag adlaw. Nasayod ako nga sama lang nga ang Manluluwas naglakaw uban kanako sa dalan sa pakigsaad, Siya molakaw uban kaninyo samtang kamo modangop ngadto Kaniya.