Paggamit sa Basahon ni Mormon nganha sa Imong Kinabuhi
Sa Unsang Paagi nga ang Kahayag ni Kristo Mowagtang sa Kangitngit sa Tinago nga mga Kalihokan
Sa unsang paagi nga kita makapadayon sa pagdapit sa kahayag ngari sa atong mga kinabuhi?
Isip miyembro sa Ang Simbahan ni Jesukristo sa mga Santos sa Ulahing mga Adlaw sa tibuok kinabuhi, pamilyar na kaayo nako ang pulong nga tinago nga mga kalihokan. Kini nga mga pulong kanunay nga inubanan sa dili maklaro nga mga imahe sa mga tulisan ni Gadianton nga nanagtago sa mga agianan ug nanaghimo og tinago nga mga saad; ang tibuok nga butang murag misteryoso alang nako, ingon nga walay kalabotan sa akong kinabuhi.
Apan, ang nahitabo, ang tinago nga mga kalihokan tinuod gayod ug may kalabotan gayod kanato karong panahona—ug dili kini kanunay nga komplikado sama sa inyong gihunahuna. Samtang ang tinago nga mga kalihokan nagpasabot nga “kapunongan sa mga katawhan nga nagkahiusa pinaagi sa mga panumpa aron sa pagpalihok sa daotan nga mga katuyoan sa pundok,” ania ang pipila sa ubang mga sitwasyon nga matawag usab og tinago nga mga kalihokan:
-
“Kon ang mga tawo nagkunsabo sa pagtago sa ilang daotang mga buhat”
-
Kon ang mga tawo mogamit og dili matarong nga mga pamaagi aron “makaangkon og gahom ug bahandi” (Ether 8:23)
-
Kon ang “mga gang, mga kartel sa druga, ug organisado nga kriminal nga mga pamilya” naghimo og mga krimen ug bayolente nga mga binuhatan
Kini nga mga paghulagway murag medyo pamilyar nako. Murag nakakita ko niini nga matang sa kalihokan sa matag higayon nga motan-aw ko sa mga balita. Ug dili ikatingala—ang tinago nga mga kalihokan anaa na sukad sa panahon ni Cain (tan-awa sa Ether 8:15), ug si propeta Moroni matinguhaon gayod sa pagpasidaan kanato nga kinahanglan kita nga magpadayon sa paglikay kanila (tan-awa sa Ether 8:23).
Busa unsaon nga maseguro nga ang espirituwal nga kakuyaw “niini nga mga kalihokan sa pagbuno” (Ether 8:23) mapalayo sa atong mga kinabuhi kutob sa mahimo?
Ang Manluluwas “Dili Magabuhat diha sa Kangitngit”
Ang tinago nga mga kalihokan dinasig ni Satanas; siya “mihulhog sa mga anak sa katawhan ngadto sa tinago nga mga kalihokan” (2 Nephi 9:9). Ug kay nasayod kita nga si Satanas magabuhat diha sa kangitngit (tan-awa sa Ether 8:16), makataronganon lang nga ang tambal mao ang kaatbang: kahayag. Ang Manluluwas “dili magabuhat diha sa kangitngit” (2 Nephi 26:23). Gani, Siya ang kahayag:
-
“Ang matuod nga kahayag nga nagaiwag sa matag-usa ka tawo (Juan 1:9)
-
“Ang kahayag nga nagdan-ag sa kangitngit” (Doktrina ug mga Pakigsaad 6:21)
Si Elder Dieter F. Uchtdorf sa Korum sa Napulog Duha ka Apostoles nagtudlo nato mahitungod sa kalainan tali sa pagpakabuhi sa kangitngit ug pagpakabuhi sa balaanong kahayag:
“Ang kangitngit mopaus-os sa atong abilidad sa klaro nga pagtan-aw. Mopangitngit kini sa atong panan-aw nga kaniadto yano ug klaro. Kon anaa kita sa kangitngit, lagmit dili usab maayo ang atong mga pagpili, kay dili man nato makita ang mga peligro sa atong agianan. …
“Ang kahayag, sa laing bahin, magtugot nga atong makita ang mga butang kon unsa gayod kini. Magtugot kini nga mahibaloan nato unsay sakto ug sayop, kon unsay importante ug dili.”
Sa Unsang Paagi nga Kita Makadapit sa Kahayag ngari sa Atong mga Kinabuhi?
Dili lamang kita magkinahanglan sa kahayag sa Manluluwas sa higayon nga mag-atubang kita og butang nga sama ka dako sa tinago nga mga kalihokan—kita magkinahanglan niini sa tanang higayon. Busa sa unsang paagi nga kita makapadayon sa pagdapit sa kahayag ngari sa atong mga kinabuhi?
Si Presidente Uchtdorf mihatag nato og tulo ka paagi:
Kon kita nagtinguha sa pagdala sa Kahayag ni Kristo ngadto sa atong mga komunidad, kita mahimong mopakigbahin sa atong mga pagpamatuod. Si Presidente M. Russell Ballard (1928–2023) mipasabot nga ang mga Lamanita “milaglag sa impluwensya sa mga tulisan ni Gadianton diha sa ilang katilingban pinaagi sa ‘pagsangyaw sa pulong sa Dios … taliwala kanila’ [Helaman 6:37].”
Kon kamo mibati nga murag nagpuyo kamo sa kangitngit—mibati og kaulaw, nawala, murag kinahanglan ninyong tagoan ang usa ka butang—hibaloi nga dili kana ang paagi sa Ginoo. Gusto Siya nga kamo mogawas paingon sa kahayag sa Iyang gugma, maghinulsol, mobalik Kaniya, ug mapadayon sa pagpakigbahin sa inyong kahayag ngadto sa mga tawo sa inyong palibot.
Uban ni Kristo, ang Kangitngit Dili Molampos
Mao nga, unsay punto ni Moroni sa paghisgot mahitungod sa tinago nga mga kalihokan? Aron ba mahadlok ug mabalaka kita?
Dili gayod. Gani, ang mga rason ni Moroni makahatag og paglaom:
-
“Nga ang daotan mahunong”
-
“Nga si Satanas walay gahom diha sa [atong] mga kasingkasing”
-
“Nga [kita] madani sa paghimo og maayo sa kanunay”
-
“Nga [kita] mopaduol ngadto sa tubod sa tanan nga pagkamatarong ug maluwas” (Ether 8:26)
Kon nakahibalo kita sa mga taktika ni Satanas—ug mas importante, nakahibalo kon unsa gayod ka dako sa gahom nga aduna ang Langitnong Amahan ug si Jesukristo—kita makapangandam sa pagsugakod sa mga pagpang-ataki sa atong mga pagpamatuod ug lig-ong makabarog batok sa pagbitad sa kalibotan. Kita makadapit sa kahayag imbes magpuyo diha sa kangitngit.
Kita masayod nga “uban kang Kristo, ang kangitngit dili molampos.” Tungod kay ang “kangitngit dili makalahutay sa kahayag sa Anak sa buhi nga Dios!”